ކޮމަންޑޫން ގޯތި ދޫނުކުރެވި ލަސްވަނީ ލޭންޑް ޔޫސް ޕްލޭން ނުނިމޭތީ: ކައުންސިލް
މަސައްކަތް ނިމުމުން ގޯތި ދޫކުރާނެ
ށ. ކޮމަންޑޫ
ށ. ކޮމަންޑޫގެ ބިން ހިއްކި ސަރަހައްދުން ގޯތި ދޫނުކުރެވި އޮތީ ލޭންޑް ޔޫސް ޕްލޭން ނުނިމޭތީ ކަމަށް އެ ރަށު ކައުންސިލްގެ ރައީސް މުހައްމަދު ޝިނާން ވިދާޅުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން ޝިނާން ވިދާޅުވީ ލޭންޑް ޔޫސް ޕްލޭން ހެދުމުގެ މަސައްކަތް ކުރިއަށްދާ ކަމަށާއި އެ މަސައްކަތް ނިމުމުން ގޯތި ދޫކުރެވޭނެ ކަމަށެވެ.
2018 ވަނަ އަހަރުގެ ފަހުކޮޅުގައި ބިން ހިއްކާފައިވާކަން ފާހަގަކުރައްވާ ޝިނާން ވިދާޅުވީ އައު ކައުންސިލުން މަގާމާއި ހަވާލުވިތާ ފަސް މަސްވެފައިވާ ކަމަށެވެ. އެ ރަށުގައި ގޯތި ބޭނުންވާ 600 މީހުން އެބައުޅޭ ކަމަށް ވެސް ޝިނާން ވިދާޅުވިއެވެ.
ކޮމަންޑޫ ބިން ހިއްކުމުގެ މަސައްކަތް ކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީންނެވެ. ކޮމަންޑޫ ފަޅުތެރެއިން 10 ހެކްޓަރުގެ ބިންވަނީ ހިއްކާފައެވެ. ކޮމަންޑޫއަކީ ބިމުގެ ގޮތުން ހަތް ހެކްޓަރުގެ ރަށެއް ނަމަވެސް ހިއްކި ބިމާއިއެކު އެރަށުގެ ބިމުގެ ޖާގަަވަނީ 17 ހެކްޓަރަށް ތަނަވަސްވެފައެވެ.
ސަރުކާރުން 2018 ވަނަ އަހަރުގެ ބަޖެޓުގައި ކަނޑައަޅާފައިވާ ހައުސިން މަޝްރޫއުގެ ދަށުން ށ.ކޮމަންޑޫގައި 50 ހައުސިން ޔުނިޓް އެޅުމަށް އޭރު ހިމަނާފައިވެއެވެ. މި މަޝްރޫއަކީ ހަތް މިލިއަނަށްވުރެ ގިނަ ރުފިޔާގެ މަޝްރޫއެކެވެ.
ކޮމަންޑޫގައި މިވަގުތު 1900ށް ވުރރ ގިނަ މީހުން ދިރިއުޅެމުންދެއެވެ.
