130 ކިލޯ ޑްރަގް މައްސަލަ: ޝަހީބުގެ ފަރާތުންވެސް ދިފާއީ ހެކި ހުށައަޅައިފި
11 ޖެނުއަރީ 2022 | އަންގާރަ 05:51މަސްތުވާތަކެތި އެތެރެކުރީ ދިވެހިންގެ ބަޔަކު ބޭރުގެ ބަޔަކާއި ގުޅިގެން
ކަނޑުމަގުން ރާއްޖެއަށް އެތެރެކުރި 130 ކިލޯގެ މަސްތުވާތަކެތީގެ މައްސަލާގައި އިސްކޮށް އުޅުނުކަމުގެ ތުހުމަތުވާ ޝަހީބު އިބްރާހިމް
ދިވެހިންގެ ބަޔަކު ބޭރު ބަޔަކާ ގުޅިގެން ރާއްޖެއަށް އެތެެރެކުރި ކަމަށް ތުހުމަތު ކުރެވޭ 130 ކިލޯގެ މަސްތުވާތަކެތީގެ މައްސަލަައިގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި އަންގާރަ ދުވަހު އެންމެ ފުރަތަމަ ކުރިއަށް ގެންގޮސްފައިވަނީ މި މައްސަލަައިގައި ދައުލަތުން ދައުވާކޮށްފައިވާ މީހުންގެ ތެރެއިން މި މައްސަލައިގައި އިސްކޮށް އުޅުނު ކަމުގެ ތުހުމަތުވާ 2 މީހުންގެ ތެރެއިން ހއ. ހޯރަފުށި، ވައިލެޓްވިލާ،އަހްމަދު މޫސާގެ ބައެވެ. އެއަށްފަހު ގއ. ވިލިނގިލި، ލައިޓްހައުސް، ޝަހީބް އިބްރާހިމްގެ މައްޗަށް ކުރާ ދައުވާގެ ބައި ވަނީ ވަކިން ކުރިއަށް ގެންގޮސްފައެވެ.
މި މައްސަލައިގައި އެންމެ ފަހުން ބޭއްވި އަޑުއެހުމުގައި ދައުލަތުން ވަނީ ޝަހީބާ ދެކޮޅަށް ހެކި ހުށައަޅުއްވާފައެވެ. އަދި ލިއުމުން ހެކި ހުށައެޅުމަށް އެ އަޑުއެހުމުގައި ޝަހީބަށް 10 ދުވަހުގެ މުއްދަތެއް އޭރު ދެއްވާފައިވެއެވެ. އަންގާރަ ދުވަހު ވަނީ އެ ހެކިތައް ތަފްސީލީ ގޮތެއްގައި ހުށައަޅުއްވާފައެވެ.
ދިފާއީ ހެކިންގެ ގޮތުގައި ޝަހީބުގެ ފަރާތުން ވަނީ ދޯނިން މަސްތުވާތަކެތި ފެނުމުގައި އޭނާގެ އެއްވެސް ބައިވެރިވުމެއް ނެތްކަން ސާބިތު ކުރުމަށް ހެކި ހުށައަޅާފައެވެ. އަދި އެކަމާއި ގުޅިގެން ހުށައެޅި ހެކިންގެ އިތުރުން، ކިތާބީ ހެކިވެސް އޭނާ ހުށައަޅާފައިވެއެވެ. އެ މަސްތުވާތަކެއްޗަކީ އަސީލް މާހިރު ކަނޑުމަތިން ހޮވި ތަކެތިކަމަށާއި، ޝަހީބާއި ގުޅުމެއް ނެތްކަމަށް އަސީލް ބުނާ ބުނުން ދިފާއުން ފާހަގަ ކުރެއެވެ.
ގާޒީ ވަނީ ދެން އޮންނަ އަޑުއެހުމެއްގައި މިއީ މަދަނީ މިންގަނޑުން ކުރިއަށް ގެންދެވޭނެ ދައުވާއެއްކަމަށް ކަނޑައަޅުއްވާނެކަމަށް ވިދާޅުވެފައެވެ. އެގޮތުން ޖެނުއަރީ 30 ގައި މައްސަލައިގެ އަޑުއެހުމެއް އޮންނާނެކަމަށް މައްސަލަ ބައްލަވާ ގާޒީ ވިދާޅުވިއެވެ.
ކްރިމިނަލް ކޯޓުގައި މި މައްސަލަ ކުރިއަށް ގެންދަވަނީ އިސްގާޒީ އަހުމަދު ޝަކީލެވެ.
