އިދިކޮޅު ޕީޕީއެމް-ޕީއެންސީގެ ސިޔާސަތަކީ އަތޮޅުތެރޭގެ ރަށްތައް ފަޅުކުރުން: ޝާހިދު

އިދިކޮޅު ޕީޕީއެމް-ޕީއެންސީގެ ސިޔާސަތަކީ އަތޮޅުތެރޭގެ ރަށްތައް ފަޅުކުރުން ކަމަށް ފޮރިން މިނިސްޓަރު އަދި އދ.ގެ އާންމު މަޖިލީހުގެ ރައީސް އަބްދުﷲ ޝާހިދު ވިދާޅުވެއްޖެއެވެ.

ށ. މަރޮށީގެ އެމްޑީޕީގެ ޖަގަހަ ހުޅުއްވައި ދެއްވައި ޝާހިދު ވިދާޅުވީ، އިދިކޮޅު ސިޔާސީ ޕާޓީގެ ސިޔާސަތަކީ ރަށްރަށުގައި ތިބި ރައްޔިތުން މާލެއަށް ގެނެސް ތޮއްޖެއްސުން ކަމަށާއި، އެރަށްތައް ފަޅުކޮށްލުމަށްފަހު ވިއްކާލުން ކަމަށެވެ. ނަމަވެސް އެމްޑީޕީގެ ވިސްނުމަކީ ރަށްތައް ތަރައްގީކޮށް ޖަޒީރާވަންތަ ދިރިއުޅުމެއްގައި ރައްޔިތުންނަށް ހޯދައިދިނުން ކަމަށް ޝާހިދު ވިދާޅުވިއެވެ. އަދި ރައީސް އިބްރާހިމް މުހައްމަދު ސޯލިހުގެ ސަރުކާރުން ރައްޔިތުންނަށް ގަދަރުވެރި ދިރިއުޅެއް ހޯދައިދިނުމަށް ގިނަ މަސައްކަތްތައް ކުރަމުންދާ ކަމަށާއި، އެގޮތުން ހުރިހާ ރަށެއްގައި އަސާސީ ޚިދުމަތްތައް ރައްޔިތުންނަށް ފޯރުކޮށް ދިނުމަށް މަސައްކަތް ކުރަމުންދާ ކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ ރައީސް އަބްދުﷲ ޔާމީންގެ ވެރިކަމުގައި ރަށްރަށުގެ ރައްޔިތުންނަށް ހެދި ގޮތް ހަނދާން ނުނެތޭ ކަމަށާއި، އިދިކޮޅު ޕީޕީއެމް-ޕީއެންސީގެ ސިޔާސަތަށް ތާއީދު ކުރުމަކީ މޮޔަކަމެއް ކަމަށެވެ.

މަރޮށީގެ އެމްޑީޕީ ޖަގަހަ ބުދަ ދުވަހު ހުޅުއްވައި ދެއްވާފައިވާއިރު، ހުރިހާ އިންތިޚާބެއް ވެސް އެމްޑީޕީން ކާމިޔާބު ކުރަންޖެހޭ ކަމަށް ޝާހިދު ވިދާޅުވިއެވެ. އަދި ވިދާޅުވީ އެމްޑީޕީގެ ސިޔާސަތަކީ ރައްޔިތުންނާއި ގާތް ރައްޔިތުން އެދޭ ސިޔާސަތެއް ކަމަށާއި، އެ ސިޔާސަތު ޕްރޮމޯޓް ކުރަން ޖެހޭ ކަމަށެވެ.

ކޮމަންޑޫ ދާއިރާގެ ބައި އިލެކްޝަންގެ ކެމްޕެއިނަށް ޝާހިދު ކޮމަންޑޫ ދާއިރާއަށް ފުރާވަޑައިގެންނެވީ ބުދަ ދުވަހުގެ ވަގުތެއްގައެވެ. އެމަނިކުފާނުގެ އަރިހުގައި ޑިފެންސް މިނިސްޓަރ މާރިޔާ އަހުމަދު ދީދީގެ އިތުރުން ރައްޔިތުންގެ މަޖިލީހުގެ ބައެއް މެމްބަރުންވެސް ބައިވެރިވެވަޑައިގަންނަވައެވެ.

ފެބްރުއަރީ 5ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ބައި-އިލެކްޝަންގެ ކެމްޕޭން ހަރަކާތްތައް، އިންތިޚާބުތަކާބެހޭ ގާނޫނުތަކާއި ގަވާއިދުގެ ތެރެއިން، ސުލޫކީ މިންގަނޑާ ޚިލާފު ނުވާ ގޮތުގެމަތިން ކުރިއަށް ގެންދިއުމަށް އީސީން ވަނީ އިލްތިމާސްކޮށްފައެވެ. ކެމްޕޭނު ހަރަކާތްތައް ހިންގުމުގައި އެއްވެސް ސިޔާސީ ޕާޓީއަކުން ނުވަތަ އެއްވެސް ކެންޑިޑޭޓަކު ތަމްސީލުކުރާ ފަރާތަކުން އަނެއް ކެންޑިޑޭޓުގެ އިންތިޚާބީ ހައްގަކަށް އުނިކަން އަތުވެދާނެ އެއްވެސް ކަމެއް ކުރުމަކީ މަނާ ކަމެއްކަމަށްވެސް އީސީން ބުނެއެވެ.

ކޮމަންޑޫ ދާއިރާގެ އިންތިޚާބުގައި ވާދަކުރަނީ ތިން ކެންޑިޑޭޓުންނެވެ. އެއީ އެމްޑީޕީގެ ކެންޑިޑޭޓު މުހައްމަދު ރާޝިދާއި ޕީޕީއެމްގެ ކެންޑިޑޭޓް މޫސާ ފަތުހީ އަދި އެމްއެންޕީގެ ކެންޑިޑޭޓް އަބްދުލް ހަންނާނު އިދުރީސްއެވެ.