ސަލާމަތީ ބާރުތަކުން ކުރިޔަށްގެންދާ އޮޕަރޭޝަނާ ރާއްޖެއަށް ހަތިޔާރު އެތެރެކުރުމުގެ މައްސަލައަކާ ގުޅުމެއްނެތް: ފުލުހުން

ފުލުހުންނާއި ސިފައިން މިހާރު ކުރިޔަށްގެންދާ ޚާއްސަ އޮޕަރޭޝަނާ ގުޅޭގޮތުން ފަތުރަމުންދާ ވާހަކަތަކާ ގުޅިގެން ފުލުހުން އެކަމަށް ޖަވާބުދީފިއެވެ.

ސަލާމަތީ ބާރުތަކުން ގުޅިގެން މާލެ ސަރަހައްދުގައި އޮޕަރޭޝަނެއް ފަށާފައިވަނީ އާދިއްތަ ދުވަހުއެވެ. އެ އޮޕަރޭޝަނަކީ ރާއްޖެއަށް ގޭންގުތައް މެދުވެރިވެގެން އެތެރެކުރި މަސްތުވާތަކެތި ތެރެއިން ރާއްޖެއަށް ހަތިޔާރު އެތެރެވި ކަމުގެ ޖާސޫސީ މައުލޫމާތު ލިބިގެން ހިންގާ އޮޕަރޭޝަނެއްކަމަށް ސަލާމަތީ ޚިދުމަތްތަކުގެ ބައެއް ވެރިންނާ ހަވާލާދީ އަންނަނީ ޚަބަރު ފަތުރަމުންނެވެ. އެކަމާއި ގުޅިގެން ފުލުހުން ބުނީ އެއީ ތެދު މައުލޫމާތެއް ނޫންކަމަށެވެ.

ފުލުހުންނާއި ސިފައިން ގުޅިގެން ހިންގާ އޮޕަރޭޝަނަކީ ރައީސުލްޖުމްހޫރިއްޔާގެ ބެއްލެވުމުގެ ދަށުން އުފައްދާފައިވާ "ގޭންގު ކުށްތައް ހުއްޓުވުމަށް ގައުމީ ފެންވަރުގައި މަސައްކަތްކުރާ ޓާސްކު ފޯސް"ގެ މަސައްކަތްތައް ތަންފީޒުކުރުމުގެ ގޮތުން ކުރިޔަށްގެންދާ ޚާއްސަ އޮޕަރޭޝަނެއްކަމަށް ފުލުހުން ވަނީ ބުނެފައެވެ.

މިއޮޕަރޭޝަނާ ގުޅިގެން ސަލާމަތީ ބާރުތަކުން ގުޅިގެން ނެރުނު ބަޔާނެއްގައި ބުނެފައިވަނީ، ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް މާލޭގެ އަމާންކަމާއި ރައްކާތެރިކަމަށް ޔަގީންކުރުމުގެ ގޮތުން "ގުޅިގެން"ގެ ނަމުގައި ޚާއްސަ އޮޕަރޭޝަނެއް ފަށާފައިވާކަމަށެވެ.

ގޭންގު ކުށްތައް ހުއްޓުވަން ޓާސްކް ފޯހެއް އުފެއްދީ، ރައީސް އިބްރާހިމް މުހައްމަދު ސޯލިހް ޗެއާކުރައްވާ ގޮތަށް، މަސްތުވާތަކެއްޗާ ދެކޮޅަށް ގައުމީ ޓާސްކް ފޯހެއް އެކުލަވާލުމަށްފަހުއެވެ.