ފްލެޓް ދޫކުރަނީ އެކަނިވެރިން މައިން ބަފައިން ފިޔަވައި ކައިވެނިކޮށްގެން އުޅޭ ފަރާތްތަކަށް އެކަނި

ހިޔާ މަޝްރޫއުގެ ދަށުން ދޫކުރާ 7،000 ފްލެޓް ދޫކުރާނީ އެކަނިވެރި މައިންނާއި އެކަނިވެރި ބަފައިން ފިޔަވައި ހަމައެކަނި ކައިވެނި ކޮށްގެން އުޅޭ 18 އަހަރުން މަތީގެ ފަރާތްތަކަށް ކަމަށް ހައުސިން މިނިސްޓަރ ޑރ.މުހައްމަދު މުއިއްޒު ވިދާޅުވެއްޖެއެވެ.

ހިޔާ މަޝްރޫއު ފަށާފައިވަނީ މިދިޔަ އަހަރުގެ ނޮވެމްބަރު މަހުގެ 18 ގައެވެ.

ހިޔާ މަޝްރޫއުގެ 7،000 ފްލެޓާއި ބެހޭގޮތުން މައުލޫމާތު ދެއްވުމަށް ދަރުބާރުގޭ ރަންނަބަނޑޭރި މާލަމުގައި ބޭއްވި ރަސްމިއްޔާތުގައި ވާހަކަދައްކަވަމުން ޑރ.މުހައްމަދު މުއިއްޒު ވިދާޅުވީ 17 ކެޓަގަރީތަކަށް ބަހާލައިގެން ހުޅުވާލާ ފުރުސަތަކީ ދެ ކޮޓަރީގެ އެޕާޓްމަންޓުތަކެއްކަމަށެވެ.

އޭގެ ތެރޭގައި ހިމެނެނީ ސިވިލް ސާވިސް މުވައްޒަފުންނަށް 1000 ފްލެޓާއި، 18 އަހާރާއި 40 އަހަރާއި ދެމެދުގެ ކައިވެނިކޮށްގެން އުޅޭ މީހުންނަށް 1000 ފްލެޓާއި، ދަފުތަރުގައި ނުހިމެނޭ މާލޭ ރަށްވެހިންނަށް 1000 ފްލެޓާއި، ދަފުތަރުގައި ރަޖިސްޓްރީވެފައިވާ ފަރާތްތަކަށް 1044 ފްލެޓެވެ. އަދި ޑޮކްޓަރުންނާއި ނަރުހުންނަށް 475 ފްލެޓާއި، ޓީޗަރުންނަށް 625 ފްލެޓާއި، އެކަނިވެރި މައިންނާއި ބައިފައިންނަށް 500 ފްލެޓާއި، ނުކުޅެދުންތެރިކަން ހުންނަ ފަރާތްތަކަށް 200 ފްލެޓެވެ. މީގެއިތުރުން ފުލުހުންނާއި ސިފައިންނަށް 600 ފްލެޓާއި ގުޅީފަޅުން ފްލެޓް ގަތުމަށް ފައިސާ ދައްކައި ފްލެޓް ނުލިބުނު ފަރާތްތަކާއި، ޓާޓާ ފްލެޓަށް ފައިސާ ނުދެއްކުނު ފަރާތްތަކަށް 300 ފްލެޓް އަދި މާފަންނު ހުޅަނގުގައި ނިކަމެތިކޮށް އުޅޭ ފަރާތްތަކަށް 256 ފްލެޓްކަމަށް ހައުސިން މިނިސްޓްރީ އިން ބުނެއެވެ.

މިކެޓަގަރީތަކުގެ ތެރެއިން ފޯމު ލެވޭނީ ބޭނުންވާ ކޮންމެވެސް އެއް ކެޓަގަރީއަކަށެވެ.

ފޯމު ދޫކުރުން 6 މެއިން ފެށިގެން ކުރިއަށްދާއިރު އެންމެ ފަހު ދުވަހެއްގެ ގޮތުގައި ފޯމު ދޫކުރާނީ ޖުލައި މަހުގެ 31 އަށެވެ. އަދި ޖޫން މަހުގެ 3 އިން ފެށިގެން ޖުލައި 31 އާއި ހަމައަށް ފޯމު ބަލައިގަތުމަށް ވަނީ ހަމަޖެހިފައެވެ.

