ޗައިނާގެ ޚާރިޖީވަޒީރުގެ ރަސްމީ ދަތުރުފުޅު: މުހިންމު އެއްބަސްވުންތަކެއްގައި ސޮއިކުރާނެ

ޗައިނާގެ ސްޓޭޓް ކައުންސިލަރ އަދި ފޮރިން މިނިސްޓަރު ވަންގް ޔީ، ރާއްޖެއަށް ކުރައްވާ ރަސްމީ ދަތުރުފުޅުގައި މުހިންމު އެއްބަސްވުންތަކެއްގައި ސޮއިކުރާނެ ކަމަށް އދ.ގެ އާންމު މަޖިލީހުގެ ރައީސް އަދި ރާއްޖޭގެ ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

މިދަތުރުފުޅާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ޝާހިދު ވިދާޅުވީ މިއީ އެމަނިކުފާނުގެ ދައުވަތަކަށް ޗައިނާ ފޮރިން މިނިސްޓަރު ކުރައްވާ ދަތުރުފުޅެއް ކަމަށެވެ.

މިދަތުރުފުޅާއެކު ރާއްޖެއާއި ޗައިނާއާ ދެތެރޭގައި ޒަމާނުއްސުރެ އޮތް ގާތްގުޅުން އިތުރަށް ބަދަހިވެގެންދާނެ ކަމަށް ޝާހިދު ވިދާޅުވިއެވެ. ޝާހިދު ވިދާޅުވީ 2022 ވަނަ އަހަރަކީ ޗައިނާއާ ރާއްޖެއާ ދެމެދު ސިޔާސީ ގުޅުން ގާއިމްކުރިތާ 50 އަހަރު ފުރޭ އަހަރު ކަމަށްވާތީ އައު ކަންތައްތަކެއް ލޯންޗު ކުރުމަށް ދެސަރުކާރު ދެމެދުގައި މަޝްވަރާތައް ކުރަމުންދާ ކަމަށެވެ. އަދި ވިދާޅުވީ ދެގައުމު ގުޅިގެން ކުރެވޭނެ މަސައްކަތްތަކާއި، އިތުރަށް ގުޅުން ބަދަހިކުރަންވީ ދާއިރާތަކާއި ބެހޭ ގޮތުން ފުޅާދާއިރާގައި މަޝްވަރާ ބައްދަލުވުންތައް ކުރިއަށްދާނެ ކަަމަށާއި، މުހިންމު އެއްބަސްވުންތަކެއްގައި ސޮއިކުރާނެ ކަމަށެވެ.

ވަންގް ޔީގެ މި ދަތުރުފުޅުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހާ ބައްދަލުކުރައްވާނެއެވެ.

މިނިސްޓަރ ވަންގް ޔީ ރާއްޖެ ވަޑައިގެންނެވުމަށް ހަމަޖެހިފައިވަނީ އަންނަ އަހަރުގެ ޖެނުއަރީ 7ން 8 އަށެވެ. މި ދަތުރުފުޅާއި ގުޅިގެން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލިޒިން ވިދާޅުވީ ދެގައުމުގެ މަސައްކަތުން މި ދަތުރަކީ ކާމިޔާބު ދަތުރަކަށް ވާނެ ކަމަށް ގަބޫލުފުޅުކުރައްވާ ކަމަށެވެ.