އޮމިކްރޯން އާއެކު އެމެރިކާގެ ހޮސްޕިޓަލްތަކަށް ބާރު ބޮޑުވެފައި

އޮމިކްރޯން ވޭރިއަންޓާއެކު އެމެރިކާގެ ހޮސްޕިޓަލު ތަކުގައި އެޑްމިޓްކުރާ މީހުންގެ އަދަދު އިތުރުވެފައި ވާކަމަށް ރޮއިޓަރސް ޓެލީން ހާމަވެއްޖެއެވެ.

އޮމިކްރޯން ވޭރިއަންޓާއެކު އެމެރިކާގައި ކޮވިޑް ޖެހޭ މީހުންގެ އަދަދު ވަނީ ރިކޯޑް މިންވަރަކަށް މަތިވެފައެވެ. ޑިސެމްބަރު މަހުގެ ފަހުކޮޅުން ފެށިގެން އެމެރިކާގެ ހޮސްޕިޓަލްތަކުގައި އެޑްމިޓްކުރާ މީހުންގެ އަދަދު ވަނީ އިތުރުވާން ފަށާފައެވެ. އަދި ގިނަ ހިސާބުތަކުގައި ޑެލްޓާ ވޭރިއަންޓަށްވުރެ ގިނައިން އޮމިކްރޯން ވޭރިއަންޓް އަންނަނީ ފެންނަމުންނެވެ.

އެމެރިކާގެ ސެންޓަރ ފޮރ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ)ން ބުނާގޮތުގައި އެމެރިކާއަށް އޮމިކްރޯން ވޭރިއަންޓާއެކު މިހާރު ކުރިމަތިވެފައިވާ ސަރޖުގައި އަދި ޕީކާ ހިސާބަކަށް ނުދެއެވެ. އެމެރިކާގައި ބުރާސްފަތި ދުވަހު ވަނީ 662،000 މީހުންނަށް ކޮވިޑް ޖެހިގެން ރިޕޯޓްކޮށްފައެވެ. އޭގެ ތިން ދުވަސްކުރިން މިލިއަނަކާ ގާތްކުރާ އަދަދަކަށް މީހުންނަށް އެގައުމުގައި ވަނީ ކޮވިޑް ޖެހިފައެވެ.

ކޮވިޑް ޖެހިގެން ހޮސްޕިޓަލްތަކުގައި އެޑްމިޓްކުރި މީހުންގެ އަދަދު ވަނީ 123،000ށް އަރާފައެވެ.