ބަލިތަކަށް ޚާއްސަ ކުރެވިފައިވާ ޑޮކްޓަރުންނަށް އެޕޮއިންޓްމަންޓް ހައްދައި ގިނަ ދުވަހު ކިއުގައި ތިބެންޖެހޭ މައްސަލަ ސަލާމުކަމަށް އައިސްފައިވާ ކަމަށާއި، އެ މައްސަލަ ހައްލު ކުރުމުގެ މަސައްކަތް ކުރަމުންދާ ކަމަށް ސަރުކާރުގެ މައި ހޮސްޕިޓަލް އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް)އިން ބުނެފިއެވެ.

ރާއްޖެއެމްވީއަށް އެހޮސްޕިޓަލްގެ ސީއީއޯ އިބްރާހިމް ސަލީމް ވިދާޅުވީ އައިޖީއެމްއެޗްގައި ވަކި އަދަދަށް މީހުން ޚިދުމަތް ދިނުމަށް އަބަދުވެސް ތިބޭނެ ކަމަށާއި، ވަސީލަތްތައް ހުރި މިންވަރަށް ޚިދުމަތުގެ ފެންވަރު ރަނގަޅު ކުރުމުގެ މަސައްކަތް ކުރަމުންދާ ކަމަށެވެ. އަދި ރައްޔިތުންނަށް ދޭ ޚިދުމަތުގެ ފެންވަރު ރަނގަޅު ކުރުމަށް އިތުރު ވަސީލަތްތައް ހޯދަމުންދާ ކަމަށް ވިދާޅުވިއެވެ.

ބަލި މީހުންނަށް ފަރުވާ ދިނުމުގައި ވަގުތު ނަގާނެކަން ފާހަގަކުރައްވައި ސަލީމް ވިދާޅުވީ އެކިއެކި ފަރުވާއަށް ނަގާނީ އެކި ވަގުތު ކަމަށެވެ. ސަލީމް ވިދާޅުވީ އެމަރޖެންސީގައި މީހަކު އަތުވެއްޖެނަމަ އެމީހަކަށް ވަގުތުން ޑޮކްޓަރުންނާއި ނަރުހުން އެޓެންޑްވާނެ ކަމަށެވެ. އަދި ކޮންމެ ދުވަހަކުވެސް ބަލިވެގެން އަންނަ މީހުން ބަލަމުންދާ ކަމަށާއި، ކޮންމެ ދުވަހަކު ވެސް ގާތްގަނޑަކަށް 500ށް ވުރެ ގިނަ މީހުން ބަލާ ކަމަށެވެ.

މީގެ އިތުރުން ސަލީމް ވިދާޅުވީ ސްޕެޝަލިސްޓް ޑޮކްޓަރުންނަށް އެޕޮއިންޓްމެންޓް ލިބުމުގައި ލަސްކަމެއް އުޅޭ ކަމަށާއި، އެމައްސަލަ ވެސް ހައްލު ކުރުމުގެ މަސައްކަތް ކުރަމުންދާ ކަމަށެވެ. އެގޮތުން އެއްފަހަރާ ޑޮކްޓަރުންނާއި ނަރުހުން ޗުއްޓީތަކަށް ފޮނުވުމުގެ ބަދަލުގައި ވަކި ޕްލޭނެއްގެ ދަށުން އެކަން ކުރަމުންދާ ކަމަށެވެ. އަދި އިންސާނީ ވަސީލަތް އިތުރުމުގެ މަސައްކަތް ކުރަމުންދާ ކަމަށް ވިދާޅުވިއެވެ.

ސްޕެޝަލިސްޓް ޑޮކްޓަރުންނަށް އެޕޮއިންޓްމެންޓް ހެއްދުމަށްފަހު ޕްރައިވެޓް އެހެން ހޮސްޕިޓަލަކުން ނުވަތަ ކްލިނިކަކުން ފަރުވާ ހޯދަމުންދާކަން ފާހަގަކުރައްވައި ސަލީމް ވިދާޅުވީ އެޕޮއިންޓްމެންޓް ކެންސަލް ނުކޮށް އެހެން ކަންތައް ކުރުމުން އެހެން މީހުންނަށް އެޕޮއިންޓްމެންޓް ހަމަޖެހުމަށް ވަގުތު ނަގާ ކަމަށެވެ. އަދި އެހެންތަނަކުން ފަރުވާ ހޯދާނަމަ އެޕޮއިންޓްމެންޓް ކެންސަލް ކުރުމަށް އިލްތިމާސްކުރެއްވިއެވެ.

ސަލީމް ވިދާޅުވީ ނިޒާމު އިތުރަށް ހަރުދަނާ ކުރެވި، ޑިޖިޓަލްކޮށް ސިއްހީ ރިކޯޑުތައް މެނޭޖް ކުރެވޭނެ ސިސްޓަމެއް ގާއިމްކޮށްފައިވާ ކަމަށެވެ. އެހެންކަމުން މިހާރު ދިގު ކިއުތަކުގައި ތިބޭ މީހުންނަށް ދުރާލައި ޑޮކްޓަރަށް ދެއްކޭނެ ތާރީޚު އެނގޭނެ ކަމަށާއި، ގިނަ ދުވަސްތަކަކަށް މާލެ އައިސް މަޑުކުރަން ނުޖެހޭނެ ކަމަށް ވިދާޅުވިއެވެ. މިއީ އަތޮޅުތެރޭގައި ދިރިއުޅޭ ފަރާތްތަކަށް ލިބޭ ވަރަށް ބޮޑު ލުޔެކެވެ.

ސިއްހީ ރިކޯޑުތައް މެނޭޖް ކުރެވޭނެ ސިސްޓަމާއެކު އޮންލައިންކޮށް އެޕޮއިންޓްމަންޓް ހެއްދުމާ، ބޭސް ސިޓީ، ލެބް ރިޕޯޓް އަދި އެހެނިހެން ރިޕޯޓުތައް ބަލައި، ޑައުންލޯޑު ކުރެވުމުގެ އިތުރުން ޚިދުމަތް ލިބިގަންނަ ފަރާތްތަކަށް ބިލުތައްވެސް ބަލާލެވޭނެ އެވެ. މިހާރު އެންޑްރޮއިޑް އަދި އައިއޯއެސް ފޯނުތަކަށް ވެސް އައިޖީއެމްއެޗްގެ މޮބައިލް އެޕްލިކޭޝަން ޑައުންލޯޑު ކުރެވޭނެއެވެ.