ރައީސް ހުންނެވީ ހުރިހާ ގައުމެއްގެ އެހީ ހޯއްދަވައިގެންވެސް، ޑްރަގްގެ ވަބާއިން ގައުމު ސަލާމަތް ކުރައްވަން

ރާއްޖޭގައި 9000އާ ގާތްކުރާ އަދަދަކަަށް ޑްރަގް ބޭނުންކުރާ މީހުން އުޅޭއިރު އޭގެ ތެރެއިން 10 އިންސައްތަ ވެސް ފަރުވާގެ ނިޒާމުގެ ތެރޭގައި ނެތެވެ. ކޮންމެ އަހަރަކުވެސް ހާހަކަށްވުރެ ގިނަ މީހުން ފަރުވާގައި ކިއޫގައި ތިބެންޖެހޭއިރު، އަހަރެއްގެ މައްޗަށް 400އާ 500އާ ދެމެދުގެ އަދަދެއްގެ މީހުން އަލަށް މަސްތުވާތަކެތި ބޭނުންކުރަން ފަށާކަމަށް ފުލުހުން ހާމަކޮށްފައިވެއެވެ. ދުވަހެއް ދުވަހަކަށް ރާއްޖޭގައި ޑްރަގްގެ ވިޔަފާރި ފުޅާވެ، އެކަމަށް ހުށައެޅެމުންދާ މީހުން އަދަދުވެސް އިތުރުވަމުންދާއިރު، މިއަދުގެ ސަރުކާރުން އޮތީ އެފަދަ މައްސަލަތަކުގައި ދޫދޭ ގޮތަކަށް ނޫނެވެ. ޑްރަގްގެ ވަބާއިން ގައުމު ސަލާމަތް ކުރުމަށް ކުރަމުންދާ މަސައްކަތްތަކަށް މެދުކެނޑުމެއް ނެތްކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއެވެ.

ނ ލަންދޫ ބަނދަރު ހުޅުވައިދެއްވުމުގެ ރަސްމިއްޔާތުގައި ވާހަކަ ދައްކަވަމުން ރައީސް ދެއްކެވި ވާހަކަފުޅުގައި ވިދާޅުވީ، މިއަދު މުޖުތަމައަށް ދިމާވެފައިވާ އެންމެ ބޮޑެތި މައްސަލަތަކުގެ ތެރޭގައި މަސްތުވާތަކެއްޗާ ގުޅުންހުރި މައްސަލަތައް ހިމެނޭ ކަމަށެވެ. ޑްރަގްގެ ވަބާއަށް އަލިއަޅުވާލައްވައި ރައީސް ވިދާޅުވީ، ގިނަ އަދަދުތަކުން ޑްރަގް އަތުލައިގަންނާތީވެސް ކަންބޮޑުވާ ބަޔަކު އެބައުޅޭ ކަމަށެވެ. އެހެންނަމަވެސް، ބަޔަކު ކަންބޮޑުވިނަމަވެސް މި މަސައްކަތް ހުއްޓާނުލައްވާނެކަމަށް ރައީސް ވިދާޅުވިއެވެ.

ރައީސް އެހެން ވިދާޅުވެފައިވާއިރު، އިދިކޮޅުން މިހާރު ކުރިއަށް ގެންދާ އިންޑިއާ އައުޓް ކެމްޕޭނާ ގުޅޭގޮތުންވެސް ގިނަ ބަޔަކު ދަނީ އެފަދަ ތުހުމަތުތައް ކުރަމުންނެވެ. އެގޮތުން ޑްރަގްގެ މައްސަލަތަކުގައި ސިޔާސީ ފަރާތްތަކެއްގެ އަތްތަކެއް ވާކަމަށް ބޮޑެތި ތުހުމަތުތައް ކުރެވިފައިވާއިރު، މިފަހަކަށް އައިސް ބޮޑެތި އަދަދުތަކުން ޑްރަގް އަތުލައިގަންނަމުން ދިއުމުގެ އެއް ސަބަބެއްގެ ގޮތުގައި އެފަދަ އޮޕަރޭޝަންތަކާ ގުޅިގެން ގައުމުތަކުން ހިއްސާކުރާ އިންޓެލިޖެންސް މައުލޫމާތާއި، ރާއްޖޭގެ ކަނޑުގެ ސަރަހައްދު ބަލައި މޮނިޓަރ ކުރުމަށް ހިންގަމުންދާ އޮޕަރޭޝަންތައް ހިމެނެއެވެ.

ވަކިން ޚާއްސަކޮށް އެ މަސައްކަތުގައި އިންޑިއާގެ އެހީވެސް ލިބެމުންދާއިރު، "އިންޑިއާ އައުޓް"ގެ ނަމުގައި ކުރިއަށް ގެންދާ ކެމްޕޭނަކީ ސިޔާސީ ބަޔަކު އަޑީގައި ތިބެ، މައުސޫމު ރައްޔިތުންތަކެއް މަގުތަކަށް ނެރިގެން ހިންގާ ހަރަކާތެއް ކަމަށް ބުނާ މީހުންވެސް މަދެއް ނޫނެވެ. ހަމައެކަނި މައްސަލައަކީ މިލިއަނުން ފައިދާލިބޭ ބޮޑު ވިޔަފާރިއަކަށް ހުރަސްއެޅުން ކަމަށް ގިނަ ބަޔަކު ބުނެއެވެ.

