ގައިދީއަކު ގާނޫނާ ޚިލާފަށް ފުރުވާލަން އުޅުމަކީ ކުރައްވާނެ ކަމެއް ނޫން ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ހޯމް މިނިސްޓަރު އިމްރާން އަބްދުﷲ އާއި ޔޫތު މިނިސްޓަރު އަހްމަދު މަހްލޫފް ބައިވެރިވަޑައިގެން ކުރީގެ ނައިބު ރައީސް އަހްމަދު އަދީބު ރާއްޖެ އިން ފުރުވާލުމަށް މަސައްކަތް ކުރައްވަމުން ގެންދަވާ ކަމަށް ޕީޕީއެމްގެ ކައުންސިލް މެންބަރު އަހްމަދު ސިއްދީގު ކުރެއްވި ތުހުމަތަށް ރައްދު ދެއްވަމުންނެވެ.

މިކަމާ ގުޅިގެން މިނިސްޓަރ އިމްރާން ރާއްޖެއެމްވީއަށް ވިދާޅުވީ، މިހާރު ހުކުމެއް ތަންފީޒު ކުރައްވަމުން ގެންދަވާ ކުރީގެ ނައިބު ރައީސް އަހުމަދު އަދީބު ރާއްޖެއިން ބޭރަށް ފުރުވާލަން އެމަނިކުފާނު މަސައްކަތް ކުރައްވަން ޖެހޭ އެއްވަސް ސަބަބެއް ނެތް ކަމަށެވެ. އަދީބު ފިލައިގެން ރާއްޖެއިން ބޭރަށް ދިޔުން ހުއްޓުވީވެސް އެމަނިކުފާނު ކަަން ފާހަގަ ކުރައްވަމުން ވިދާޅުވީ، ގައިދިއަކު ގާނޫނާ ޚިލާފަށް ފުރުވާލަށް އަދި ގާނޫނާ ޚިލާފަށް ގައިދީއަކަށް މަންފާ ލިބޭނެ އެއްވެސް ކަމެއް ކުރުމަކީ އެމަނިކުފާނު ކުރައްވާނެ ކަމެއް ނޫން ކަމަށެވެ.

ރައީސް ޔާމީނުގެ ވެރިކަމުގައި ހޯމް މިނިސްޓްރީގެ ޑެޕިއުޓީ މިނިސްޓަރުގެ މަޤާމުގައި ހުންނެވި ސިއްދީގު "ޗެނަލް-13" ގައި ވާހަކަދައްކަވަމުން ވަނީ އަދީބުގެ އަނބިކަނބަލުންނާއި މިނިސްޓަރު އިމްރާނާއި މިނިސްޓަރު މަހްލޫފާއި މަހްލޫފްގެ އަނބިކަނބަލުން ހިމެނޭ ގޮތަށް ޑިސެމްބަރ 30 ވަނަ ދުވަހުގެ ރޭ މަހުލޫފް ދިރިއުޅުއްވާ ގޭގައި ބައްދަލު ކުރެއްވި ކަމަށް ތުހުމަތު ކުރައްވާފައެވެ.

މި ތުހުމަތާ ގުޅޭ ގޮތުން މިނިސްޓަރ އިމްރާން ވިދާޅުވީ އެފަދަ އެއްވެސް ބައްދަލު ވުމެއް ކުރިއަށް ނުދާ ކަމަށެވެ. އެއީ އެމަނިކުފާނު ކުރައްވާނެ ކަމެއް ނޫން ކަމަށެވެ.

އެމްއެމްޕީއާރްސީގެ ހިޔާނާތުގެ މައްސަލައިގައި އަދީބުގެ މައްޗަށް ގިނަ ދައުވާ ތަކެއް އުފުލިއެވެ. އޭގެ ތެރެއިން 30ށްވުރެ ގިނަ ދައުވާ އަނބުރާ ގެންގޮސްފައިވާއިރު، އަދީބުގެ މައްޗަށް އުފުލާފައިވާ ދައުވާ ތަކުގެ ތެރެއިން ހަތް ދައުވާއެއް އޭނާގެ މައްޗަށް ސާބިތުވެ، ހުުކުމް ކޮފައިވަނީ 20 އަހަރު ދުވަހުގެ ޖަލަށް ލުމަށާއި، ދެ މިލިއަން ރުފިޔާގެ ޖޫރިމަނާ ކުރުމަށެވެ. އެހެންނަމަވެސް ސިއްޙީ ހާލަތަށް ރިއާޔަތްކޮށް މި ސަރުކާރުންވަނީ އޭނާ ގޭ ބަންދަށް ބަލުކޮށްފައެވެ. އެހެންކަމުން ހުކުން ތަންފީޒު ކުރައްވަމުން ގެންދަވަނީ ގޭގައި ހުންނަވައިގެންނެވެ.