އިނގިރޭސި ޕްރިމިއާ ލީގުގައި ފަހަތުން އަރައި ޗެލްސީން ލިވަޕޫޕް މޮޅުވިޔަނުދީ ހިފަހައްޓައިފިއެވެ.

ލީގު ތާވަލުގެ ދެވަނައިގައި އޮތް ޗެލްސީ އާއި ތިންވަނައިގައި އޮތް ލިވަޕޫލް އާދީއްތަ ދުވަހުގެރޭ ބައްދަލުކުރި މެޗު އެއްވަރުވީ 2-2 ގެ ނަތީޖާއަކުންނެވެ.

ލިވަޕޫލުން މި މެޗަށް ނުކުތީ އެ ޓީމުގެ ކޯޗު ޔާގެން ކްލޮޕާ ނުލައެވެ. ކްލޮޕާއި ލިވަޕޫލުގެ ތިން ކުޅުންތެރިން ވަނީ ކޮވިޑަށް ޕޮޒިޓިވްވެފައެވެ. ޕޮޒިޓިވްވި ތިން ކުޅުންތެރިންނަކީ ގޯލްކީޕަރު އެލިސަން ބެކާ އާއި ޑިފެންޑަރު ޖޮއެލް މަޓިޕް އަދި ފޯވާޑް ރޮބާޓޯ ފިރްމީނޯ އެވެ.

ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ގޯލަށް ނުރައްކާކޮށް ހަމަލާއެއް އުފައްދާފައިވަނީ ޗެލްސީންނެވެ. އެ ޓީމުގެ ކްރިސްޓިއަން ޕުލިސިޗް ފޮނުވާލި ހަމަލާ ލިވަޕޫލްގެ ކީޕަރު ކެލަހާ ވަނީ ހުޝިޔާރުކަމާއެކު ދިފާއުކޮށްފައެވެ.

މެޗުގެ 9 ވަނަ މިނެޓުގައި ލިވަޕޫލުން ވަނީ ލަނޑު ޖަހާ ލީޑު ނަގައިފައެވެ. ޗެލްސީގެ ޑިފެންޑަރު ޓްރެވޯ ޗަލޮބާ ހެދި ގޯހެއްގެ ފައިދާ ނަގައި މި ލަނޑު ލިވަޕޫލަށް ކާމިޔާބުކޮށްދިނީ ސާޑިއޯ މާނޭއެވެ. އަދި މެޗުގެ 26 ވަނަ މިނެޓުގައި ލިވަޕޫލުން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް މުހައްމަދު ސަލާހެވެ.

ފުރަތަމަ ހާފު ނިމުމުގެ ކުރިން ޗެލްސީން ވަނީ ގާތް ގާތުގައި ދެ ލަނޑު ޖަހައި ނަތީޖާ ހަމަހަމަ ކޮށްފައެވެ. މެޗުގެ 42 ވަނަ މިނެޓުގައި އެ ޓީމުގެ ފުރަތަމަ ލަނޑު ކާމިޔާބުކޮށްދިނީ މަޓެއޯ ކޮވަސިޗްއެވެ. އަދި ފުރަތަމަ ހާފުގެ އިތުރު ވަގުތުގައި ދެވަނަ ލަނޑު ޖަހައިދިނީ ޕުލިސިޗެވެ.

ދެ ވަނަ ހާފުގައި ލިވަޕޫލަށް އަލުން ލީޑުނަގައިދޭން ސަލާހާއި މާނޭ ފޮނުވާލި ބޯޅަތައް ޗެލްސީގެ ކީޕަރު މެންޑީ ވަނީ މަތަކޮށްފައެވެ.

މި ނަތީޖާއާއެކު މެންޗެސްޓާ ސިޓީއަށް ވަނީ ލީގު ތާވަލުގެ އެއްވަނައިގައި 10 ޕޮއިންޓްގެ ލީޑެއް ލިބިފައެވެ. ސިޓީ އެއްވަނައިގައި އޮތީ ކުޅުނު 21 މެޗުން ލިބުނު 53 ޕޮއިންޓާއެކުގައެވެ. ދެވަނައިގައި އޮތް ޗެލްސީއަށް 21 މެޗުން 43 ޕޮއިންޓް ލިބިފައިވާއިރު ތިންވަނައިގައި ލިވަޕޫލް އޮތީ އެއް މެޗު މަދުން ކުޅެ ލިބުނު 42 ޕޮއިންޓާއެކުގައެވެ.