12 ދުވަހުގެ ތެރޭގައި 55،000 ފަތުރުވެރިން

މިއަހަރުގެ ފުރަތަމަ 12 ދުވަހުގެ ތެރޭގައި 55،055 ފަތުރުވެރިން ރާއްޖެ އައިސްފައިވާކަމަށް ޓުއަރިޒަމް މިނިސްޓްރީން ހާމަކޮށްފިއެވެ.

ޓުއަރިޒަމް މިިނިސްޓްރީން އެންމެ ފަހުން އާންމުކޮށްފައިވާ މައުލޫމާތުގައިވާ ގޮތުން މިއަހަރުގެ މިހާތަނަށް އައި ފަތުރުވެރިންގެ އަދަދު 2021 ވަނަ އަހަރުގެ މި މުއްދަތާ އަޅާ ބަލާއިރު 52.9 އިންސައްތަ އިތުރެވެ. ދުވާލެއްގެ މައްޗަށް 4،588 ފަތުރުވެރިން ރާއްޖެ އަންނައިރު، 9 ދުވަހު ރާއްޖޭގައި މަޑުކުރާކަމަށް ވަނީ ރެކޯޑު ކުރެވިފައެވެ.

މިއަހަރު އެންމެ ގިނަ ފަތުރުވެރިން އަންނަ މާކެޓުގެ ގޮތުގައި އޮތީ ރަޝިއާ މާކެޓެކެވެ. ރަޝިއާއިން މިހާތަނަށް 11،007 ފަތުރުވެރިން ވަނީ އައިސްފައެވެ. ދެވަނައިގައި އޮތް އިޓަލީ މާކެޓުން 4،313 ފަތުރުވެރިން އައިސްފައިވާއިރު، ޔޫކޭއިން އައިސްފައިވަނީ 3،085 ފަތުރުވެރިންނެވެ. 2021 ވަނަ އަހަރު ނިމުނުއިރު އެއްވަނައިގައި އޮތް އިންޑިއާ މާކެޓުން މިއަހަރުގެ މިހާތަނަށް އައިސްފައިވަނީ 3،075 ފަތުރުވެރިން ކަމަށް ޓުއަރިޒަމް މިނިސްޓްރީން ބުނެފައިވެއެވެ.

ޓުއަރިޒަމް މިނިސްޓްރީ އިން ބުނީ މި ހަފްތާ ތެރޭގައި އިތުރު 4 ޓޫރިސްޓް އެކޮމޮޑޭޝަން ފެސިލިޓީ ޚިދުމަތަށް ހުޅުވާލާފައިވާކަމަށެވެ. މިއާއެކު މިވަގުތު ޚިދުމަތް ދެމުންދާ އެކޮމޮޑޭޝަން ފެސިލިޓީތަކުގެ ޖުމްލަ 934 އަށް އަރާފައިވާކަމަށް ޓޫރިޒަމް މިނިސްޓްރީން ބުނެފައިވެއެވެ. މީގެ ތެރޭގައި ހިމެނެނީ 161 ރިސޯޓާއި، 627 ހޮޓެލް އަދި ގެސްޓްހައުސްއާއި، 145 ސަފާރީއެކެވެ. މި 934 ފެސިލިޓީގައި ޖުމްލަ 53،250 އެނދު އެބަހުރި ކަމަށް ޓުއަރިޒަމް މިނިސްޓްރީން ބުނެފައިވެއެވެ. މީގެ އިތުރުން މިވަގުތު 29 ބައިނަލްއަގުވާމީ ފްލައިޓެއްގެ ދަތުރުތައް ރާއްޖެއަށް އަންނަނީ ބާއްވަމުންނެވެ.

މިއަހަރު 2 މިލިއަން ފަތުރުވެރިން ގެނައުމަށް ސަރުކާރުން ވަނީ އަމާޒު ހިފާފައެވެ. މިދިޔަ 2021 ވަނަ އަހަރު 1.3 މިލިއަން ފަތުރުވެރިން ގެނައުމަށް ސަރުކާރުން ކުރި އަމާޒު ކާމިޔާބުކޮށް 2021 ވަނަ އަހަރު ނިމުނުއިރު 1.32 މިލިއަން ފަތުރުވެރިން ވަނީ ރާއްޖެ އައިސްފައެވެ.