ލަމްހާގެ ބަންދުގެ މުއްދަތު އިތުރުކޮށްފި
ލަމްހާ ހައްޔަރުކުރިފަހުން ބަންދުގެ މުއްދަތު އިތުރުކުރި މިއީ ދެވަނަ ފަހަރު
ަހަލީމަތު ލަމްހާއާއި މޭރީގެ ފިރިމީހާ މާވިން
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސް މަރާލި މައްސަލައިގައި ހައްޔަރުކުރި ދިވެހި އަންހެން ކުއްޖާގެ ބަންދުގެ މުއްދަތު އަނެއްކާވެސް އިތުރުކޮށްފިއެވެ.
މަރުގެ މައްސަލައިގައި ހައްޔަރުކޮށްފައިވާ، ހަލީމަތު ލަމްހާއަކީ މޭރީގެ ފިރިމީހާ މާވިންއާ ލޯބީގެ ގޮތުން ގުޅުން އޮންނަ މީހެކެވެ. މޭރީގެ މަރުގެ މައްސަލައިގައި މާވިންވެސް ވަނީ ހައްޔަރުކޮށްފައެވެ. ލަމްހާ ހައްޔަރުކޮށްފައިވަނީ މިދިޔަ ޑިސެމްބަރު މަހުގެ 16 ވަނަ ދުވަހުއެވެ. އެއަށްފަހު އޭނާގެ ބަންދުގެ މުއްދަތު އިތުރުކުރި މިއީ ދެވަނަ ފަހަރެވެ.
ލަމްހާގެ ބަންދަށް އެންމެ ފުރަތަމަ މުއްދަތު ޖަހާފައިވަނީ ޑިސެމްބަރު 16 ވަނަ ދުވަހުއެވެ. އެ ދުވަހު ލަމްހާގެ ބަންދަށް 15 ދުވަސް ވަނީ ޖަހާފައެވެ. މި މުއްދަތު ހަމަވުމުން އަނެއްކާވެސް ބަންދުގައި ބެހެއްޓުމަށް 15 ދުވަހުގެ މުއްދަތެއް ވަނީ ޖަހާފައެވެ.
އައިޖީއެމްއެޗްގެ ޑައިލިސިސް ސެންޓަރުގައި މަސައްކަތް ކުރަމުންދިޔަ މޭރީ ގްރޭސްގެ މަރުގެ މައްސަލައިގައި ފުލުހުން އެންމެ ފުރަތަމަ ހައްޔަރުކޮށްފައިވަނީ އޭނާގެ ފިރިމީހާ މާވިން އެވެ. އެއީވެސް އައިޖީއެމްއެޗްގައި މަސައްކަތް ކުރަމުންދާ ނަރުހެކެވެ. މޭރީގެ މަރުގެ ތުހުމަތުގައި އޭނާ ހައްޔަރުކުރީ 27 އޮކްޓޯބަރު ވީ ބުދަ ދުވަހުއެވެ.
މޭރީގެ މަރުގެ ތަހުގީގު ނިންމައި ދައުވާކޮށްދިނުން އެދި ފުލުހުންގެ ފަރާތުން ޕީޖީ އޮފީހަށް ފޮނުވާފައިވަނީ ޑިސެމްބަރު 19 ވަނަ ދުވަހުއެވެ. އެ މައްސަލައާމެދު މި ހަފްތާގެ އަންގާރަ ދުވަހުގެ ކުރިން ގޮތެއް ނިންމާނެކަމަށް ޕީޖީ އޮފީހުން ބުނެއެވެ.
މޭރީ ގްރޭސްގެ މަރާ ގުޅިގެން ފުލުހުން ތުހުމަތުތައް ކުރަން ފެށީ، ދަން ޖެހިފައި ހުރި ކަމަށް ބުނެ އޭނާ ހޮސްޕިޓަލަށް ގެންދިޔަ ނަމަވެސް، އޭނާގެ ހަށިގަނޑުން ދަން ޖެހިފައި ހުރިކަމުގެ ނިޝާނެއް ފެންނަން ނެތުމުންކަމަށް މައުލޫމާތު ލިބެއެވެ. އެހެންކަމުން އޭނާ މަަރުވި ސަބަބު ދެނެގަތުމަށް ފުލުހުން ވަނީ އޭނާގެ ހަށިގަނޑު އިންޑިއާއަށް ފޮނުވައިގެން ޕޯސްޓްމޯޓަމް ހަދާފައެވެ. ޕޯސްޓްމޯޓަމަށް ފަހު އޭނާގެ ހަށިގަނޑު އަނބުރާ ގެނެސްފައިވަނީ ނޮވެމްބަރު މަހުގެ 7 ވަނަ ދުވަހުއެވެ. އަދި ނޮވެމްބަރު 10 ވަނަ ދުވަހު އާއިލާއާ ހަވާލުކުރުމަށް ފިލިޕީންސަށް އޭނާގެ ހަށިގަނޑު ވަނީ ފޮނުވާފައެވެ.
ޕޯސްޓްމޯޓަމް ރިޕޯޓުން އެނގޭގޮތުގައި މޭރީ މަރުވެފައިވަނީ ލިބުނު ޒަޚަމްތަކުގެ ސަބަބުންނެވެ. މި ރިޕޯޓާ ގުޅިގެން ފުލުހުން ބުނެފައިވަނީ, އޭނާ މަރުވެފައިވަނީ ދަންޖެހިގެން ކަމަށް ނުބެލެވޭ ކަމަށެވެ. އަދި މަރުވެފައިވަނީ ލިބުނު ޒަޚަމްތަކެއްގެ ސަބަބުން ކަމަށެވެ. ބްލަންޓް އިންޖަރީއަކީ ގަދަކަމުން މީހަކަށް އަނިޔާއެއްދީގެން ނުވަތަ އެއްޗަކުން ޖަހައިގެން ލިބޭ އަނިޔާއަކުން ނުވަތަ ގެއްލުމަކުން ވާ މަރެކެވެ.
