ބައެއް ރިސޯޓްތަކާއި ވިޔަފާރިތަކަށް ދީފައިވާ ބޭރު ފައިސާ ގަނެވިއްކުމުގެ ހުއްދަ ބާތިލް ކޮށްފި

ސޮނޭވާގެ ދެ ރިސޯޓަކާއި އިތުރު ބައެއް ވިޔަފާރިތަކަކަށް ދީފައިވާ ބޭރު ފައިސާ ގަނެވިއްކުމުގެ ހުއްދަ މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ބާތިލްކޮށްފިއެވެ.

އެމްއެމްއޭއިން ބުނީ ބޭރު ފައިސާ ގަނެވިއްކުމުގެ ހުއްދަ ލިބިފައިވާ ވިޔަފާރިތަކަށް އަމަލުކުރުން ލާޒިމުކުރާ ގަވާއިދުތަކާއި ހިލާފުވެގެން 16 ވިޔަފާރިއަކަށް ދީފައިވާ ހުއްދަ ބާތިލްކޮށްފައިވާކަމަށެވެ.

ހުއްދަ ބާތިލްކުރި ވިޔަފާރިތަކުގެ ތެރޭގައި ހިމެނެނީ 8 ރިސޯޓަކާއި އެހެނިހެން ބައެއް ވިޔަފާރިތަކެވެ. ބޭރު ފައިސާ ގަނެވިއްކުމުގެ ހުއްދަ ބާތިލްކުރި ރިސޯޓްތަކުގެ ތެރޭގައި ސޮނޭވާ ފުށި، ސޮނޭވާ ޖާނީ، ރެޑިސަން ބްލޫ، ފުރަވެރި އަދި ފިޔަވަޅު ރިސޯޓް ހިމެނެއެވެ. މި ފަރާތްތަކަށް ދީފައިވާ ހުއްދަ ބާތިލްކުރި ސަބަބެއްކަމަށް އެމްއެމްއޭއިން ބުނީ ގަވާއިދާއި ހިލާފުވުން ކަމަށެވެ. އެހެންނަމަވެސް މިކަމާއި ގުޅޭ އިތުރު ތަފްސީލު ހާމައެއް ނުކުރެއެވެ.

އެމްއެމްއޭއިން ބުނީ އިސްލާހުކުރަންޖެހޭ ކަންކަން އިސްލާހުކުރުމުން އަލުން ހުއްދަ ދޫކުރާނެ ކަމަށެވެ. ރާއްޖޭގައި ބޭރު ފައިސާ ގަނެވިއްކުމުގެ ހުއްދަ އޮންނަނީ 279 ފަރާތަކަށެވެ. އޭގެ ތެރެއިން 90 ޕަސެންޓާ ގާތްކުރާ އަދަދަކަށް ހުއްދަތައް ދީފައި ހުރީ ރިސޯޓުތަކަށާއި ޓޫރިޒަމްގެ އެހެނިހެން ވިޔަފާރިތަކަށެވެ.