މިފްކޯގެ ތާރީޚުގައިވެސް އެންމެ ގިނަ މަސް ކިރާފައިވަނީ ނިމިދިޔަ ޑިސެމްބަރު މަހު
މިހާރު ހުރި މައްސަލަތައް ހައްލު ކުރުމުގެ މަސައްކަތް ދަނީ ކުރަމުން
މިފްކޯގެ މެނޭޖިން ޑައިރެކްޓަރ އިސްމާއިލް ފައުޒީ- ފައުޒީ ވަނީ މި ދާއިރާގައި ހުރި މައްސަލަތައް ޙައްލު ކުރުމުގެ މަސައްކަތް ކުރަމުންދާކަމަށް ވިދާޅުވެފައި
މިފްކޯގެ ތާރީޚުގައިވެސް އެންމެ ގިނަ މަސް ކިރާފައިވަނީ ނިމިދިޔަ ޑިސެމްބަރު މަހުކަމަށް މިފްކޯއިން ބުނެފިއެވެ.
ރާއްޖެއެމްވީއާ ވާހަކަ ދައްކަވަމުން މިފްކޯގެ މެނޭޖިން ޑައިރެކްޓަރ އިސްމާއިލް ފައުޒީ ވިދާޅުވީ، ޑިސެމްބަރު މަހަކީ ތާރީޚުގައިވެސް މަހެއްގެ މައްޗަށް އެންމެ ގިނައިން މަސް ކިރާފައިވާ މަހުގެ ގޮތުގައި ފާހަގަވެފައިވާ ކަމަށެވެ. އެގޮތުން ޑިސެމްބަރު މަހު އެކަނިވެސް 10،948 ޓަނުގެ މަސް ކިރާފައިވާއިރު، އޭގެ ޖުމުލަ އަގު 170،870،761ށް އަރައެވެ.
ފައުޒީ ވިދާޅުވީ، އެއީ މުވައްޒަފުންގެވެސް ބުރަ މަސައްކަތް ކަމަށެވެ. އަދި މިހާރު ވަސީލަތްތައް ހުރި ގޮތުން މަސްވެރިންނާއެކު މަޝްވަރާކޮށް، މިހާރު ހުރި މައްސަލަތައް ޙައްލު ކުރުމުގެ މަސައްކަތް ކުރައްވަމުން ގެންދަވާކަމަށް ފައުޒީ ވިދާޅުވިއެވެ.
އޭގެ އިތުރުން މުޅި އަހަރަށް ބަލާއިރު 58،350 ޓަނުގެ މަސް ކިރާފައިވާއިރު، ޖުމުލަ އަގު 901،786،841ށް އަރާކަމަށް މިފްކޯއިން މައުލޫމާތު ދެއެވެ. މި ސަރުކާރު ވެރިކަމަށް އައުމަށްފަހުވެސް އަހަރަކުން އަހަރަކަށް މިފްކޯއިން މަސް ކިރާވަރު ވަނީ ބޮޑުތަނުން އިތުރުވެފައެވެ.
މިދުވަސްވަރު ރާއްޖޭގެ މަސްވެރިކަން އާދަޔާއި ޚިލާފަށް ރަގަޅުވެ، ހުރިހާ ހިސާބެއްގެ ދޯނިފަހަރު އެއްފަހަރާ އެކުންފުނީގެ ސެންޓަރުތަކާއި ބޯޓުފަހަރަށް މަސްކިރުވުމަށް އަންނަމުންދާތީ، މިފްކޯގެ ފްރީޒިންގ ކެޕޭސިޓީއަށް ވުރެ އިތުރަށް މަސް ލިބެމުން ދިއުމާއެކު މަސްކިރުވުމަށް ދަތިތަކާވެސް ވަނީ ދިމާވެފައެވެ. އެ ކުންފުނީގެ މަސް ގަތުމުގެ ކެޕޭސިޓީ އަށް ގެނެސްފައިވާ ހެޔޮ ބަދަލާއެކު މިހާރު ދުވާލަކު 400 ޓަނާއި 500 ޓަނުގެ މަސް ގަންނަމުންދާކަމަށް މިފްކޯއިން ބުނެފައިވެއެވެ.
ސަރުކާރުން ވަރަށްބޮޑު ހޭދައެއް ކޮށްގެން މިިފްކޯގެ ވަރަށް ގިނަ ވަސީލަތްތަކެއް ތަރައްގީކުރުމަށް މަސައްކަތް ކުރަމުން ދާއިރު ވަރަށް ގިނަ ކަންކަން މިހާރުވެސް ރަނގަޅު ކުރެވިފައިވާ ކަމަށް އެ ކުންފުނީގެ މެނޭޖިންގ ޑިރެކްޓަރު އިސްމާޢީލް ފައުޒީ މީގެ ކުރިން ވަނީ ވިދާޅުވެފައެވެ.
