"އަލަމާ 5" ދޯނިން ގެއްލުނު މީހުންގެ ވަނަވަރު އާންމުކޮށްފި
4 ޖެނުއަރީ 2022 | އަންގާރަ 18:41ތިންވަނަ މީހާގެ މައުލޫމާތު ހޯދައި، ވެރިފައިކުރުމުގެ މަސައްކަތް މިހާރު ކުރަމުން އަންނަކަމަށް ފުލުހުން މައުލޫމާތުދޭ
ގެއްލިގެން ހޯދަމުން އަންނަ ތިން މީހުންގެ ތެރެއިން ދެމީހުން
ފ. ފީއަލިން ފުރައިގެން މާލެއަށް ދަތުރުކުރަމުންދިޔަ “އަލަމާ 5”ދޯނިން ގެއްލުނު މީހުންގެ ވަނަވަރު ފުލުހުން އާންމުކޮށްފިއެވެ.
މި ދޯނިން ގެއްލިފައިވާ މީހުންގެ ތެރެއިން ވަނަވަރު އާންމުކޮށްފައިވަނީ ދެ މީހެއްގެއެވެ. އެއީ ކ. ގުރައިދޫ/ ނަލަވާ، އާދަމް ޝަފީޤް (32އ)އާއި ބަންގްލަދޭޝް ރައްޔިތެއްކަމަށްވާ އަސަދުލް އިސްމާލް (37އ)އެވެ. ގެއްލިފައިވާ ތިންވަނަ މީހާއަކީ ބިދޭސީ ފިރިހެނެކެެވެ. އެމީހާގެ މައުލޫމާތު ހޯދައި، ވެރިފައިކުރުމުގެ މަސައްކަތް މިހާރު ކުރަމުން އަންނަކަމަށް ފުލުހުން މައުލޫމާތުދެއެވެ.
މިމީހުންނާ ބެހޭ އެއްވެސް މައުލޫމާތެއް ލިބިފައިވާނަމަ ޕޮލިސް ކޮމިއުނިކޭޝަން ސެންޓަރު 3322111ށް ނުވަތަ ވ. ފެލިދޫ ޕޮލިސް ސްޓޭޝަންގެ ނަންބަރު 9792782ށް ގުޅުއްވައި ހިއްސާކުރުމަށް ފުލުހުން ވަނީ އެދިފައެވެ.
ވ. ފުއްސަރު ކައިރިން އަލަމާ ނަމަކަށް ކިޔާދޯންޏެއް، އަޑިއަށްދާ ކަމުގެ މައުލޫމާތު ލިބިގެން ކޯސްޓްގާޑުން ހަރަކާތްތެރިވާން ފަށައިފައިވަނީ އަންގާރަ ދުވަހުގެ ހެނދުނު 7:15 ހާއިރުއެވެ. އެ ދޯނީގައި ތިބީ ދިވެހި ކައްޕިއަކާއި ބިދޭސީ ދެ ފަޅުވެރިންނެވެ. އެއީ 60 ފޫޓުގެ ދޯންޏެކެވެ.
އެމްއެންޑީއެފުން ބުނީ ފަޅުވެރިން ހޯދުމުގެ މަސައްކަތް މެދުކެނޑުމެއްނެތި ކުރިއަށްދާއިރު މި ކަމުގައި ހަރަކާތްތެރިވަމުން ދަނީ އެމްއެންޑީއެފް ޑޯނިއަރ ފްލައިޓާއި ކޯސްޓްގާޑް އެކޯ-905 ސީ އެމްބިއުލާންސް ކަމަށެވެ. ދޯނިން ކަނޑަށް ދޫވެ އޮޔާދާކަމަށް ބެލެވޭ ސާމާނުތަކެއް ފ.އަތޮޅުގެ އުތުރުން 1 ނޯޓިކަލް މޭލު ބޭރުން، ކޯސްޓްގާޑަށް ފެނިފައިވެއެވެ.
މިހާދިސާގެ މައުލޫމާތު އެމްއެންޑީއެފް ކޯސްޓްގާޑަށް ލިބިފައިވަނީ ޖަނަވަރީ 3 ވަނަ ދުވަހުގެރޭ 11:22 ހާއިރުއެވެ. އަދި މިދޯނި ދަތުރު ކުރަމުން ދިޔައީ، ފ. ފީއަލީ ކައިރިން ފާނަ މަސްވެރިކަމުގައި އުޅޭ ދޯނިފަހަރުން ފާނަ ގަނެގެން، މާލެއަށެވެ.
