މިނިސްޓްރީ އޮފް ހަޔާ އެޑިޔުކޭޝަނުން ޔޫއެންޑީޕީގެ އެހީގައި ދިވެހިރާއްޖޭގެ ކޮލެޖް އަދި ޔުނިވާސިޓީތަކުގެ ދަރިވަރުންނަށް އީ ލައިބްރަރީއެއްގެ ޚިދުމަތް ފޯރުކޮށްދޭން ފަށައިފިއެވެ.
މިނިސްޓްރީން ވިދާޅުވީ ކޮލެޖް އަދި ޔުނިވާސިޓީތަކުގެ ދަރިވަރުންނަށް ފޯރުކޮށްދެވޭނީ ޖޭސްޓޯ ލައިބްރަރީގެ ޚިދުމަތް ކަމަށެވެ. އަދި މި ޚިދުމަތް ފޯރުކޮށްދިނުމަށް މިނިސްޓްރީގައި ރަޖިސްޓަރީވެފައިވާ 14 ކޮލެޖް އަދި ޔުނިވާސިޓީއަކަށް ޖޭސްޓޯ ސަބްސްކްރިޕްޝަން ސެޓްފިކެޓް ހަޔާ އެޑިޔުކޭޝަން މިނިސްޓަރ ޑރ. އިބްރާހީމް ހަސަން ވަނީ ހަވާލުކޮށްދެއްވައިފައެވެ.
މީގެ އިތުރުން މަތީ ތައުލީމާއި ތަމްރީނުދޭ މަރުކަޒުތަކުން ހޯދަމުން އަންނަ ސްޓެޓިސްޓިކްސް ހޯދުމަށް މި އަހަރު އަލަށް ހެދިފައިވާ ޕޯޓަލް ވެސް ހަޔާ އެޑިޔުކޭޝަން މިނިސްޓަރު އިފްތިތާހުކޮށްދެއްވާފައިވެއެވެ.
މި ހަފްލާ ޝަރަފުވެރިކޮށްދެއްވާ ހަޔާ އެޑިޔުކޭޝަން މިނިސްޓަރު ޑރ. އިބްރާހީމް ހަސަން ދެއްކެވި ވާހަކަފުޅުގައި ވިދާޅުވީ ކިޔަވައިދިނުމުގައި މިފަދަ ލައިބްރަރީއެއްގެ ޚިދުމަތް ދަރިވަރުންނާއި މުދައްރިސުންނަށް ވަރަށް މުހިންމުކަމަށެވެ. އެގޮތުން ޖޭސްޓޯ ފަދަ އީ-ލައިބްރަރީއެއްގެ ސާވިސް ލިބުމުގެ ސަބަބުން ދަރިވަރުންގެ ކިޔެވުމުގެ ފެންވަރު އިތުރަށް ހަރުދަނާވެގެންދާނެ ކަމަށް މިނިސްޓަރު ވިދާޅުވިއެވެ.
އަދި އަލަށް ތައާރަފުކުރެވުނު ޕޯޓަލް މެދުވެރިކޮށް ތަފާސްހިސާބު ހޯދަން ފެށުމުން މިނިސްޓްރީއަށް ބޭނުންވާ ތަފާސްހިސާބުތައް ފަސޭހަކަމާއެކު ލިބޭނެ ކަމަށާއި މިނިސްޓްރީން މަތީ ތައުލީމާއި ގުޅޭ ކަންކަމުގައި ހަދާ އުސޫލުތައް ހެދުމުގައި މި މައުލޫމާތުގެ ބޭނުންކުރެވި ހަރުދަނާ އުސޫލުތަކެއް ހެދިގެންދާނެކަމަށް ވެސް ވިދާޅުވިއެވެ.
