ބްރެންޓްފޯޑް ބަލިކޮށް ލިވަޕޫލް ދެވަނައަށް

އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ ކުޅުނު މެޗުން ބްރެންޓްފޯޑް ބަލިކޮށް ތާވަލުގެ ދެވަނައަށް ލިވަޕޫލް ޖެހިލައިފިއެވެ.

އަމިއްލަ ދަނޑުގައި ކުޅުނު މެޗުން ލިވަޕޫލް މޮޅުވީ ބްރެންޓްފޯޑް އަތުން 3-0 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މި ހާފު ނިމެން ގާތް ވެފައި ވަނިކޮށް ލިވަޕޫލުން ވަނީ ލީޑު ނަގާފައެވެ. ފުރަތަމަ ހާފު ނިމެން މިނެޓަކަށް ވެފައި ވަނިކޮށް ޓްރެންޓް އަލެކްސަންޑަ-އާނޯލްޑް ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ފަބީނިއޯއެވެ.

އެއާއެކު މި މެޗުގެ ދެވަނަ ހާފުގައި ލިވަޕޫލުން ވަނީ ކުޅުން ރަނގަޅުކޮށް ގިނަ ހަމަލާތަކެއް އުފައްދާފައެވެ. އެގޮތުން މެޗުގެ 69 ވަނަ މިނެޓުގައި ލިވަޕޫލުން ލީޑު ފުޅާކުރިއިރު، އެންޑީ ރޮބަޓްސަން ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ އަލެކްސް އޮކްސްލޭޑް-ޗަމްބަލެއިންއެވެ. މިއީ މި ސީޒަނުގެ ލީގުގައި ޗަމްބަލެއިން ކާމިޔާބުކުރި ފުރަތަމަ ލަނޑެވެ.

އޭގެ ފަހުން ޗަމްބަލެއިންގެ ބަދަލުގައި ލިވަޕޫލުން ޓަކޫމީ މިނަމީނޯ ކުޅެން އެރުވިއިރު، ކުޅެން އެރިތާ ތިން މިނެޓު ތެރޭ އޭނާ ވަނީ ލިވަޕޫލުގެ ތިންވަނަ ލަނޑު ޖަހައިދީފައެވެ. މި ލަނޑު މިނަމީނޯ ކާމިޔާބުކުރީ ބްރެންޓްފޯޑުގެ ޑިފެންޑަރުންނަށް ހެދުނު ގޯހެއްގެ ފައިދާ ނަގައި، އޭރިއާ ތެރެއިން ރޮބާޓޯ ފިރްމީނޯ ދިން ބޯޅައަކުންނެވެ.

މި މޮޅާއެކު ތާވަލުގެ ދެވަނައަށް ލިވަޕޫލް ޖެހިލިއިރު، ތާވަލުގެ އެއްވަނައިގައި އޮތް މެންޗެސްޓާ ސިޓީގެ ލީޑު ވަނީ 11 ޕޮއިންޓަށް ކުޑަވެފައެވެ. އެގޮތުން ސިޓީ ކުޅުނު 22 މެޗުން 56 ޕޮއިންޓް ލިބިފައިވާއިރު، ދެވަނައިގައި ލިވަޕޫލް އޮތީ އެއް މެޗު މަދުން ކުޅެ 45 ޕޮއިންޓާއެކުއެވެ. އަދި ތާވަލުގެ ތިންވަނައަށް ވެއްޓުނު ޗެލްސީއަށް 22 މެޗުން ލިބިފައިވަނީ 43 ޕޮއިންޓެވެ.

މީގެ އިތުރުން ތާވަލުގެ ހަތަރުވަނައިގައި އޮތް ވެސްޓް ހޭމް ޔުނައިޓެޑް ވަނީ ލީގުގައި އާދީއްތަ ދުވަހުގެރޭ އަމިއްލަ ދަނޑުގައި ކުޅުނު މެޗުން 3-2 ގެ ނަތީޖާއަކުން ލީޑްސް ޔުނައިޓެޑް އަތުން ބަލިވެފައެވެ. އެއާއެކު ވެސްޓް ހޭމަށް 22 މެޗުން ލިބިފައިވަނީ 37 ޕޮއިންޓެވެ.