މީހުން ދިރިއުޅޭ ސަރަހައްދާ ދުރަށް އިންޖީނުގެތައް ގެންދިޔުމުގެ ވައުދުގެ 99 އިންސައްތަ ފެނަކައިން ހާސިލުކޮށްފި

މީހުން ދިރިއުޅޭ ސަރަހައްދުތަކުގައި ހުރި އިންޖީނުގެތައް އެކަހެރި ސަރަހައްދުތަކަށް ބަދަލު ކުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް ވެ ވަޑައިގެންނެވި ވައުދުގެ 99 އިންސައްތަ ހާސިލުކުރެވިފައިވާކަމަށް ފެނަކަ ކޯޕަރޭޝަނުން ބުނެފިއެވެ.

އިންޖީނުގެތައް މީހުން ދިރިއުޅޭ ސަރަހައްދުތަކާ އެކަހެރި ކުރުމަކީ ރައީސް އިބްރާހިމް މުހައްމަދު ޞާލިޙްގެ ރިޔާސީ ވައުދަކަށްވާއިރު އެވައުދު ފުއްދުމަށްޓަކައި އިންޖީނުގެތައް އާންމުން ދިރިއުޅޭ ސަރަަޙައްދާ ދުރަށް ގެންދިޔުމުގެ މަސައްކަތް ފެނަކައިން އައީ ފާއިތުވި ދެ އަހަރު ކުރަމުންނެވެ. އެގޮތުން އެންމެ ފަހުން މ. ރަތްމަންދޫގައި އަލަށް އިމާރާތްކުރެވޭ އިންޖީނުގެ އާއި އޮފީސް އިމާރާތުގެ ބިންގާއާއެކު އެވައުދުގެ 99 އިންސައްތަ މިވަނީ ފުރިހަމަވެފައިކަމަށް ފެނަކައިން ބުނެއެވެ. މ. ރަތްމަންދޫގައި އަލަށް އިމާރާތްކުރެވޭ އިންޖީނުގެ އާއި އޮފީސް އިމާރާތުގެ ބިންގާ އަޅުއްވާދެއްވާފައިވަނީ ފެނަކަ ކޯޕަރޭޝަންގެ އެމް.ޑީ އަޙުމަދު ސައީދު އާއި ދިއްގަރު ދާއިރާގެ މެންބަރު އިކްރާމް ހަސަން އަދި ރަތްމަންދޫގެ ކައުންސިލް ރައީސް އިސްމާއިލް ނާހިދުއެވެ.

ފެނަކައިން މަސައްކަތްކުރަމުންދިޔައީ މި އަހަރު ތެރޭގައި 50 އިންޖީނުގެ ބަދަލުކޮށް ނިންމުމަށެވެ. މިހާރު އިންޖީނުގެތައް ބަދަލުކުރުމުގެ މަސައްކަތް ކުރިޔަށްނުދަނީ ތިން ރަށެއްގައި ކަމަށް ފެނަކައިން ބުނެއެވެ. 2020 ވަނަ އަހަރު ވަނީ 28 އިންޖީނުގެއެއް ފެނަކައިން ބަދަލުކޮށްފައެވެ.

ކަރަންޓު ދިނުމުގެ މަސައްކަތުގެ އިތުރުން ފެނާއި ނަރުދަމާ ގާއިމް ކުރުމުގެ މަޝްރޫއުތަކުގައި ވެސް ފެނަކައިގެ ހިއްސާބޮޑެވެ. އެގޮތުން ފެނާއި ނަރުދަމާގެ ޚިދުމަތްތައް ގާއިމްކުރެވިފައި ނެތް ރަށްރަށުގައި ޚިދުމަތް ގާއިމްކުރުމުގެ މަސައްކަތް ޑިސެމްބަރ މަހުގެ 29 ވަނަ ދުވަހު ކޮންޓްރެކްޓަރުންނާ ޙަވާލުކުރެވިގެން ދިޔައިރު އޭގެ ތެރެއިން 70 އިންސައްތަ މަސައްކަތް ހަވާލުކޮށްފައިވަނީ ފެނަކަ ކޯޕަރޭޝަނާއެވެ.