ކޯވިޑާ ގުޅިގެން، ފަތުރުވެރިކަމުގެ ސިނާއަތުގައި ޚިދުމަތްދޭ ފަރާތްތަކުން އަމަލު ކުރަންޖެހޭ މިންގަނޑާ ޚިލާފުވި އުޅަނދެއްގެ ހުއްދަ ބާތިލުކޮށްފައިވާ ކަމަށް ޓުއަރިޒަމް މިނިސްޓްރީން ވިދާޅުވެއްޖެއެވެ.
ޓުއަރިޒަމް މިނިސްޓްރީން މިކަމާ ގުޅިގެން ނެރުނު ނޫސްބަޔާނުގައި ވަނީ، ޕީސީއާރް ޓެސްޓިންގ މިންގަނޑުތަކާ ޚިލާފުވި އުޅަނދެއްގެ ހުއްދަ ވަގުތީ ގޮތުން ބާތިލުކޮށްފައިވާ ކަމަށެވެ. އަދި މިއުޅަނދުގެ މައުލޫމާތު އިމިގްރޭޝަނަށްވެސް ދީ، އިމިގްރޭޝަން ލިސްޓުންވެސް އުޅަނދު އުނި ކުރެވިފައިވާ ކަމަށެވެ. ނަމަވެސް މިއީ ކޮން ބާވަތެއްގެ އުޅަނދެއް ކަމާއި، މައްސަލައިގެ އިތުރު ތަފްސީލެއް މިނިސްޓްރީން ހާމަކޮށްފައެއް ނުވެއެވެ.
ޓޫރިޒަމް މިނިސްޓްރީން ވަނީ މިދުވަސްވަރަކީ ދުނިޔޭގައި އޮމިކްރޯން ވޭރިއަންޓް ފެތުރެމުންދާ ދުވަސްވަރަކަށް ވާތީ، ފަތުރުވެރިންނަށް ޚިދުމަތް ދޭ ތަންތަނުން ފަތުރުވެރިންނާއި މުވައްޒަފުންގެ ސަލާމަތާއި ރައްކާތެރިކަމަށް އެޅިފައިވާ ފިޔަވަޅުތަކަށް އިތުރަށް ސަމާލުވުމަށް އިލްތިމާސް ކޮށްފައެވެ.
