ދައުވާތައް ތަރުޖަމާކުމަށް ވަގުތު ދިނުމުގެ ގޮތުން ސްރީލަންކާގެ އީސްޓަރ ބޮމުގެ ހަމަލާގެ ޝަރީއަތް މާޗް މަހާ ހަމައަށް މެދުކަނޑާލައިފިއެވެ.

މާޗްމަހު ޝަރީއަތްތައް ކުރިއަށްގެންދާނީ ދައުވާތައް ތަމަޅަ ބަހަށް ތަރުޖަމާ ކުރުމަށްފަހުގައެވެ. މާރޗް މަހު ޝަރީއަތް ކުރިއަށްގެންދާނީ ވަކީލުން ހަމަނުޖެހި ތިބި މީހުންނަށް ވަކީލުންވެސް ހަމަޖެއްސުމަށްފަހުގައެވެ. 2019 ވަނަ އަހަރު ސްރީލަންކާގައި ބޮންތަކެއް ގޮއްވާލައި، 270 މީހުން މަރުވި ހާދިސާގައި 25 މީހެއްގެ މައްޗަށް ދައުވާ އުފުލައި ޝަރީއަތް ފަށާފައިވަނީ މިދިޔަ އަހަރުގެ ނޮވެމްބަރު މަހުއެވެ. އެމީހުންގެ މައްޗަށް 23،000ށް ވުރެ ގިނަ ދައުވާ އުފުލާފައިވެއެވެ.

ނޮވެމްބަރު މަހު ޝަރީއަތް ފެށިއިރު ފުރަތަމަ ކުރިއަށް ގެންގޮސްފައިވަނީ ތިން ހޮޓަލަކަށާއި، ތިން ފައްޅިޔަކަށް އަމާޒުކޮށްދިން މި ހަމަލާއާ ގުޅުން ހުރި ތިން ޝަރީއަތެކެވެ. ޝަރީއަތުގައި ކުރީގެ ނޭޝަނަލް ޕޮލިސް ޗީފް ޕުޖިތް ޖަޔަސުންދަރަގެ މައްޗަށް، ތަކުރާރުކޮ،ށް ހަމަލާއާ ގުޅުންހުރި އިންޓަލިޖެންސް މައުލޫމާތު ލިބިހުރެމެ، އެކަށީގެންވާ ފިޔަވަޅުނޭޅުމުގެ ދައުވާ ވަނީ އުފުލާފައެވެ.

މީގެއިތުރުންވެސް ޖަޔަސުންދަރަގެ މައްޗަށް މުޅި ޖުމްލަ 855 ދައުވާއެއް ވަނީ އުފުލާފާއެވެ. އޭގެތެރޭގައި ގަސްތުގައި މީހުން މަރާލުމާއި މީހުން މަރާލުމަށް މަސައްކަތްކުރުމުގެ ދަޢުވާ ހިމެނެއެވެ. ޖަޔަސުންދަރައާ ދެކޮޅަށް އުފުލާފައިވާ ދަޢުވާތަކަށް، ހެކިންގެ ގޮތުގައި 1215 މީހުން ވަނީ ހުށަހަޅާފައެވެ. އެހެންނަމަވެސް އެހުރިހާ އެންމެން ކޯޓަށް ހާޒިރުކޮށް ސުވާލުކޮށް ހަދާނެކަމަށް ނުބެލެވޭކަމަށް ޖަޔަސުންދަރަގެ ވަކީލު ވަނީ ވިދާޅުވެފައެވެ.

މީގެއިތުރުން ކުރީގެ ޑިފެންސް ސެކެރެޓަރީ ހެމްސާރީ ފެނާންޑޯގެ މައްޗަށްވެސް ވަނީ ހަމަ މިފަދަ ދަޢުވާތަކެއް އުފުލާފައެވެ. ފެނާންޑޯ އަކީ ބޮމުގެ ހަމަލާދިން އިރު ޑިފެންސް މިނިސްޓްރީގެ އިސް އޮފިޝަލެއްގެ ގޮތުގައި މަސައްކަތްކުރަމުންދިޔަ ފަރާތެވެ.

މިހަމަލާއާ ގުޅުގެން ދައުވާ އުފުލާފައިވާ 25 މީހުންގެ މައްޗަށް ކުރާ ދައުވާތަކުގެ ތެރޭގައި، މީހުން މެރުމަށް ރޭވުމާއި، އެކަމަށް އެހީތެރިވުމާއި، ހަމަލާދިނުމަށް މީހުން އެއްކުރުމާއި، ހަމަލާދިނުމަށް ބޭނުންކުރާ ޒާތުގެ ތަކެތި އެއްތަނުން އަނެއްތަނަށް އުފުލުމުގެ ދައުވާ ހިމެނެއެވެ. މީގެތެރޭގައި، މިހަމަލާ ރާވައި ހިންގުމުގައި އެންމެ އިސްކޮށް ހުރި ކަމަށް ސްރީލަންކާގެ އޮފިޝަލުން ތުހުމަތުކުރާ މުޙައްމަދު ނައުފަރުވެސް ހިމެނެއެވެ. މީނާ އަކީ އިސްލާމިކް ސްޓޭޓްއާ ގުޅުން އޮންނަ މީހެއްކަމަށް ލަންކާގެ އޮފިޝަލުން ބުނެއެވެ.

2019 ވަނަ އަހަރުގެ އޭޕްރީލް މަހުގެ 21 ވަނަ ދުވަހު ހަމަލާދީފައިވަނީ ތިން ފައްޅިއަކަށާއި ތިން ހޮޓަލަކަށެވެ. އެއްފަހަރާ ދިން މިހަމަލާތަކުގައި 270 މީހުން މަރުވެފައިވާއިރު، އޭގެތެރެއިން 45 މީހުންނަކީ އެހެން ގައުމުތަކަށް ނިސްބަތްވާ މީހުންނެވެ. މިހަމަލާތަކުގައި 500 މީހުން ވަނީ ޒަޚަމްވެފައެވެ. މިހަމަލާއަކީ ސްރީލަންކާގެ ތާރީޚުގައިވެސް ދިން މިފަދަ ނުރައްކާތެރި ފުރަތަމަ ހަމަލާއެވެ.