ގދ. ތިނަދޫ ސިނާއީ ސަރަހައްދުގެ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއު އެމްޓީސީސީއާ ޙަވާލުކޮށްފިއެވެ.

މި މަސައްކަތް އެމްޓީސީސީއާ ޙަވާލު ކޮށްފައިވަނީ އާދިއްތަ ދުވަހު މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ ގައި ބޭއްވި ރަސްމިއްޔާތެއްގައެވެ. މި މަޝްރޫއުގައި މިނިސްޓްރީގެ ފަރާތުން ސޮއި ކުރެއްވީ ޑިރެކްޓަރ ޖެނެރަލް އަހުމަދު ތޮލްޙަތުއެވެ. އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ އާދަމް އާޒިމްއެވެ.

މި މަސައްކަތް ޙަވާލު ކޮށްފައިވަނީ 660 ދުވަހުގެ މުއްދަތެއްގައި ނިންމާ ގޮތަށެވެ. އަދި މަސައްކަތުގެ އަގަކީ 125,222,284.38 (ސަތޭކަ ފަންސަވިސް މިލިއަން ދެލައްކަ ބާވީސްހާސް، ދުއިސައްތަ އައްޑިހަ ހަތަރު ރުފިޔާ ތިރީސް އަށް ލާރި) އަށެވެ.

މި މަޝްރޫޢުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކާއި ގުޅޭގޮތުން މިނިސްޓްރީން ބުނީ، 219,595 އަކަމީޓަރުގެ ބިން ހިއްކުމާއި، 1336 މީޓަރުގެ ރިވެޓްމެންޓް ޖެހުމާއި، ހުޅަނގު ދެކުނު ފަރާތުގައި 468 މީޓަރ ރިވެޓްމެންޓް ޖެހުމާއި، 284 މީޓަރ އެއްގަމު ތޮށި ޖެހުމުގެ އިތުރުން، 01 ކޮންކްރީޓް ބްރިޖް އެޅުން ހިމެނޭ ކަމަށެވެ.

ތިނަދޫގައި މިހާރުވެސް އިތުރު މަޝްރޫއުތަކެއް އެމްޓީސީސީން ކުރިއަށް ގެންދެއެވެ. އެގޮތުން ގދ. ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލުގެ ޖާގަ އިތުރު ކުރުމަށާއި މަރާމާތު ކުރުމަށް ކުރިއަށް ގެންދާ މަޝްރޫޢުގެ މަސައްކަތްވެސް ކުރަމުންދަނީ އެމްޓީސީސީންނެވެ. އެ މަސައްކަތުގެވެސް 60 އިންސައްތައަށްވުރެ ބޮޑުބައި މިހާރު އެ ކުންފުނިން ވަނީ ނިންމާފައެވެ. ޑރ.އަބްދުއްސަމަދު މެމޯރިއަލް ހޮސްޕިޓަލް މަރާމާތު ކުރުމުގެ މަސައްކަތުގެ ދަށުން އޯޕީޑީ ސަރަޙައްދާއި، އިމަރޖެންސީ ރޫމާއި، ލޭބަރ ރޫމްގެ އިތުރުން ޕްރައިވެޓް ރޫމްތައް ބޮޑުކުރުމަށް ހަމަޖެހިފައިވެއެވެ. މި މަސައްކަތް އެމްޓީސީސީއާ ހަވާލުކޮށްފައިވަނީ 33.5މިލިއަން ރުފިޔާއަށެވެ.

މި ހޮސްޕިޓަލްގެ މަރާމާތު ކުރުމުގެ މަސައްކަތް އެމްޓީސީއާއި ހަވާލުކޮށްފައިވަނީ 2019 އަހަރުގެ އޮކްޓޯބަރު މަހުގެ 30ވަނަ ދުވަހުއެވެ.