އަކުންބަކުން އަދި އެޗްޑީސީއިން މެޗްތަށް ކާމިޔާބުކޮށްފި

ކްރިކެޓް ބޯޑް އޮފް މޯލްޑިވްސްއިން އިންތޮޒާމުކޮށްގެން ކުރިއަށް ގެންދާ ރަމަޟާން ކްރިކެޓް ކާނިވަލްގައި ބުދަ ދުވަހު ކުޅުނު މެޗުތަށް އަކުންބަކުންނާއި އެޗްޑީސީއިން ކާމިޔާބުކޮށްފިއެވެ.

މި ކާނިވަލްގައި ބުދަ ދުވަހު ހަވީރު ކުޅެފައިވަނީ އޯޕަންޓޭޕްބޯލް މުބާރާތުގެ 2 މެޗެވެ. ފުރަތަމަ މެޗް މޯޑަސް އޮޕެރަންޑީގެ މައްޗަށް އަކުންބަކުން ކުރިހޯދީ 13 ލަނޑުން މެޗް ކާމިޔާބުކޮށްގެންނެވެ.

މެޗުގައި ފުރަތަމަ ކުޅެން އަރާފައިވަނީ އަކުންބަކުންނެވެ. އެޓީމުން 8 އޯވަރުގެ ތެރޭގައި 1 ކުޅުންތެރިއަކު ނުބައިވެގެން ހެދިފައިވަނީ 94 ލަނޑެވެ. އެޓީމުގެ ސާއިސް މުހަންމަދު 28 ލަނޑު ހަދާފައި ވާއިރު އަހުމަދު އާމިރު ވަނީ 18 ލަނޑު ހަދާފައެވެ. ޖަވާބުގައި މޯޑަސް އޮޕެރަންޑީ ކުޅެންއަރާ އެންމެ ކުޅުންތެރިއަކު ނުބައިވެގެން އެޓީމަށް ހެދިފައިވަނީ 81 ލަނޑެވެ. އެޓީމުގެ އިރުފާން ވަނީ 32 ލަނޑު ހަދާފައެވެ.

ދެވަނަ މެޗުގައި ސުގަކޯން އާއި އެޗްޑީސީ ބައްދަލުކުރިއިރު އެޗްޑިސީއިން މެޗް ކާމިޔާބުކޮށްފައިވަނީ 5 ވިކެޓުންނެވެ.

މެޗުގައި ފުރަތަ ކުޅެން އަރާފައިވަނީ ސުގަކޯން އިންނެވެ. އެޓީމުން 8 އޯވަރުގެ ތެރޭގައި 5 ކުޅުންތެރިން ނުބައިވެގެން އެޓީމަށް ހެދިފައިވަނީ 81 ލަނޑެވެ. އެގޮތުން އެޓީމުގެ ހަސަން ރަޝީދު ވަނީ 33 ލަނޑު ހަދައިދީފައެވެ. ޖަވާބުގައި އެޗްޑީސީއިން ކުޅެން އަރާ 7 އޯވަރުގެ ތެރޭގައި އެޓީމުން ވަނީ 82 ލަނޑު ހަދާފައެވެ. އެޓީމުގެ އާދަމް ނާސިފު އުމަރު 33 ލަނޑު ހެދިއިރު މުހަންމަދު ސަދުހާން ވަނީ 10 ލަނޑު ހަދާފައެވެ. އަދި އެޓީމުގެ އާދަމް ނާސިދު ވަނީ 9 ލަނޑުން 3 ވިކެޓް ނަގާފައެވެ.

ކާނިވަލްގައި މާދަމާ ކުޅެވޭނީވެސް އޯޕަން ޓޭޕްބޯލްގެ ދެމެޗެވެ. ފުރަތަމަ މެޗުގައި ލެޝާކާގޯ އާއި އެމްއާރްޑީސީގެ ޓީމް ބައްދަލުކުރާއިރު ދެވަނަ މެޗުގައި ބައްދަލުކުރާނީ ކޭޑީއެމް އާއި ވަންއޯވަން އެވެ.