ރާއްޖޭގެ 5 ސަރަހައްދުގައި ތަރައްގީކުރާ ޓާޝަރީ ހޮސްޕިޓަލުތަކުގެ ބަދަލުގައި އައިޖީއެމްއެޗާ އިންވެގެން މި ސަރުކާރުން ވެސް ޓަވަރެއް އެޅިދާނެ ކަމަށާއި، ނަމަވެސް އެކަމުގެ ސަބަބުން އައިޖީއެމްއެޗްގެ ކިއު ދިގުވެ ރައްޔިތުންނަށް ވާނީ ބުރަކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ކޮމަންޑޫ ދާއިރާއަށް އެމްޑީޕީން ވާދަކުރައްވާ ކެންޑިޑޭޓް ތައާރަފްކުރުމަށްޓަކައި ބޭއްވި ޖަލްސާގައި ރާއްޖޭގެ ސިއްހީ ނިޒާމާއި ގުޅޭ ގޮތުން ވާހަކަފުޅުދައްކަވަމުން ރައީސް ވިދާޅުވީ, ސިއްހީ ނިޒާމް ތަރައްގީކުރުމަށްޓަކައި އެކިއެކި ރަށްރަށުގެ ސިއްހީ މަރުކަޒުތައް ތަރައްގީކޮށް 5 ޓާޝަރީ ހޮސްޕިޓަލު އެޅުމުގެ މަސައްކަތް ބާރަށް ކުރިއަށްދާ ކަމަށެވެ.
ސިއްހީ ދާއިރާއަކީ ރާއްޖޭގައި ތަރައްގީކުރަން ޖެހިފައި އޮތް އެންމެ މުހިންމު އެއް ދާއިރާ ކަމަށާއި، މިކަން ފަސޭހައިން، ކައިރިން ރައްޔިތުންނަށް ފޯރުކޮށްދިނުމަށްޓަކައި 5 ހޮސްޕިޓަލެއްގެ މަސައްކަތް ސަރުކާރުން ކުރަމުން އަންނަ ކަމަށެވެ. އަދި އެ 5 ހޮސްޕިޓަލަށް ކުރާ ޚަރަދު އެއްކޮށްލާފައި އެމަނިކުފާނަށް ވެސް އައިޖީއެމްއެޗް ކައިރީގައި އިތުރު ޓަވަރެއް ނެގިދާނެ ކަމަށާއި، އެއީ އެއްވެސް ކަމެއް ނޫން ކަމަށެވެ.
އަދި މައްޗަށް އެއާ ދިމާލަށް ބަލަން ވެސް އިނދެވިދާނެ. އަޅުގަނޑަށް އެތަނަށް ޑޮކްޓަރުން ވެސް ލެވިދާނެ. ޚިދުމަތްތައް ވެސް ލެވިދާނެ. ވިސްނާލަންވީ އެއިން މާލޭގައި ދިރިއުޅުއްވާ ރައްޔިތުންނަށާއި، ރަށްރަށުގެ ރައްޔިތުންނަށް ކުރާނީ ކޮން ފައިދާއެއްތޯ. އެއިން ހަމައެކަނި ވާނެކަމަކީ އައިޖީއެމްއެޗްގެ ކިއު ދިގުވުން. ކުރަންޖެހޭ ދަތުރަކަށް ވަގުތަކަށް ބަދަލެއް ނާދޭ. އޭގެ ބަދަލުގައި އާސަންދައަށް ކުރާ ބާރުބޮޑުވެގެންދާނެ. ކުރަންވީ ކަމަކީ ލާމަރުކަޒުކޮށް އެކި ސަރަހައްދުން މި ޚިދުމަތްތައް ލިބޭނެ ގޮތް ހެދުން. އަޅުގަނޑުމެން ކުރަން ނުކުމެ މިތިބީ އެ ކަންތައްތައް.ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު
ރައީސް ވިދާޅުވީ މިއަހަރުގެ ރޯދައިގެ ކުރިން އައު 4 މިސްކިތް ހުޅުވިގެންދާނެ ކަމަށެވެ. މިހާތަނަށް މި ސަރުކާރުން 25 ރަށެއްގެ ބަނދަރު ހަދާ ނިންމައި، 39 ރަށުގެ މަސައްކަތް ކުރިއަށްދާ ކަމަށެވެ. އަދި 13 ރަށެއް ކޮންޓްރެކްޓް ކުރެވި 29 ރަށެއްގެ މަސައްކަތް ޓެންޑަރގައި އެބައޮތް ކަމަށެވެ.
ރައީސް ވިދާޅުވީ މިއަހަރުގެ ބަޖެޓުގައި އިތުރު 22 ރަށެއްގެ ބަނދަރު ހެދުމަށް ބަޖެޓް ކުރެވިފައިވާ ކަމަށާއި، ހަމައެކަނި މި ކަންތަކަށް ބެލިނަމަވެސް، މި ސަރުކާރުގެ މަންޒަރު ވަރަށް ތަފާތުވާނެ ކަމަށެވެ.
