މިއަހަރުގެ ޓޮޕް މާކެޓަށް ރަޝިއާ އަރައިފި

2022 ވަނަ މިހާތަނަށް ރާއްޖެ އައި ފަތުރުވެރިންގެ ތެރެއިން އެންމެ ގިނަ ފަތުރުވެރިން އައިސްފައިވަނީ ރަޝިއާ މާކެޓުން ކަމަށް ޓޫރިޒަމް މިނިސްޓްރީން ހާމަކޮށްފިއެވެ.

ޓޫރިޒަމް މިނިސްޓްރީން ވަނީ އަހަރުގެ ފުރަތަމަ 5 ދުވަހު ރާއްޖެ އައި ފަތުރުވެރިންގެ ތަފާސްހިސާބުތައް އާންމުކޮށްފައެވެ. ޓޫރިޒަމް މިނިސްޓްރީން ބުނީ އަހަރުގެ ފުރަތަމަ ފަސް ދުވަހު 24،527 ފަތުރުވެރިން ރާއްޖެ އައިސްފައިވާކަމަށެވެ. މީގެ ތެރޭގައި ރަޝިއާއަށް ނިސްބަތްވާ 6،700 ފަތުރުވެރިން ހިމެނެއެވެ.

މިއާއެކު މިއަހަރުގެ ޓޮޕް މާކެޓުގެ ގޮތުގައިވެސް އޮތި ރަޝިއާ މާކެޓެވެ. އަހަރުގެ ފުރަތަމަ 5 ދުވަހު އައި ފަތުރުވެރިންގެ 27.3 އިންސައްތަ ހިއްސާކުރަނީ ރަޝިއާ މާކެޓު ކަމަށް ޓޫރިޒަމް މިނިސްޓްރީން ބުނެފައިވެއެވެ. ދެވަނައިގައި އިޓަލީ އޮތްއިރު އިޓަލީން 3،162 ފަތުރުވެރިން އައިސްފައިވެއެވެ. އަދި ޖަރުމަނުން އައިސްފައިވަނީ 1،665 ފަތުރުވެރިންނެވެ.

ކޮވިޑް-19ގެ ހާލަތުގެ ކުރިން 2019 ވަނަ އަހަރު ރާއްޖޭގެ ޓޮޕް މާކެޓުތަކުގެ ތެރޭގައި ހިމެނެނީ ޗއިނާ، އިންޑިއާ އަދި އިޓަލީއެވެ.

މިއަހަރުގެ މިހާތަނަށް 24،527 ފަތުރުވެރިން ރާއްޖެ އައިސްފައިވާއިރު، މިއީ 2021 ވަނަ އަހަރާ އަޅާ ބަލާއިރު 56.4 އިންސައްތައިގެ ކުރިއެރުމެކެވެ. 2021 ވަނަ އަހަރުގެ މި މުއްދަތުގައި ރާއްޖެ އައިސްފައިވަނީ 15،680 ފަތުރުވެރިންނެވެ. މިއަހަރު ދުވާލެއްގެ މައްޗަށް 4،905 ފަތުރުވެރިން އައިސްފައިވެއެވެ. އަދި 9 ދުވަހު ރާއްޖޭގައި މަޑުކުރާކަމަށް ވަނީ ރެކޯޑްކުރެވިފައެވެ. މިއީ 2020 ވަނަ އަހަރު އަދި 2021 ވަނަ އަހަރާ އަޅާ ބަލާއިރުވެސް އިތުރު އަދަދެކެވެ.

ޓޫރިޒަމް މިނިސްޓްރީން ބުނީ ޓޫރިސްޓް އެކޮމޮޑޭޝަން ފެސިލިޓީތަކުގެ ތެރެއިން 930 ފެސިލިޓީއެއް މިވަގުތު ޚިދުމަތަށް ހުޅުވާލާފައިވާކަމަށެވެ. މީގެ ތެރޭގައި ހިމެނެނީ 161 ރިސޯޓާއި، 624 ހޮޓެލް އަދި ގެސްޓްހައުސްގެ އިތުރުން 145 ސަފާރީއެކެވެ. މި 930 ފެސިލިޓީގައި ޖުމްލަ 53،166 ބެޑް ކެޕޭސިޓީ އެބަހުރި ކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ.

2021 ވަނަ އަހަރު ނިމުނުއިރު ޖުމްލަ 1،321،932 ފަތުރުވެރިން ރާއްޖެ އައިކަމަށް ވަނީ ރެކޯޑްކޮށްފައެވެ. 2021 ވަނަ އަހަރު ދުވާލެއްގެ މައްޗަށް 3،622 ފަތުރުވެރިން އައިސްފައިވާއިރު، 8 ރޭ ރާއްޖޭގައި މަޑުކޮށްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ. މިދިޔަ އަހަރު ނިމުނުއިރު އެންމެ ގިނަ ފަތުރުވެރިން އައީ އިންޑިއާ މާކެޓުންނެވެ. މިދިޔަ އަހަރު އައި ފަތުރުވެރިންގެ 22.1 އިންސައްތަ އިންޑިއާ މާކެޓުން ވަނީ ހިއްސާކޮށްފައެވެ. ދެވަނައިގައި ރަޝިއާ އޮތްއިރު ރަޝިއާއިން އައި ފަތުރުވެރިން ވަނީ 16.8 އިންސައްތަ ހިއްސާކޮށްފައެވެ. ލިސްޓުގެ ތިންވަނައިގައި ޖަރުމަނު އޮތްއިރު ޖަރުމަނު ފަތުރުވެރިން ވަނީ 7.2 އިންސައްތަ ހިއްސާކޮށްފައެވެ. މި ތިން ގައުމުގެ އިތުރުން ޓޮޕް މާކެޓްތަކުގެ ތެރޭގައި ހިމެނެނީ ޔޫކޭ، ޔޫއެސް، ސައުދި އަރަބިއާ. ސްޕެއިން، ޔޫކްރެއިން، ފްރާންސް އަދި އިޓަލީއެވެ.