އިންދިރާގާދީ މެމޯރިއަލް ހޮސްޕިޓަލް (އައިޖީއެމްއެޗް) ކޮވިޑް-19ގެ އެންމެ ނުރައްކާތެރި ހާލަތަށް ތައްޔާރުވެފައިވާ ކަމަށް އެހޮސްޕިޓަލުން ބުނެފިއެވެ.
ރާއްޖެއެމްވީއަށް ސީއީއޯ އިބްރާހިމް ސަލީމް ވިދާޅުވީ ކޮވިޑް-19ގެ އިތުރު ސަރޖެއް އަތުވެދާނެ ކަމަށް ސިއްހީ މާހިރުން ވިދާޅުވަމުންދާތީ އެކަމަށް ތައްޔާރުވަމުންދާ ކަމަށާއި، މިހާރު ވެސް ގިނަ މަސައްކަތްތަކެއް ކުރެވިފައިވާ ކަމަށެވެ. ނަމަވެސް މިވަގުތު މާލެ ސިޓީގައި އެކިއެކި ހަރަކާތްތައް ކުރިއަށް ގެންދާ ގޮތުން ކަންބޮޑުވާ ކަމަށެވެ.
ސަލީމް ވިދާޅުވީ ކޮވިޑް-19ގެ ނުރައްކާތެރި ރަނގަބީލާއެކު ވެސް މާލެއާއި ހުޅުމާލޭގައި ނައިޓް މާކެޓް ބޭއްވުމަކީ ގަބޫލުކުރެވޭނެ ކަމެއް ނޫން ކަމަށެވެ. މާކެޓްތަކަށް ގިނަ ބަޔަކު އެއްވާ ކަމަށާއި، އެއްވެސް ވަރަކަށް ގައިދުރު ކަމެއް ނެތް ކަމަށް އޭނާ ވިދާޅުވިއެވެ. އަދި ވިދާޅުވީ އެސަރަހައްދު މޮނިޓަރ ނުކުރާ ކަމަށާއި، އުސޫލާއި ގައިޑްލައިންއަށް އަމަލުނުކުރާ ކަމަށެވެ. އަދި މިއީ ސިއްހީ ޚިދުމަތްތެރިން ވެސް ކަންބޮޑުވުންފާޅުކުރާ ކަމެއްގެ ކަމަށާއި، އެއްވުންތައް ބޭއްވުންފަދަ ކަންކަމުން ދުރުވާން ޖެހޭ ކަމަށެވެ.
މީގެ އިތުރުން ސަލީމް ވިދާޅުވީ މާލެ ސިޓީ ކައުންސިލުން މިފަދަ ހާލަތެއްގައި މާކެޓްތައް ކުރިއަށް ގެންދިއުމުގެ ހުއްދަ ދިނުމުގެ ބަދަލުގައި މިކަންކަން ހުއްޓުވަން ޖެހޭ ކަމަށެވެ.
ބެޑް ކެޕޭސިޓީ ހުރިކަން ފާހަގަކުރައްވައި ސަލީމް ވިދާޅުވީ ކޮވިޑް-19ގެ ފެސިލިޓީތަކުގެ ޚިދުމަތްތައް އިތުރަށް ހަރުދަނާ ކުރުމުގެ މަސައްކަތާކާއި، ސިއްހީ ޚިދުމަތްތެރިން އިތުރު ކުރުމުގެ މަސައްކަތް ކުރިއަށްދާ ކަމަށެވެ. މިވަގުތު 500 އެއްހާއި ނަރުހުން ޗުއްޓީގައި ތިބި ނަމަވެސް އެކަށީގެންވާ ވަރަށް ނަރުހުންނާއި ޑޮކްޓަރުން މިވަގުތު ވެސް މަސައްކަތުގައި ހަރަކާތްތެރިވަމުންދާ ކަމަށް ސަލީމް ވިދާޅުވިއެވެ.
ކޮވިޑް-19ގެ ނުރައްކާތެރި ހާލަތަށް އައިޖީއެމްއެޗުން ތައްޔާރުވަމުންދާއިރު، ސިއްހީ މާހިރުންނާއި ހަވާލާ ދެއްވާ ރައީސް އިބްރާހިމް މުހައްމަދު ސޯލިހު ވެސް ވިދާޅުވީ ކުރިއަށް މިއޮތް ތިން ހަފްތާއަކީ، އަނެއްކާވެސް ރާއްޖޭގައި ވަރަށް ބޮޑަށް ކޮވިޑް ފެތުރިގެންދިޔުމުގެ ފުރުސަތު އޮތް ތިން ހަފްތާ ކަމަށެވެ.
ޖެނުއަރީ 4 ވީ އަންގާރަ ދުވަހު ނ. ލަންދޫ ބަނދަރު ހުޅުއްވައިދެއްވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ކޮވިޑްގެ އައު ވޭރިއަންޓެއް މިހާރު ދުނިޔޭގައި ފެތުރެމުން އަންނައިރު ރާއްޖެއިންވެސް އެ ވޭރިއަންޓް ފެނިފައިވާކަމަށެވެ. ހަލުވިކަމާއެކު އެވޭރިއަންޓް ފެތުރެމުންދާކަމަށާއި އަނެއްކާވެސް އިންޒާރެއް ލިބެމުންދާކަމަށް ރައީސް ވިދާޅުވިއެވެ. ރައީސް ވިދާޅުވީ މަސައްކަތް ކުރައްވަނީ ވީވަރަކުން އެކިއެކި ވިޔަފާރިތައް ބަންދުނުކޮށް، އާންމު ހާލަތަކާއިގެން މިކަމުގައި ކުރިއަށް ދެވޭތޯކަމުގައެވެ. މިކަން ކުރިއަށް ގެންދެވޭނީ، ކުރިއެކޭވެސް އެއްގޮތަށް ސިއްހީ މާހިރުން ދެއްވާ ލަފަޔާ އެކީގައި އެގޮތަށް އަމަލުކޮށްގެން ކަމަށް ރައީސް ވިދާޅުވިއެވެ. އެހެންކަމުން ކުރިއަށް މިއޮތް ދެތިން ހަފުތާގައި އަނެއްކާވެސް ވަރަށް ބޮޑަށް އެކަމަށް ސަމާލުވެ، ހުރިހާ ރައްޔިތުން އެކުގައި މިކަމާއިގެން ކުރިއަށް ދިޔުމަށް ރައީސް ވަނީ އެދިވަޑައިގެންފައެވެ.
