ނައިފަރުގައި ސަރުކާރުން ހެދި 100 ހައުސިންގ ޔުނިޓް ލިބޭ މީހުންގެ ވަގުތީ ލިސްޓް އާންމުކޮށްފި
މިމަޝްރޫއަކީ ސަރުކާރުން 72.2 މިލިއަނަށްވުރެ ގިނަ ރުފިޔާ ޚަރަދުކޮށްގެން ކުރިއަށްގެންދާ މަޝްރޫއެއް
ޅ. ނައިފަރު
ސަރުކާރުގެ ބޯހިޔާވަހިކަމުގެ ވައުދުގެ ދަށުން ނައިފަރުގައި ސަރުކާއުން އިމާރާތްކުރި 100 ހައުސިންގ ޔުނިޓް ލިބޭ މީހުންގެ ވަގުތީ ލިސްޓް އާންމުކޮށްފި އެވެ.
ނައިފަރު ކައުންސިލުން އަންގާރަ ދުވަހު މި ލިސްޓް އާއްމުކޮށްފައި ވާއިރު 800 އެއްހާ މީހުން ވަނީ މި ހައުސިންގ ޔުނިޓްތައް ހޯދުމަށް ފޯމު ހުށައަޅާފައެވެ.
އެގޮތުން އެ ލިސްޓްގައި އެ ހުރިހާ ބޭފުޅުންގެ ނަމާއި އެޑްރެހާއި އައިޑީކާޑުގެ މައުލޫމާތާއި އެފަރާތަކަށް ލިބިފައިވާ ޖުމްލަ ޕޮއިންޓްގެ އިތުރުން އެފަރާތްތަކާއި ގުޅޭ އެހެނިހެން މައުލޫމާތުތައް ވެސް މި ލިސްޓްގައި ވަނީ ހިމަނަފާއެވެ.
މީގެއިތުރުން މިލިސްޓަށް ޝަކުވާ ހުށައެޅުމަށް އަންގާރަ ދުވަހުން ފެށިގެން މިމަހުގެ 12 ވަނަ ދުވަހުގެ 13:00އާ ހަމައަށް ފުރުސަތު ހުޅުވާލާފައިވާ ކަމަށްވެސް އެ ކައުންސިލުން ބުނެއެވެ.
ޝަކުވާ ހުށައަޅާނީ ނައިފަރު ކައުންސިލްގެ "އެކި އެކި ޝަކުވާތަކާއި ގުޅިގެން މައްސަލަ ހުށައަޅާ ފޯމް" މެދުވެރިކޮށް ނައިފަރު ކައުންސިލްގެ އިދާރާއަށެވެ. ނުވަތަ އީމެއިލްގެ ޒަރީއާއިން complain@naifaru.gov.mv މި އެޑްރެހަށް މެއިލް ކުރެއްވުމަށް ވަނީ އެދިވަަޑައިގެންފައެވެ.
ނައިފަރުގައި 100ހައުސިންގ ޔުނިޓް އިމާރާތްކުރުމުގެ މަޝްރޫއަކީ ސަރުކާރުން 72.2 މިލިއަނަށްވުރެ ގިނަ ރުފިޔާ ޚަރަދުކޮށްގެން ކުރިއަށްގެންދާ މަޝްރޫއެކެވެ.