އިންޑިއާ އައުޓް ކެމްޕޭނަކީ ސޯޝަލް މީޑިއާ ބޮޓުންތަކެއް ހިންގާ ކެމްޕޭނެއް ކަމަށާއި، އެކަމުގެ ފަހަތުގައި ތިބީ މަސްތުވާތަކެތީގެ ވިޔަފާރީގެ ނެޓްވޯކުގައި ހިމެނޭ މީހުން ކަމަށް ޑިފެންސް މިނިސްޓަރ މާރިޔާ އަހުމަދު ދީދީވެސް ވިދާޅުވަނީ އެ ސަބަބާހުރެ ކަމަށް ވެދާނެއެވެ. އެގޮތުން އެ މީހުންނަކީ ޑްރަގުގެ ވިޔަފާރިއާއި ނެޓްވޯކްތަކާ ގުޅިފައިވާ ބައެއް ކަމަށާއި، އެމީހުންގެ ނުރުހުން އަމާޒުވަނީ އިންޑިއާއާއި ރާއްޖެ ގުޅިގެން މަސައްކަތް ކުރާތީކަމަށް މިނިސްޓަރުވެސް ވިދާޅުވެއެވެ.

ކޮންމެއަކަސް، ބަޔަކު ކިތަންމެ ނުރުހުނު ކަމުގައިވީނަމަވެސް، މަސްތުވާތަކެއްޗާ ދެކޮޅަށް މި ސަރުކާރުން ކުރަމުންދާ މަސައްކަތަށް މެދުކެނޑުމެއް ނެތްކަމުގެ ޔަގީންކަން ރައީސް ދެއްވައެވެ. ރައީސް ވިދާޅުވީ، ޑްރަގްގެ ވަބާގައި ޖެހި ޖީލުތައް ހަލާކުވެގެންދާތަން ބަލަން ސަރުކާރުން ނުތިބޭނެ ކަމަށެވެ. އަދި ލިބެން އޮތް ހުރިހާ ގައުމެއްގެ އެހީތެރިކަން ހޯދައިގެންވެސް، ޑްރަގްގެ ވަބާއިން ގައުމު ސަލާމަތް ކުރުމަށް ކުރަންޖެހޭ މަސައްކަތްތައް ކުރައްވާނެ ކަމުގެ ޔަޤީންކަން ރައީސް ވަނީ ދެއްވާފައެވެ.

ފާއިތުވި ދެތިން އަހަރު ތެރޭގައި ބޮޑެތި އަދަދުތަކުން މަސްތުވާތަކެތި އަތުލައިގެންފައިވެއެވެ. އެގޮތުން އެއް ފަހަރާ އެތައް ސަތޭކަ ކިލޯއެއްގެ މަސްތުވާތަކެތި އަތުލައިގަންނަމުންދާއިރު، ދާދި ފަހުންވެސް ވަނީ އެގޮތަށް އަތުލައިގެން ޑްރަގްތަކެއް ނައްތާލާފައެވެ. އެފަހަރުވެސް ޖުމުލަ 314 ކިލޯގެ ޑްރަގް ނައްތާލާފައިވެއެވެ.

މަސްތުވާތަކެތީގެ މައްސަލައަކީ ރާއްޖެއަށް ކުރިމަތިވެފައިވާ އެންމެ ބޮޑު އިޖުތިމާއީ އެއް މައްސަލައެވެ. ގިނަ އަދަދެއްގެ ޒުވާނުން އެ ވަބާގައި ޖެހެމުންދާއިރު، އެ ކުދިން އަލުން އަނބުރައި މުޖުތަމައަށް ނެރުމަށް ގާއިމުކޮށްފައިވާ ފަރުވާ ދިނުމުގެ ނިޒާމު ބަލިކައްޓެވެ. އެހެންކަމުން، ފަރުވާއަށް އެދި އެތައް ހާސް ޒުވާނުންނެއް މިއަދު ވެސް ކިޔޫގައި އެބަ ތިއްބެވެ. މިއަދުގެ ސަރުކާރުން ރަނގަޅު މާނައިގައި މަސްތުވާތަކެތި ނައްތާލައި ގާނޫނުތައް ތަންފީޒު ކުރުމަށް މަސައްކަތްތަކެއް ކުރަމުންދާކަމަށް ގިނަ ބަޔަކު ގަބޫލު ކުރެއެވެ. އެގޮތުން ޚުދު ރައީސުލްޖުމްހޫރިއްޔާގެ ބެއްލެވުމުގެ ދަށުން ތަންފީޒީ އިދާރާތަކުން މިކަންކަމަށް ފާރަވެރިވާ މިންވަރު އިތުރުވެފައިވާއިރު، ރައީސް ދާދި ފަހުން ވަނީ އެ މަސައްކަތަށް ޚާއްސަ ޓާސްކްފޯހެއްވެސް އެކުލަވާލައްވާފައެވެ.