ޕާކިސްތާނުގެ ސިއްހީ ހާލަތާއި މެދު އުއްތަމަ ފަނޑިޔާރު ކަންބޮޑޮވުން ފާޅުކުރައްވައިފި
7 ޖެނުއަރީ 2022 | ހުކުރު 12:58ބަލި މީހާއަށް އޮކްސިޖަން ފޯރުކޮށްދެވޭނެ ގޮތްވެސް ނެތް
ޕާކިސްތާނުގެ އުއްތަމަ ފަނޑިޔާރު ގުލްޒާރް އަޙްމަދު
ޕާކިސްތާނުގެ ސިއްހީ ހާލަތާއިމެދު އުއްތަމަ ފަނޑިޔާރު ގުލްޒާރް އަޙްމަދު ކަންބޮޑުވުން ފާޅުކުރައްވައިފިއެވެ.
ޕާކިސްތާނުގެ ޚައިބަރ ޕަޚްތުންކުވާ ޕްރޮވިންސްގައި އުރަމަތީގެ ކެންސަރު އިތުރުވުމާގުޅޭ މައްސަލައެއް ބައްލަވަމުން އުއްތަމަ ފަނޑިޔާރު ގުލްޒާރް އަޙްމަދު ވިދާޅުވީ، ޕްރޮވިންސްގެ ސިއްހީ ހާލަތު ދުވަހެއް ދުވަހަކަށް ދަށްވަމުންދާ ކަމަށާއި، އެ ޕްރޮވިންސްގެ ސިއްހީ ނިޒާމު ރަނގަޅުކުރަން އެއްވެސް ސަރުކާރަކުން އަޅާލައިފައިނުވާ ކަމަށެވެ.
އުއްތަމަ ފަނޑިޔާރު އިތުރަށް ވިދާޅުވީ ޚައިބަރ ޕަޚްތުންކުވާ ޕްރޮވިންސްގެ ސަރުކާރު ހޮސްޕިޓަލުތަކުގައިވެސް އެކްސްރޭ މެޝިން ނުހުންނަ ކަމަށާއި، ބަލި މީހާއަށް އޮކްސިޖަން ފޯރުކޮށްދެވޭނެ ގޮތްވެސް ނުހުންނަ ކަމަށެވެ.
އެހެންނަމަވެސް ކޮންމެ އަހަރަކުވެސް ޚައިބަރ ޕަޚްތުންކުވާ ޕްރޮވިންސްގެ ސަރުކާރުން ބިލިއަނުން ސިއްހީ ނިޒާމަށް ޚަރަދުކުރާ ވާހަކަ އަޑު އައްސަވާ ކަމަށާއި، އެ ހުރިހާ ފައިސާއެއް ކޮބައިތޯ އުއްތަމަ ފަނޑިޔާރު ވަނީ ސުވާލު އުފައްދަވައިފައެވެ.
ޚައިބަރ ޕަޚްތުންކުވާ ޕޮރޮވިންސްގެ ވެރިންގެ ކޮރަޕްޝަނުގެ މައްސަލަ ބައްލަވަން ސަރުކާރަށް ގޮވާލައްވަވާ ކަމަށާއި، ރައްޔިތުންނަށް ދޭން ޖެހޭ އެންމެ އާދައިގެ ޚިދުމަތްތަކަށް ހިޔާނާތްވުން ބަލައިނުގަންނަވާނެ ކަމަށްވެސް އުއްތަމަ ފަނޑިޔާރު ގުލްޒާރް އަޙްމަދު ވިދާޅުވިއެވެ.
