ބޭސްފަރުވާ އަށް މިހާރު ރާއްޖޭން ބޭރުގައި ހުންނެވި ކުރީގެ ނާއިބު ރައީސް އަދި އެމްޓީޑީގެ ރައީސް އަހްމަދު އަދީބު އަށް ދެވުނު މުއްދަތު އިތުރުކޮށްދީފިއެވެ.
އެކަން މޯލްޑިވްސް ކަރެކްޝަނަލް ސަރވިސްއިން ވަނީ ކަށަވަރު ކޮށްދެއްވާފައެވެ. އެގޮތުން ބޭސްފަރުވާގެ މުއްދަތު އިތުރުކޮށްދިނުން އެދި އަދީބުގެ ފަރާތުން ހުށަހަޅުއްވާފައިވާ ހުށައެޅުން ރިވިއު ކުރުމަށްފަހު، 1 އޮކްޓޯބަރުގެ ނިޔަލަށް ވަނީ އެ މުއްދަތު އިތުރުކޮށްދީފައެވެ.
ރާއްޖޭގައި ހެދެން ނެތް ޓެސްޓްތަކެއް ހެދުމަށް ރާއްޖޭން ބޭރަށް ފުރާވަޑައިގަތުމުގެ ހުއްދަ އެ އިދާރާއިން ދީފައިވާއިރު، މީގެ ކުރިންވެސް ވަނީ މުއްދަތު އިތުރުކޮށްދީފައެވެ.
އެމްއެމްޕީއާރްސީގެ ކޮރަޕްޝަން މައްސަލާގައި އަދީބަށް 20 އަހަރުގެ ޖަލު ހުކުމެއް އިއްވައި، ދެ މިލިއަން ރުފިޔާއިން ޖޫރިމަނާކުރީ 2020 ވަނަ އަހަރުއެވެ. އެކަމަކު ދައުލަތާއެކު ހެއްދެވި އިއުތިރާފު އެއްބަސްވުމާއެކު، އެ ހުކުމަށްފަހު އަދީބު ޖަލު ބަންދުން ގޭބަންދަށް ބަދަލުކުރެއްވީ ސިއްހީ ހާލުކޮޅު ހުރިގޮތުން ކަމަށް ބުނެއެވެ.
