ވައިކަރަދޫ ދާއިރާގެ މެމްބަރު 6 މަސް ވަންދެން އެމްއެންޕީގެ ދަފްތަރުގައި އޮތް މައްސަލަ މަޖިލީހުން ބަލަނީ
ޒިންމާދާރުކަން ކުޑަކޮށް ކޮށްފައިވާ ކަމެއް
ހުސައިން ޒިޔާދު - ވައިކަރަދޫ ދާއިރާގެ މެމްބަރު
ވައިކަރަދޫ ދާއިރާގެ މެމްބަރު ހުސައިން ޒިޔާދުގެ ނަން އޭނާއަށް ނޭނގި މޯލްޑިވްސް ނޭޝަނަލް ޕާޓީ (އެމްއެންޕީ)ގެ ދަފްތަރުގައި 6 މަސް ދުވަސްވަންދެން އޮތް މަައްސަލަ ރައްޔިތުންގެ މަޖިލީހުން ބަލަން ނިންމައިފިއެވެ.
ޒިޔާދުއަށް އޭނާ ޕާޓީ ބަދަލުކޮށްފައިވާކަން އެނގުނީ މިދިޔަ މަހުގެ 29ގައި އޮތް އެމްޑީޕީގެ ގައުމީ މަޖިލީހުގެ ޖަލްސާގައި އީސީއަށް މެސެޖް ކުރުމުންނެވެެ. އަންގާރަ ދުވަހު ރައްޔިތުންގެ މަޖިލީހަށް ވެލިދޫ ދާއިރާގެ މެމްބަރު ހުށައެޅުއްވި މައްސަލައަށް ވާހަކަދައްކަވަމުން ޒިޔާދު ވިދާޅުވީ، އޭނާ މަޖިލިސް އިންތިޚާބުގައި ވާދަކުރެއްވީވެސް އަދި މިހާތަނަށް ދެމިހުންނެވީވެސް އެމްޑީޕީ މެމްބަރެއްގެ ގޮތުގައި ކަމަށެވެ. އެހެންނަމަވެސް ނޭގި އެހެން ޕާޓީއެއްގެ މެމްބަރެއްގެ ގޮތުގައި މަޖިލީހުގައި ހުންނަވާތާ މިހާރު 6 މަސްވެފައިވާ ކަމަށެވެ. މަޖިލިސް މެމްބަރެއް ޕާޓީ ބަދަލުކުރަންޖެހޭ އުސޫލްތައް އޮންނައިރު، އީސީގައި އެމްއެންޕީ މެންބަރުންގެ ދަފްތަރުގައި އޮންނަތާ 6 މަސްވެފައިވާ ކަމަށެވެ.
ޒިޔާދު ވިދާޅުވީ ހެދިފައިވާ އުސޫލުތަކުގެ ގޮތުން އެއް ޕާޓީން އަނެއް ޕާޓީއަށްމީހުން ބަދަލު ކުރުމުގެ މަގުފަހިވަނީ ކަމަށް ގަބޫލު ނުކުރެވެނީ، އޭނާއާމެދު ކަންހިގާފައިވާ ގޮތުން ކަމަށެވެ. އެކަން ތަފްސީލް ކޮށްދެއްވަމުން ޒިޔާދު ވިދާޅުވީ، އެމްއެންޕީއަށް ސޮއިކުރިކަމަށް ބުނާ ފޯމުގައި އޭނާގެ ސޮއި އަދި ފިންގަރ ޕްރިންޓްވެސް އެބައޮތް ކަމަށެވެ. އަދި ހެކިވެރިންނާއި އެމްއެންޕީގެ ރަޖިސްޓްރާވެސް ސޮއިކޮށްފައިވާކަމަށެވެ. މިއީ ޒިންމާދާރުކަން ކުޑަކޮށް ކޮށްފައިވާ ކަމެއް ކަމަށް ޒިޔާދު ވިދާޅުވިއެވެ.
ޒިޔާދު ވިދާޅުވީ ޕާޓީތަކުގެ ދަފްތަރު ބަލަހައްޓަން ޖެހޭނީ ޕާޓީތަކުން ކަމަށް ގަބޫލު ކުރައްވާ ކަމަށެވެ. އެކަން އެންމެ ރަނގަޅަށް ކުރެވޭނީވެސް ޕާޓީތަކަށް ކަމަށެވެ.
މިކަމާ ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ އޭނާ އެމްއެންޕީއަށް ވެއްދުމަށް ފުރާފައިވާ ފޯމު މަޖިލީހުގެ އަމީންއާމްއާއި ހަވާލުކުރުމަށް ވިދާޅުވެފައެވެ.
ރައްޔިތުންގެ މަޖިލީހަށް ހުށައެޅި މައްސަލައިގައި ބުނެފައިވަނީ، ސިޔާސީ ޕާޓީތަކަށް މީހުން ވެއްދުމާއި ބަދަލުކުރުމުގައި އެމީހުންގެ ބައިވެރިވުމެއް ނެތި އަމަލުކުރަމުން ދާކަމަށެވެ. އަދި ގާނޫނު އަސާސީގެ 30 ވަނަ މާއްދާގައި ބަޔާންކޮށްފައިވާ، ސިޔާސީ ޕާޓީތަކުގެ ހަރަކާތުގައި ބައިވެރިވުމުގެ ހައްގުގެ ބޭނުން ބައެއް ފަރާތްތަކުން ނަހަމަ ގޮތުގައި ހިފަމުންދާ ކަމަށެވެ.
އެފަދަ މީހުންގެ އަމަލުގެ ސަބަބުން ވަކި ސިޔާސީ ފިކުރެއްގައި މަސައްކަތް ކުރުމަށް ބޭނުންވާ މީހުންނަށް އެ ހައްގު ގެއްލިފައިވާ ކަމަށް ޝަފީގް ހުށައެޅުއްވި މައްސަލައިގައި ބުނެފައިވެއެވެ. އަދި އެ މީހުންގެ ހައްގު ނަގާލައި، ނުހައްގު މާލީ މަންފާއާ ގެއްލުން ސިޔާސީ ޕާޓީތަކަށް ލިބެމުންދާ ކަމަށެވެ. މިފަދަ ޝަކުވާތައް ބެލުމުގައި އިލެކްޝަންސް ކޮމިޝަނުން އަމަލުކުރާ ގޮތުން އިތުރު މައްސަލަތައް ކުރިމަތިވަމުން ދިޔުމާއި، ސިޔާސީ ޕާޓިގެ ނިޒާމަށް ރައްޔިތުންގެ އިތުބާރު ކުޑަވަމުންދާތީ، އެކަމުގެ ޝަކުވާ ރައްޔިތުންގެ ފަރާތުން ލިބެމުން އަންނަ ކަމަށް މައްސަލައިގައި ބުނެފައިވެއެވެ.
އިލެކްޝަންސް ކޮމިޝަނުންވަނީ ނުގަވާއިދުން ޕާޓީއަށް މީހުން ވެއްދުމަށް ހުށައަޅާ ކޮންމެ ފޯމެއް 10،000 ރުފިޔާއިން ޖޫރިމަނާ ކުރުމަށްވެސް ނިންމާފައެވެ.