މިހާތަނަށް މިވީ 3 އަހަރުތެރޭގައި 27 ބިލިއަން ރުފިޔާގެ ޕީއެސްއައިޕީ ޕްރޮޖެކްޓުގައި ސޮއިކޮށް އޭގެ ތެރެއިން 15 ބިލިއަން ރުފިޔާ ހޭދަކޮށްފިން. މީގެ އިތުރުންވެސް ރަށްރަށުގެ ތަރައްގީއަށްޓަކައި ގިނަ މަސައްކަތްތަކެއް ކުރެއްވެމުން އެބަދޭ. ސްކޫލްތަކުގެ ޖާގައިގެ ދަތިކަން ހައްލުކޮށް، ޕްރިންސިޕަލުން ތަމްރީނުކޮށް، ރަނގަޅު ޓީޗަރުން ހޯދަން، ރަށުގައި ތިބެގެން ދަރިންނަށް ރަނގަޅު ތައުލީމު ލިބޭނެ ގޮތެއް ހޯދަމުން އެބަ ދަން. ގައިން ތާހިރުވުމަށްޓަކައި ފެނާއި ނަރުދަމާ ނިޒާމް ގާއިމް ކުރުމަށް މިހާރު ވަނީ ހުރިހާ ރަށެއްގެ ކޮންޓްރެކްޓް އެކިއެކި ފަރާތްތަކާއި ހަވާލުކޮށް ނިންމާފަ. ކުޅިވަރު ކުޅޭނެ އެތައް ދަނޑެއް އެތައް ކޯޓެއް އެތައް ޖިމްތަކެއް އެ ގެންދަނީ އަޅަމުން.ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު
ރައީސް ވިދާޅުވީ މި ޒަމާނުގައި ސަރުކާރެއް އުފެދޭ އެންމެ ބޮޑު އަސާސަކީ މެނިފެސްޓޯއެއް ކަމަށެވެ. ރައްޔިތުން އެންމެ ބޮޑަށް އެދޭ ކަންކަމުގެ ވައުދު ނާމާއެއް ކަމަށާއި، އެމްޑީޕީން ވެރިކަމަށް އައިސް މިތިބީ އެފަދަ ވައުދުނާމާއެއް ހިފައިގެން ކަމަށެވެ. ރައީސް ވިދާޅުވީ އެމްޑީޕީގެ އެޖެންޑާ 19ން މަޖިލީހުގެ ސާފު މެޖޯރިޓީ ހޯދީވެސް ވައުދުތަކާއެކީގައި ކަމަށާއި، މިއަދު ކުރަމުން މިދަނީ އެ ވައުދުތައް ފުއްދުމުގެ މަސައްކަތް ކަމަށެވެ.
މިދާއިރާއަށް ވާދަކުރައްވާ އެހެން ޕާޓީތަކުގެ ބޭފުޅުންނަށް އަޅުގަނޑު ދަންނަވަން އޮތީ މަޑުކޮށްލައްވާށޭ. އިހަށް މަޑުކޮށްލައްވާށޭ. އަޅުގަނޑުމެން ވެގެން އައި ވައުދުތަކެއް އެބަހުރި. މިދަނީ ބަރާބަރަށް އެ ވައުދުތައް ފުއްދަމުން. މިކަން ކުރެވޭނީ މި އެމްޑީޕީއަށް. ލާމަރުކަޒީ ނިޒާމް ރާއްޖެއަށް ތައާރަފްކޮށް ޚިދުމަތްތައް ރައްޔިތުންނާ ވީހާވެސް ގާތުން ދިނުމަކީ އެމްޑީޕީގެ ފަލްސަފާއެއް. އެއީ އެމްޑީޕީގެ ވައުދެއް އަދި އެމްޑީޕީގެ ފިކުރެއް. މިހެންވެ މި ދަންވަނީ މިކަން ކުރެވޭނީ އެމްޑީޕީއަށޭ. މި ދާއިރާގެ ހުރިހާ ރައްޔިތުންނަށް އަޅުގަނޑުމެން މި އިލްތިމާސްކުރަނީ މިކަމަށްޓަކައި، އަދި މުޅި ރާއްޖެ ތަރައްގީކުރުމަށްޓަކައި އަޅުގަނޑުމެންވީ ވައުދުތަކަށް، މި ދާއިރާ ތަރައްގީކުރުމަށްޓަކައި އެމްޑީޕީގެ ކެންޑިޑޭޓަށް ވޯޓުދެއްވާ.ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު
ރައީސް ވިދާޅުވީ ފާއިތުވި 3 އަހަރަކީ މި ދާއިރާގެ ރަށްތައް ނުދެކޭފަދަ ތަރައްގީގެ 3 އަހަރުކަމާމެދު އެއްވެސް ބޭފުޅަކު ޝައްކު ނުކުރައްވާނެ ކަމަށެވެ. މަޝްރޫއުތައް ކުރިއަށް ގެންދިއުމަށްޓަކައި މަޖިލީހުގައި އިންނަވާ ބޭފުޅަކީ ސަރުކާރަށް ތާއީދުކުރާ ފަރާތަކަށް ވާންޖެހޭ ކަމަށާއި، ލާމަރުކަޒީ އުސޫލުން ރާއްޖެ ތަރައްގީކޮށް ކައިރިން ޚިދުމަތްތައް ދޭން ބޭނުންވާއިރު، މަޖިލީހުގައި އެ ފިކުރު ބޭނުންވާ ކަމަށެވެ. އަދި މިއާ އިދިކޮޅު ފިކުރުގެ ބަޔަކު މި ދާއިރާއިން އިންތިޚާބުކޮށްފިނަމަ އުނދަގޫވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ އެމްޑީޕީއާ ވާދަކުރައްވާ ބޭފުޅުންގެ ފިކުރަކީ މަރުކަޒީ ނިޒާމެއް ގާއިމް ކުރުން ކަމަށާއި، އެއްތަނަކަށް މީހުން ޖަމާކޮށް ޚިދުމަތްތައް ޖަމާކުރުން ކަމަށެވެ. އަދި މިއީ މި ރާއްޖެ ތަރައްގީ ކުރެވޭނެ ގޮތެއް ނޫން ކަމަށް ރައީސް ވިދާޅުވިއެވެ.
