ބަރަހަނާ ފޮޓޯ އަޅައިގެން ގްރޫޕްތައް ހިންގި މައްސަލައިގައި ދަޢުވާ އުފުލާފައިވާ މަސާއިދުގެ ބަންދު ދަމަހައްޓައިފި
މީހުންގެ ބަރަހަނާ މަންޒަރު ދައްކުވައިދޭ ފޮޓޯ އަދި ވީޑިއޯ ނަގާފައިވޭ
ކްރިމިނަލް ކޯޓު-މައްސަލައިގައި ހިމެނޭ ފަރާތްތަކުގެ މަސްލަޙަތަށް ބަލައި، މި މައްސަލަ އާންމުކޮށް ހުޅުވާނުލައި ކުރިއަށް ގެންދިއުމަށް ކޯޓުން ވަނީ ނިންމާފައި
މީހުންގެ ބަރަހަނާ ފޮޓޯތައް އަޅައިގެން ޓެލެގްރާމްގައި ގްރޫޕްތައް ހިންގި މައްސަލައިގައި ދައުވާ އުފުލާފައިވާ މއ. އިސްޕަންޖުގެ، މުހައްމަދު މަސާއިދު ބިން ސަމީއުގެ ބަންދު ދަމަހައްޓައިފިއެވެ.
ބުރާސްފަތި ދުވަހު މި މައްސަލައިގައި އޮތް އަޑުއެހުމުގައި މައްސަލަ ބައްލަވާ ގާޒީ ވަނީ އޭނާގެ ބަންދު މުރާޖައާކޮށް، އޭނާ ބަންދު ކުރުމަށް ނިންމި ނިންމުމަށް ބަދަލެއް ގެންނަންޖެހޭ ތަނެއް ނެތްކަމަށް ނިންމަވާފައެވެ. އޭނާ މިހާރު ހުރީ ޝަރީއަތް ނިމެންދެން ބަންދުކޮށްފައެވެ.
މި މައްސަލައިގެ އަޑުއެހުންތައް ކޯޓުގައި ކުރިއަށް ގެންދަނީ ސިއްރު ކޮށްގެންނެވެ. އެގޮތުން މައްސަލައިގައި ހިމެނޭ ފަރާތްތަކުގެ މަސްލަޙަތަށް ބަލައި، މި މައްސަލަ އާންމުކޮށް ހުޅުވާނުލައި ކުރިއަށް ގެންދިއުމަށް ކޯޓުން ވަނީ ނިންމައިފައެވެ.
މި މައްސަލައިގެ ދައުވާ އުފުލައި ޕްރޮސިކިއުޓާ ޖެނަރަލްގެ އޮފީހުން ބުނި ގޮތުގައި އެކި ދުވަސްމަތިން އެކި މީހުންގެ ސޯޝަލް މީޑިއާ އެކައުންޓްތަކާއި، ޒާތީ މުއާމަލާތް ހިމެނޭ އެހެނިހެން އެކައުންޓްތައް މަސާއިދު ވަނީ ހެކް ކޮށްފައެވެ. އަދި, އެކި މީހުންގެ ޒާތީ މައުލޫމާތާއި އެމީހުންގެ ބަރަހަނާ މަންޒަރު ދައްކުވައިދޭ ފޮޓޯ އަދި ވީޑިއޯ ނެގުމަށްފަހު ޓެލެގްރާމް އާއި އެހެނިހެން ސޯޝަލް މީޑިއާގެ ޕްލެޓްފޯމްތަކުގައި ވެސް ވަނީ ހާމަކޮށްފައެވެ.
މަސާއިދުގެ މައްޗަށް އުފުލާފައިވާ ދައުވާތައް
އޮރިޔާން ކާޑު ގެންގުޅުމުގެ ކުށުގެ ތިން ދައުވާ.
އޮރިޔާން ކާޑު ފެތުރުމުގެ ކުށުގެ ތިން ދައުވާ.
އެނގިހުރެ ހުއްދަނޫން ގޮތުގައި މައުލޫމާތު ހޯދުމުގެ ކުށުގެ ދައުވާ.
އެނގިހުރެ ހުއްދަނޫން ގޮތުގައި މައުލޫމާތު ހޯދަން އުޅުމުގެ ކުށުގެ ދައުވާ.
އަދުލުއިންސާފު ގާއިމުކުރުމަށް ހުރަސްއެޅުމުގެ ކުށުގެ ދައުވާ.
އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރުހިންގުމުގެ ކުށުގެ ދައުވާ.
އެނގިހުރެ ހުއްދަނޫން ތަނަކަށް ވަނުމުގެ ކުށުގެ ދައުވާ.
މަސާއިދުގެ ބަންދުގެ މަޖިލީހުގައި ފުލުހުން ބުނެފައިވަނީ އޭނާ ގެންގުޅުނު ހާޑް ޑްރައިވަކުން މިލިއަނެއްހާ ފޮޓޯ ފެނިފައިވާ ކަމަށެވެ. މި މައްސަލައިގައި ގިނަ އަދަދެއްގެ ބަޔަކު ވިކްޓިމުންގެ ގޮތުގައި ފާހަގަ ވެފައިވާއިރު، މަސާއިދުގެ އަތުން ޖުމްލަ 10 ހާޑްޑްރައިވް ހޯދިއެވެ.