"މީގެ ކުރީގެ ފްލެޓްތަކަށް ލުމަށް ކަނޑައަޅާފައިވާ އުމުރަކީ 21 އަހަރު. އެހެން ނަމަވެސް މިފަހަރު ރައީސް ޔާމީން ވަރަށް އިސްކަމެއް ދެއްވާ ޒުވާނުންނަށް އިސްކަމެއް ދެއްވަން. އެހެން ކަމުން މިފަހަރު އަޅުގަނޑުމެން މިނިންމީ 18 އަހަރު ވެއްޖިއްޔާ ފޯމު ލެވޭނޭ. ފްލެޓްވެސް ލިބޭނޭ. އެހެންކަމުން އަޅުގަނޑުމެން ކަނޑައަޅާފައި މިވަނީ އެންމެ ދަށް އުމުރަކަށް 18 އަހަރަށް. 18 އަހަރު ވެއްޖިއްޔާ ވޯޓުވެސް ލެވޭ. އެހެން ކަމުން އެވަރުގެ ޒިންމާއެއް އުފުލެންޏާ އެ ހައްގުވެސް އެމީހަކަށް އޮންނަން ޖެހޭނެ،" މުއިއްޒު ވިދާޅުވިއެވެ.

މި ސްކީމްގެ ދަށުން ދެމަފިރިންނަށް ފްލެޓް ލިބިއްޖެ ކަމުގައިވާނަމަ އޭގެތެރެއިން އެކަކު ފްލެޓް ދޫކުރަން ޖެހެއެވެ. އެހެން ނަމަވެސް 600 އަކަފޫޓަށްވުރެ ކުޑަކޮށް ގެއެއް ނުވަތަ ފްލެޓެއް ލިބިފައިވާ ކަމުގައިވާނަމަ އެމީހަކަށް މި މަޝްރޫއުގެ ދަށުން ފްލެޓް ލިބޭނެކަމަށްވެސް މިނިސްޓަރ ވަނީ ވިދާޅުވެފައެވެ.

ސޯޝަލް ހައުސިންގެ ދަށުން ހައުސިން މިނިސްޓްރީން އެންމެފަހުން ދޫކުރި 661 ފްލެޓާ ގުޅިގެން ގިނަ ބަޔަކު ވަނީ ފްލެޓް ލިބުނު ފަރާތްތައް ކަނޑައެޅުމުގައި މިނިސްޓަރީން ގެންގުޅު އުސޫލާމެދު ކަންބޮޑުވުން ފާޅުކޮށްފަ އެވެ. މިނިސްޓްރީން އިއުލާން ކުރީ ފްލެޓް ލިބޭ ފަރާތުގެ ނަމުގެ ބަދަލުގައި ފްލެޓަށް އެދި ހުށަހެޅި ފޯމް ނަމްބަރު އެކަންޏެވެ. އެ ފްލެޓްތަކަށް 15،000 އަށް ވުރެ ގިނަ މީހުން ކުރިމަތިލިއިރު ފްލެޓް ދީފައި ވަނީ އެންމެ މަތިން މާކްސް ލިބުނު މީހުންނަށް ނޫން ކަމަށް ގިނަ ބަޔަކު ގަބޫލު ކުރެއެވެ. އަދި އެކަމުގެ ޝަކުވާތައް އެންޓި ކޮރޮޕްޝަން ކޮމިޝަން (އޭސީސީ) އަށް ހުށަހެޅިއެވެ.

ފެލްޓްތަކާ ގުޅިގެން އެންމެ ފުރަތަމަ އޭސީސީ އަށް މައްސަލަ ހުށަހަޅާފައި ވަނީ ފްލެޓް ލިބުނު މީހުންގެ ވަގުތީ ލިސްޓް ނެރުމާ ގުޅިގެންނެވެ. އަދި ވަގުތީ ލިސްޓާ ގުޅޭ ގޮތުން އޭސީސީ އަށް މައްސަލަ ހުށަހަޅާފައި ވަނިކޮށް ހައުސިން މިނިސްޓްރީން ވަނީ ދާއިމީ ލިސްޓް ވެސް ނެރެފައެވެ. ފްލެޓް ލިބުނު ފަރާތްތަކާ ފްލެޓް ހަވާލުކުރިއިރު އޭސީސީ އަށް ހުށަހަޅާފައިވާ މައްސަލަތައް ތަހުގީގުކޮށް ނިމިފައެއްވެސް ނުވެއެވެ.

މަތިން މާކްސް ލިބުނު ނަމަވެސް، ފްލެޓް ލިބިފައިނުވާތީއާއި ފްލެޓް ލިބޭ މީހުންގެ މައުލޫމާތު ސިއްރުކޮށްފައި ވާތީ އެތައް ބަޔަކު ދަނީ މިކަމުގައި ކޮރަޕްޝަނުގެ އަމަލުތަކެއް އެކުލެވިގެންވާ ކަމަށް ތުހުމަތު ކުރަމުންނެވެ. މީގެ އިތުރުން، ރައީސް ޔާމީން ކެމްޕެއިން އޮފީހުން މަތިން މާކްސް ލިބުނު މީހުންނަށް ގުޅި ކަމަށް ބުނާ މައްސަލައެއް ވެސް ވަނީ ފެންމަތިވެފަ އެވެ.