ފާއިތުވި 2021 ވަނަ އަހަރު ރާއްޖެ އައީ ޖުމްލަ 1،321،932 ފަތުރުވެރިން ކަމަށް ޓޫރިޒަމް މިނިސްޓްރީން ހާމަކޮށްފިއެވެ.

ޓޫރިޒަމް މިނިސްޓްރީން ވަނީ 2021 ވަނަ އަހަރު ރާއްޖެ އައި ފަތުރުވެރިންނާއި، މަހެއްގެ މައްޗަށް އައި ފަތުރުވެރިންނާއި ދުވާލެއްގެ މައްޗަށް އައި ފަތުރުވެރިންނާއި، ވަކި ވަކި މާކެޓްތަކުން އައި ފަތުރުވެރިންގެ މައުލޫމާތުތައް ހިއްސާކޮށްފައެވެ.

އެގޮތުން 2021 ވަނަ އަހަރުގެ ޖެނުއަރީ މަހު ރާއްޖެ އައިސްފައިވަނީ 92،103 ފަތުރުވެރިންނެވެ. ފެބްރުއަރީ މަހު 96،882 ފަތުރުވެރިން އައިސްފައިވާއިރު، މާޗް މަހު 109،585 ފަތުރުވެރިން، އޭޕްރިލް މަހު 91،200 ފަތުރުވެރިން، މެއި މަހު 64،613 ފަތުރުވެރިން، ޖޫން މަހު 56،166 ފަތުރުވެރިން، ޖުލައި މަހު 101،818 ފަތުރުވެރިން، އޮގަސްޓު މަހު 143،599 ފަތުރުވެރިން، ސެޕްޓެމްބަރ މަހު 114،896 ފަތުރުވެރިން، އޮކްޓޯބަރު މަހު 142،066 ފަތުރިވެރިން، ނޮވެމްބަރު މަހު 144،725 ފަތުރުވެރިން އަދި ޑިސެމްބަރު މަހު 164،279 ފަތުރުވެރިން ވަނީ ރާއްޖެ އައިސްފައެވެ. ޖުމްލަ 1،321،932 އަށް އަރާއިރު، މިއީ ކޮވިޑް-19ގެ ހާލަތުގެ ކުރިން 2019 ގައި ރާއްޖެ އައި ފަތުރުވެރިންނަށްވުރެ 22.4 އިންސައްތަ ދަށް އަދަދެކެވެ. 2019 ވަނަ އަހަރު 1،702،887 ފަތުރުވެރިން ވަނީ ރާއްޖެ އައިސްފައެވެ.

2021 ވަނަ އަހަރު ދުވާލެއްގެ މައްޗަށް 3،622 ފަތުރުވެރިން އައިސްފައިވާކަމަށް ޓުއަރިޒަމް މިނިސްޓްރީން ބުނެފައިވެއެވެ. އަދި 8 ރޭ ރާއްޖޭގައި މަޑުކުރާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.

އަހަރު ނިމުނުއިރު އެންމެ ގިނަ ފަތުރުވެރިން އަންނަ މާކެޓުގެ ގޮތުގައި އޮތީ އިންޑިއާ މާކެޓެވެ. އެގޮތުން މިދިޔަ އަހަރު އައި ފަތުރުވެރިންގެ 22.1 އިންސައްތަ ހިއްސާކުރަނީ އިންޑިއާ މާކެޓުންނެވެ. ދެވަނައިގައި ރަޝިއާ އޮތްއިރު ރަޝިއާއިން އައި ފަތުރުވެރިން ވަނީ 16.8 އިންސައްތަ ހިއްސާކޮށްފައެވެ. ލިސްޓުގެ ތިންވަނައިގައި ޖަރުމަނު އޮތްއިރު ޖަރުމަނު ފަތުރުވެރިން ވަނީ 7.2 އިންސައްތަ ހިއްސާކޮށްފައެވެ. މި ތިން ގައުމުގެ އިތުރުން ޓޮޕް މާކެޓްތަކުގެ ތެރޭގައި ހިމެނެނީ ޔޫކޭ، ޔޫއެސް، ސައުދި އަރަބިއާ. ސްޕެއިން، ޔޫކްރެއިން، ފްރާންސް އަދި އިޓަލީއެވެ.

ޓޫރިޒަމް މިނިސްޓްރީން ބުނީ ޓޫރިސްޓް އެކޮމޮޑޭޝަން ފެސިލިޓީތަކުގެ ތެރެއިން 929 ފެސިލިޓީއެއް މިވަގުތު ޚިދުމަތަށް ހުޅުވާލާފައިވާކަމަށެވެ. މީގެ ތެރޭގައި ހިމެނެނީ 161 ރިސޯޓާއި، 613 ގެސްޓްހައުސް، 145 ސަފާރީ އަދި 10 ހޮޓެލްއެވެ. މި 929 ފެސިލިޓީގައި ޖުމްލަ 53،160 ބެޑް ކެޕޭސިޓީ އެބަހުރި ކަމަށް ޓޫރިޒަމް މިނިސްޓްރީން ހާމަކޮށްފައިވެއެވެ.

2021 ވަނަ އަހަރު ނިމުމުގެ ކުރިން 1 މިލިއަން ފަތުރުވެރިން ގެނައުމަށް މި ސަރުކާރުން ވަނީ އަމާޒު ހިފާފައެވެ. އަހަރު ނިމެން 2 މަސް ބާކީ އޮއްވައި ވަނީ މި އަމާޒަށް ވާސިލްވެފައެވެ. އެއަށްފަހު އަހަރު ނިމުމުގެ ކުރިން 1.3 މިލިއަން ފަތުރުވެރިން ގެނައުމަށް އަމާޒު ހިފީއެވެ. މި އަމާޒަށްވެސް އަހަރު ނިމުމުގެ ކުރިން ވާސިލްވެފައިވެއެވެ. އެހެންކަމުން 2022 ވަނަ އަހަރު 2 މިލިއަން ފަތުރުވެރިން ގެނައުމަށް ސަރުކާރުން ވަނީ އަމާޒު ހިފާފައެވެ.