ހދ. ވައިކަރަދޫން ދަނޑުވެރިކަމަށް ބިން ދޫކުރަން ހަމަޖެހިފައިވާ ކަމަށް އެރަށު ކައުންސިލުން ހާމަކޮށްފިއެވެ. މިފަހަރު ދަނޑުބިން ދޫކުރުމަށް ހަމަޖެހިފައިވަނީ މޫސުމީ ދަނޑުވެރިކަމަށެވެ.

ވައިކަރަދޫ ކައުންސިލުން މިމަހުގެ 6 ވަނަ ދުވަހު ކޮއްފައިވާ އިއުލާނުގައިވާ ގޮތުން، މޫސުމީ ދަނޑު ހެއްދުމަށްޓަކައި ރަށުން ބިން ދެވެންއޮތް ސަރަހައްދު ތަކުން ބިން ދޫކުރުން މިއަހަރުގެ ޖުލައި މަހުގެ 31 ވަނަ ދުވަހުގެ ނިޔަލަށް ކުރިއަށް ދާނެ ކަމަށެވެ.

އެގޮތުން މޫސުމީ ދަނޑުބިން ބޭނުންވެލައްވާ ފަރާތްތަކުން މިމަހުގެ 18 ވާ އަންގާރަ ދުވަހުގެ 13:00 ގެ ކުރިން ދަނޑަށް އެދޭ ފޯރމް ފުރިހަމަ ކުރެއްވުމަށްފަހު އެ އިދާރާއަށް ހުށައެޅުމަށް ކައުންސިލުން ވަނީ އެދިފައެވެ.

ދަނޑު ބިން ނެގުމަށް ފުރުޞަތު ހުޅުވާލާފައި ވީނަމަވެސް، އެކައުންސިލުން ކުރިއަށް ރޭވިފައި ހުރި ޕްރޮގްރާމްތަކާއި ގުޅިގެން ދަނޑު ކައުންސިލަށް ނެގުން އެކަށީގެންވާކަން ރައްޔިތުންގެ ސަމާލުކަމަށް އެކައުންސިލުން ވަނީ އަންގާފައެވެ. އަދި އެފަދަ ހާލަތުގައި އެއްވެސް ބަދަލެއް ދިނުމަކާއިނުލައި ކައުންސިލަށް ދަނޑުބިން ނެގޭނެ ކަމަށްވެސް ކައުންސިލުން މައުލޫމާތު ދެއެވެ.

އެހެންކަމުން މި ދަނޑުތަކުގައި ހެއްދޭނީ ކުރުމުއްދަތުގައި ހައްދައިގެން ކެނޑޭނެ މޫސުމީ ބާވަތްތައް ކަމަށާއި، އަދި އެ މުއްދަތުގެ ތެރޭގައި ދަނޑުތަކުގައި ފެންވަޅުކޮނެ ގެ އެޅުމަކީ މަނާ ކަމެއްކަމަށްވެސް އެކައުންސިލުން ބުނެއެވެ.

ދަނޑަށް އެދޭ ފޯރމް އެރަށު ކައުންސިލުން އިދާރާއިން ލިބެން ހުންނާނެ ކަމަށާއި، ފޯމެއްގެ އަގަކީ -/3 ރުފިޔާ ކަމަށް ކައުންސިލުން ބުނެއެވެ.

ހދ. ވައިކަރަދޫއަކީ ފުޅާ ދާއިރާއެއްގައި ދަނޑުވެރިކަމުގެ މަސައްކަތް ކުރަމުންއަންނަ ރަށެކެވެ.