ހޮސްޕިޓަލުގެ ބޭނުމަށް އެކަނި ދޫކުރެވޭ އިންޖެކްޝަންތައް ބޭނުންކުރުމުގައި އަމަލުކުރާ ޕްރޮޓޮކޯލް ހަރުދަނާކޮށް އުސޫލު ބަދަލުކޮށްފި
ޚާއްސަ ސަމާލުކަމެއް ދީގެން ހޮސްޕިޓަލުން މޮނިޓަރ ކުރާނެ
އައިޖީއެމްއެޗް،
ހޮސްޕިޓަލުން ބޭރަށް ގެންދިއުން މަނާ، އަދި ހޮސްޕިޓަލުގެ ބޭނުމަށް އެކަނި ދޫކުރެވޭ އިންޖެކްޝަންތައް ބޭނުންކުރުމުގައި އަމަލުކުރާ ޕްރޮޓޮކޯލް ހަރުދަނާކޮށް އަމަލުކުރާ އުސޫލަށް ބަދަލު ގެނެސްފައިވާ ކަމަށް އިންދިރާގާދީ މެމޯރިއަލް ހޮސްޕިޓަލް (އައިޖީއެމްއެޗް) އިން ބުނެފިއެވެ.
ރާއްޖެއެމްވީއަށް އައިޖީއެމްއެޗްގެ ސީއީއޯ އިބްރާހިމް ސަލީމް ވިދާޅުވީ ހޮސްޕިޓަލުން ބޭރަށް ގެންދިއުން މަނާ، އަދި ހޮސްޕިޓަލުގެ ބޭނުމަށް އެކަނި ދޫކުރެވޭ އިންޖެކްޝަންތަކާއި ބޭސްތައް ބޭނުންކުރުމުގައި އަމަލުކުރާ ޕްރޮޓޮކޯލް ހަރުދަނާކޮށްފައިވާ ކަމަށެވެ. މިހާރު މިފަދަ ކަންކަމުގައި ޚާއްސަ ސަމާލުކަމެއް ދީގެން ހޮސްޕިޓަލުން މޮނިޓަރ ކުރާނެ ކަމަށް ސަލީމް ވިދާޅުވިއެވެ.
މީގެ އިތުރުން ސަލީމް ވިދާޅުވީ ހަރުދަނާ އުސޫލެއްގެ ތެރެއިން މިކަންކަން މޮނިޓާ ކުރެވޭމުންދާއިރު، އެއް ޝިފްޓުން އަނެއް ޝިފްޓަށް ބޭނުންކުރެވޭ އަދަދު އެނގޭނެ ގޮތަށް ސްލިޕް ހަވާލުކުރާނެ ކަމަށެވެ. ކަންކަން ބެލެހެއްޓޭނެ ކަމުގެ ޔަގީންކަން ސަލީމް ދެއްވިއެވެ.
ހޮސްޕިޓަލުން ބޭރަށް ގެންދިއުން މަނާ، އަދި ހޮސްޕިޓަލުގެ ބޭނުމަށް އެކަނި ދޫކުރެވޭ އިންޖެކްޝަންތައް ބޭނުންކުރުމުގައި އަމަލުކުރާ ޕްރޮޓޮކޯލް ހަރުދަނާކޮށްފައި މިވަނީ އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސް މަރާލި މައްސަލައިގައި ހައްޔަރުކުރި ދިވެހި ނަރުސް ހަލީމަތު ލަމްހާ ދިރިއުޅުނު ކޮޓަރި ފާސްކުރިއިރު، ސިޓީ އުރައެއްގެ ތެރެއިން، އައިޖީއެމްއެޗްގެ ހުއްދައަކާ ނުލައި، އެ ހޮސްޕިޓަލުން ނަގާފައިވާ، ހޮސްޕިޓަލުން ބޭރަށް ގެންދިއުން މަނާ، އަދި ހޮސްޕިޓަލުގެ ބޭނުމަށް އެކަނި ދޫކުރެވޭ އިންޖެކްޝަންތަކެއް ފެނިފައިވާތީ އެވެ.
މީގެ އިތުރުން އައިޖީއެމްއެޗްގެ ޚިދުމަތްތައް އިތުރަށް ހަރުދަނާ ކުރުމަށް ދަނީ ގިނަ މަސައްކަތްތައް ކުރަމުންނެވެ. އަދި އާއްމު ރައްޔިތުންނަށް އަވަސް ޚިދުމަތެއް ފޯރުކޮށްދިނުމަށް ޚާއްސަ ސޮފްޓްވެއާއެއް ގާއިމްކުރުމުގެ މަސައްކަތް ކުރިއަށް ދެއެވެ. ކުރިއަށް އޮތްތަނުގައި އެސޮފްޓްވެއާ މެދުވެރިކޮށް ޑޮކްޓަރުންގެ ޝެޑިއުލް ބަލައިލެވޭނެއެވެ. އަދި މިހާރު އެޕޮއެންޓްމެންޓް ހެއްދުމުން ދޭ ނަންބަރުގެ ބަދަލުގައި ޑޮކްޓަރަށް ދެއްކުމަށް އަންނަން ޖެހޭ ދުވަސް އެނގޭނެއެވެ.
