ހޯރަފުށީގެ މަގުހެދުމުގެ މަޝްރޫއުގެ އަމަލީ މަސައްކަތް ފަށައިފި
މަގު ހެދުމުގެ މަޝްރޫއަކީ ޒަމާންތަކެއް ވަންދެން ރައްޔިތުން ދުށް ހުވަފެނެއް
މަގު ހެދުމުގެ އަމަލީ މަސައްކަތުގެ ތެރެއިން
ހއ. ހޯރަފުށީގެ މަގު ހެދުމުގެ މަޝްރޫއުގެ އަމަލީ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އިން ފަށައިފިއެވެ.
އަމަލީ މަސައްކަތް ފައްޓަވައިދެއްވީ އެމްޓީސީސީގެ ސީއީއޯ އާދަމް އާޒިމްއެވެ.
މިމަޝްރޫއުގެ އަމަލީ މަސައްކަތް ފެށުމަށް ބޭއްވި ޚާއްސަ ރަސްމިއްޔާތުގައި ކައުންސިލްގެ ރައީސް މުހައްމަދު ވަހީދު ވިދާޅުވީ، މަގުހެދުމުގެ މަޝްރޫއަކީ ޒަމާންތަކެއް ވަންދެން ރައްޔިތުން ދުށް ހުވަފެނެއް ކަމަށާއި، މިހުވަފެނުގައި ކުލަ ޖައްސައިދިނީ ރައީސް އިބްރާހިމް މުހައްމަދު ސޯލިހު ކަމަށެވެ. އަދި ވިދާޅުވީ މިއީ މުޅި ރަށަށް ލިބޭ ވަރަށް ބޮޑު ކުރިއެރުމެއް ކަމަށެވެ.
ވަހީދު ވިދާޅުވީ ރަށުގެ މަގުތައް ޒަމާނީ ފެންވަރަށް ތަރައްގީ ކުރެވިގެން ދަނީ ރައްޔިތުން އެދޭ ގޮތަށް ކަމަށެވެ. މަގުތަކުގައި އަޑިގުޑަންތައް ހުރުމުގެ ސަބަބުން އެކިވަރުގެ ގެއްލުން ރައްޔިތުންނަށާއި، ވެހިކަލްތަކަށް ލިބިފައިވާކަން ފާހަގަކުރައްވައި ވަހީދު ވިދާޅުވީ، މިމަޝްރޫއާއެކު އެފަދަ ހުރިހާ މައްސަލައަކަށް ހައްލު ލިބޭނެ ކަމަށެވެ.
މި މަޝްރޫއުގެ ދަށުން ހޯރަފުށީގެ 11 މަގެއްގައި 5,303 މީޓަރު ދިގުމިނުގެ ސަރަހައްދެއްގައި ތާރު އެޅުމަށް ވަނީ ހަމަޖެހިފައެވެ. އަދި 11,113.80 (އެގާރަހާސް އެއްސަތޭކަ ތޭރަ ޕޮއިންޓް އަށެއް ސުމެއް) އަކަ މީޓަރުގެ ސަރަހައްދެއްގައި ދުވާރު ހެދުމާއި، ފެންހިންދާ ނިޒާމު ގާއިމުކުރުމާއި، މަގުބައްތި ހަރުކުރުމަށްވެސް ވަނީ ހަމަޖެހިފައެވެ.
އެމްޓީސީސީއާ ހަވާލުކުރެވުނު 71.90 މިލިއަން ރުފިޔާގެ މި މަަޝްރޫއު ނިންމުމަށް ކަނޑައަޅާފައިވަނީ 470 ދުވަހުގެ ތެރޭގައެވެ.
