ސަލާމަތީ ޚިދުމަތްތަކުން ހިންގަމުންދާ އޮޕަރޭޝަނުގައި ބަޔަކު ހައްޔަރުކުރިކަން ހާމަކުރަން ދެކޮޅު ހަދައިފިއެވެ.
ރައްޔިތުންގެ ސަލާމަތާއި ރައްކާތެރިކަން ކަށަވަރުކޮށް، މާލޭގެ އަމާންކަމާއި، ރައްކާތެރިކަން ޔަގީންކުރުމުގެ ގޮތުން ފުލުހުންގެ އެދުމުގެ މަތިން މޯލްޑިވްސް ނޭޝަނަލް ޑިފެންސް ފޯސްގެ އެހީތެރިކަމާއެކު "ގުޅިގެން" މި ނަމުގައި ޚާއްސަ އޮޕަރޭޝަނެއް ފަށާފައިވާކަން ރާއްޖޭގެ ސަލާމަތީ ބާރުތަކުން ވަނީ ހާމަކޮށްފައެވެ.
މި އޮޕަރޭޝަން އާދިއްތަ ދުވަހު ފަށާފައިވާއިރު، މި އޮޕަރޭޝަނުގައި އެއްވެސް ބަޔަކު ހައްޔަރުކޮށްފައިވާކަމެއް އަދި ހައްޔަރުކުރީ ކިތައް މީހުންކަން ހާމަކުރަން ސަލާމަތީ ބާރުތަކުން ވަނީ ދެކޮޅު ހަދާފައެވެ. އަދި މިއީ ސީދާ ކޮންކަމަކާ ގުޅިގެން ހިންގާ އޮޕަރޭޝަނެއްކަންވެސް ހާމަކޮށްފައެއް ނުވެއެވެ.
މައުލޫމާތު ލިބޭގޮތުގައި މި އޮޕަރޭޝަނުގައި އާދިއްތަ ދުވަހުގެ ރޭ ގިނަ ބަޔަކު ހައްޔަރުކޮށްފައިވެއެވެ. މި އޮޕަރޭޝަން ހިންގާފައިވަނީ މާލޭގެ ގޭންގުތައް ހަރަކާތްތެރިވާ ސަރަހައްދުތަކުގައި ކަމަށްވެސް މައުލޫމާތު ލިބިފައިވެއެވެ. އަދި މިއީ ޓެރަރިޒަމްގެ ނުރައްކަލެއް އޮވެގެން ހިންގި އޮޕަރޭޝަނެއް ކަމަށްވެސް ވަނީ މައުލޫމާތު ލިބިފައެވެ.
މިދިޔަ އަހަރުގެ މެދުތެރޭގައިވެސް ސަލާމަތީ ބާރުތަކުން ވަނީ މިފަދަ އޮޕަރޭޝަނެއް ހިންގާފައެވެ. އެއީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް މެއި ވަނަ ދުވަހުގެރޭ ދިން ހަމަލާއާއި ގުޅިގެންނެވެ. މި ހަމަލާއާއި ގުޅިގެން ހަރުކަށި ފިކުރާ ދެކޮޅަށް ހިންގި އޮޕަރޭޝަނުގައި ރާއްޖޭގެ އެކި ކަންކޮޅުތަކުން ގިނަ ބަޔަކު ހައްޔަރުކޮށްފައިވެއެވެ. މީގެ އިތުރުން މި ހަމަލާއާއި ގުޅިގެން ޖަލުތަކުގައިވެސް ވަނީ ޚާއްސަ އޮޕަރޭޝަނެއް ކުރިއަށްގެންގޮސްފައެވެ.
