މިދިޔަ އަހަރު ފަނޑިޔާރުންގެ ސުލޫކީ މައްސަލައިގެ ގޮތުގައި 400ށްވުރެ ގިނަ މައްސަލަ ހުށައެޅިފައިވާކަމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ބުނެފިއެވެ.

ޖޭއެސްސީން ބުނީ، 2021 ވަނަ އަހަރު ފަނޑިޔާރުންގެ ސުލޫކީ މައްސަލައިގެ ގޮތުގައި ޖުޑީޝަލް ސާރވިސް ކޮމިޝަނަށް ހުށަހެޅިފައިވަނީ 404 މައްސަލަ ކަމަށެވެ. އޭގެ ތެރެއިން މައްސަލަ ބެލުމާމެދު ގޮތެއް ނިންމާ ކޮމިޓީން 395 މައްސަލަ ނިންމާފައިވެއެވެ. އަދި 2022 ވަނަ އަހަރު ފެށިގެން ދިޔައިރު ކޮމިޓީގައި ގޮތެއް ނުނިމި އޮތީ 42 މައްސަލަ ކަމަށް ޖޭއެސްސީން މައުލޫމާތު ދެއެވެ. އޭގެ ކުރިން 2020 އަހަރު ނިމުނުއިރު، ފަނޑިޔާރުންނާ ގުޅޭގޮތުން ހުށަހެޅި މައްސަލަތަކުގެ ތެރެއިން މައްސަލަ ބެލުމާމެދު ގޮތެއް ނިންމާ ކޮމިޓީގައި ގޮތެއް ނުނިމި އޮތީ 33 މައްސަލައެވެ.

އޭގެ އިތުރުން، 2020 ޑިސެންބަރުގެ ނިޔަލަށް ތަހުގީގު މަރުހަލާގައި ނުނިމި އޮތީ 62 މައްސަލަކަމަށް ޖޭއެސްސީން މައުލޫމާތު ދެއެވެ. އަދި 2021 ވަނަ އަހަރު 26 މައްސަލައެއް ތަހުގީގު ކުރުމަށް ނިންމާފައިވާއިރު، ތަހުގީގު ކުރުމަށް 2021 ގައި ކޮމިޓީއާ ހަވާލުކުރި މައްސަލައިގެ އަދަދަކީ 26 ކަމަށްވެސް ޖޭއެސްސީން މައުލޫމާތު ދެއެވެ.

2021 ވަނަ އަހަރު ނިމުނުއިރު ޖޭއެސްސީން ވަނީ 33 މައްސަލަ ތަހުގީގުކޮށް ނިންމާފައެވެ. އަދި ތަހުގީގު ނުނިމި އޮތީ 55 މައްސަލަ އެވެ.

ފަނޑިޔާރުންނާއި ގުޅިގެން ހުށައެޅިފައިވާ މައްސަލަތަކަށް ބަލާއިރު، 2021 ވަނަ އަހަރު ފަނޑިޔާރުކަމުން ވަކިކުރުމަށް ރައްޔިތުންގެ މަޖިލީހަށް ހުށަހަޅާފައިވަނީ 01 ފަނޑިޔާރެއްގެ މައްސަލަ އެވެ. އެއީ ކްރިމިނަލް ކޯޓިގެ ގާޒީ އިސްމާއިލް ރަޝީދުކަމަށް ޖޭއެސްސީން މައުލޫމާތުދެއެވެ. އެގޮތުން ކުރީގެ ނާއިބުރައީސް އަހުމަދު އަދީބުގެ މައްޗަށް އުފުލި 7 ދައުވާއެއް ކްރިމިނަލް ކޯޓަށް ހުށަހެޅުމުގެ ކުރިން ވެސް އެ ދައުވާތަކުގެ ނިންމުން ކްރިމިނަލް ކޯޓުގެ ގާޒީ އިސްމާއިލް ރަޝީދު އޮތީ ލިޔެފައި ކަމަށް ޖޭއެސްސީގެ ތަހުގީގުން ދައްކާކަން އޭރު ފާހަގަކޮށްފައިވެއެވެ.

އޭގެ އިތުރުން، ގާޒީ އިސްމާއިލް ރަޝީދު ބޭނުން ކުރުމަށް ކޮމްޕިއުޓަރ ސިސްޓަމެއް ކްރިމިނަލް ކޯޓުގައި ހުންނައިރު ކޯޓުގައި ހިންގާ ގަޒިއްޔާތަކެއްގެ ލިޔެކިއުންތައް ޕެންޑްރައިވެއްގައި ގެންގުޅުމާއި، އަދި ވަކިން ޚާއްސަކޮށް ވަކި ގަޒިއްޔާތަކެއްގެ ލިޔެކިއުން އެކަނި އެ ޕެންޑްރައިވްގައި ހުރުމާއި، ގަޒިއްޔާތަކެއްގެ ދައުވާ ހުށަހެޅުމާ ހަމައަށް ވެސް ނުދަނީސް އެ ގަޒިއްޔާތައް ނިންމާނެގޮތުގެ ފައިލް އެ ޕެންޑްރައިވްގައި ތައްޔާރުވަމުން ދިއުންފަދަ މައްސަލަތައް އެކަމާއި ގުޅިގެން ޖޭއެސްސީން ފާހަގަކޮށްފައިވެއެވެ.

މަގާމުން ވަކި ކުރުން ފިޔަވައި އިތުރު ސުލޫކީ ފިޔަވަޅު 14 ފަނޑިޔާރުންގެ މައްޗަށް އަޅާފައިވެއެވެ. އަދި ސުލޫކީ މައްސަލަ ސާބިތުނުވާކަމަށް 18 މައްސަލައެއް ނިންމާފައިވެއެވެ.