ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ސަރުކާރުން ދީނީ ތައުލީމު ކުރިއެރުވުމަށް ޚާއްސަ ސަމާލުކަމެއް ދޭ ކަމަށް އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވިދާޅުވެއްޖެއެވެ.
ބުރާސްފަތި ދުވަހު ކީރިތި ގުރުއާންގެ އިލްމުގެ ތައުލީމީ ޕްރޮގްރާމްތަކުގައި ހުންނަންޖެހޭ މިނިމަމް ސްޓޭންޑަޑް ލޯންޗު ކޮށްދެއްވުމަށްފަހު މިނިސްޓަރު ޒާހިރު ވިދާޅުވީ ގުރުއާނަކީ އިލާހީ ގާނޫނު ކަމަށާއި، އެއީ ދިރިއުޅެންވީ ގޮތް ކަމަށެވެ. ގިޔާމަތާ ހަމައަށް ރައްކާތެރިކުރައްވާފައިވާ ފޮތެއްކަން ފާހަގަކުރައްވައި މިނިސްޓަރު ވިދާޅުވީ އެތަކެއް ހިތްތަކެއްގައި ކޮންމެ ދުވަހަކު ވެސް ގުރުއާން ރައްކާތެރިކުރެވިގެންދާ މަންޒަރު ފެންނަ ކަމަށެވެ. ގުރުއާނަށް ޚާއްސަ ގަދަރެއް ދެވިފައިވާއިރު، ކުޑަކުދިން ގުރުއާނާ ގާތް ކުރުމަށް މަސައްކަތް ކުރަން ޖެހޭ ކަމަށާއި، އެ އިލްމު މުޖުތަމައުގައި ފަތުރަން ޖެހޭ ކަމަށެވެ.
މިނިސްޓަރު ވިދާޅުވީ ހަނދާން އައުކޮށްދިނުމަކީ މުހިންމު ކަމެއް ކަމަށެވެ. އެގޮތުން ދީނީ ތައުލީމު ކުރިއެރުވުމަށް މި ސަރުކާރުން ޚާއްސަ މަސައްކަތްތަކެއް ކުރާ ކަމަށް ވިދާޅުވިއެވެ. ރަސޫލާގެ ހަދީސްތަކަށް އިޝާރަތްކުރައްވައި މިނިސްޓަރު ވިދާޅުވީ ގުރުއާންއަށް ކަމޭހިތައި ގުރުއާނުގައި އަންގަވާފައިވާ ގޮތަށް އަމަލުކުރާނަމަ ގައުމުތައް އުފުލިގެންދާނެ ކަމަށެވެ. އަދި އެއާ ޚިލާފުވާ ކަމަށްވާނަމަ ގައުމުތައް ނެތި ހަލާކުވެގެންދާނެ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ މިފަދަ އެތައް މަންޒަރެއް ދުނިޔެއިން ފެންނަމުންދާ ކަމަށާއި، މިފަދަ ކަންކަމުގައި ވިސްނަންޖެހޭ ކަމަށެވެ.
މީގެ އިތުރުން މިނިސްޓަރު ވިދާޅުވީ ކީރިތި ގުރުއާންގެ އިލްމުގެ ތައުލީމީ ޕްރޮގްރާމްތަކުގައި ހުންނަންޖެހޭ މިނިމަމް ސްޓޭންޑަޑް ލޯންޗު ކުރި ޕްރޮގްރާމުން އެކަނި ވެސް ގުރުއާނަށް އަހައްމިއްޔަތުކަންދޭ މިންވަރު ހާމަވެގެންދާ ކަމަށެވެ. ހަޔާ އެޑިޔުކޭޝަން މިނިސްޓްރީން އިސްވެ އޮވެ ފެށި މިޕްރޮގްރާމްގެ ސަބަބުން އިތުރު ކުރިއެރުމެއް ލިބޭނެ ކަމަށާއި، ތައުލީމް ހާސިލްކުރާ ދަރިވަރުންގެ ފެންވަރު ރަނގަޅު ކުރެވިގެންދާނެ ކަަމަށެވެ. އަދި ދަރިވަރުންގެ ފެންވަރު ފަސޭހައިން ވަޒަން ކުރެވޭނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ މީހުން ބިނާކުރުމާއި، ގާބިލްކަން އިތުރު ކުރުމަކީ މިސަރުކާރުގެ އަމާޒެއް ކަމަށާއި، ލޯންޗްކުރި ޕްރޮގްރާމުން ދީނީ ތައުލީމަށް އެތަކެއް ދަރިވަރުންތަކެއްގެ ލޯ ހޅުވިގެން ދާނެ ކަމަށެވެ.
