ދިވެހިރާއްޖޭގެއަޑުގެ ހަގީގީ 52 އަހަރު!

ދިވެހިރާާއްޖޭގައި ރޭޑިއޯގެ ޚިދުމަތް ފެށުނީ މީގެ 59 އަހަރު ކުރިން، 29 ޑިސެންބަރު 1962ގައި ސަރުކާރުގެ ވެރިން އަމިއްލަ ހައިސިއްޔަތުން ފެއްޓެވި ކަމެއްގެ ގޮތުގައެވެ.

އެއަށްފަހު ސިނަމާ ކުންފުނިން 12 މާރިޗު 1964ގައި ސިނެކޯ ރޭޑިއޯ ހިންގަން ފެށިއެވެ. މިތަންތަން ހުއްޓުނެވެ. ސަރުކާރުގެ ފަރާތުން ރޭޑިއޯގެ ޚިދުމަތް ފެއްޓެވީ 11 ސެޕްޓެންބަރު 1966ގައި، ވުޒާރަތުލްމާލިއްޔާ ބ. ކަމުގައިވި މޯލްޑިވް އައިލެންޑްސް ބްރޯޑްކާސްޓިން ސަރވިސްގެ ނަމުގައެވެ. މިހާތަނަށް މެދުނުކެނޑި ހިނގަމުންދާ ރާއްޖޭގެ ރޭޑިއޯ ސްޓޭޝަން ކަމުގައިވާ ރޭޑިއޯ މޯލްޑިވްސް އުފެދުނީ 16 ފެބުރުއަރީ 1969ގައެވެ.

ރޭޑިއޯ މޯލްޑިވްސްގެ ނަން ދިވެހިރާއްޖޭގެ އަޑު މިނަމަށް ބަދަލުވީ 19 ޖަނަވަރީ 1980ގައެވެ. ވީމާ ދިވެހިރާއްޖޭގެ އަޑުގެ ނަމަށް މިއަހަރު މިވީ 41 އަހަރެވެ. ރޭޑިއޯ މޯލްޑިވްސް 1969 އިން ފެށިގެން ހަގީގީ 52 އަހަރެވެ. 1970، 1980، 1990ގެ އަހަރުތައް ހިމެނިފައި ވަނީ، ރާއްޖޭގައި ރޭޑިއޯގެ ރަންޒަމާނުގެ ގޮތުގައެވެ. މުޅި ރާއްޖޭގެ އެންމެހައި ކަންކޮޅުތަކަށް ވަގުތުން ވަގުތަށް ޚިދުމަތް ލިބެންފެށި ހަމައެކަނި މީޑިއާއަކީ އަދި މުއާސަލާތުގެ ވަސީލަތަކީ ދިވެހިރާއްޖޭގެ އަޑެވެ. މިއީ ދިވެހިރާއްޖޭގެ އަޑަށް ލިބިފައިވާ އެންމެ ބޮޑު ތާރީޚީ ޝަރަފާއި ފަޚުރެވެ.

ރާއްޖޭގެ އާންމު ހޭލުންތެރިކަމާއި ރައްޔިތުންގެ ފައިދާއާއި ކުރިއެރުމަށް އެންމެ ގިނަގުނަ ޚިދުމަތްތަކެއް ގައުމީ ގޮތުން، އަދާކޮށްފައިވާ މީޑިއަކީ ދިވެހިރާއްޖޭގެ އަޑެވެ. ރާއްޖެއާ ދުނިޔޭގެ ޚަބަރާއި މައުލޫމާތާއި، ދީނީ، ގައުމީ، ތައުލީމީ، ސިއްހީ، އިޖުތިމާއީ، ބަހަވީ، އަދަބީ، ސަގާފީ، އަދި ކުޅިވަރާއި މުނިފޫހިފިލުވުމުގެ ރޮނގުތަކުން ދިވެހިރާއްޖޭގެ އަޑުން ކޮށްފައިވާ ގައުމީ ޚިދުމަތްތަކާއި އަދާކޮށްފައިވާ ގައުމީ ދައުރަކީ ދިވެހި ތާރީޚުގައި ލާމަސީލު ނަމޫނާއެކެވެ.

ގައުމީ މުނާސަބަތުތަކާއި އިހުތިފާލުތައް ފާހަގަކުރުމުގައާއި އެ ކަންކަން ރައްޔިތުންނަށް ވަގުތުން ގެނެސްދިނުމުގައި އެންމެބޮޑު ދައުރެއް އަދާކޮށްފައިވާ މީޑިއާއަކީވެސް ދިވެހިރާއްޖޭގެ އަޑެވެ. މިއަދުގެ ކުރިއަރާފައިވާ މައުލޫމާތާއި، މުއާސަލާތާއި ޓެކްނޮލޮޖީގެ ޒަމާނުގައިވެސް ރޭޑިއޯގެ ދައުރު ވަރަށް މުހިންމެވެ.

ތިމާވެށީގެ މައްސަލަތަކާއި ކާރިސާތަކާއި ހާދިސާތަކުގައި ޚަބަރާއި މައުލޫމާތު ފަތުރަން އެންމެ ފަސޭހަ ވަސީލަތް ކަމުގައިވުމެވެ. މަސްވެރިންނާއި ދަނޑުވެރިންނާއި މަސައްކަތްތެރިންނަށް މަސައްކަތުގެ މާހައުލުގައި މަސައްކަތް ކުރަމުން ބޭނުންކުރެވޭ ވަސީލަތަކަށް ވުމެވެ. އަދި މިނޫންވެސް އިލްމާއި ހޭލުންތެރިކަމާއި ޚަބަރާއި މައުލޫމާތާއި މުނިފޫހިފިލުވުމުގެ ގޮތުންވެސްމެއެވެ.

2004ގެ ސުނާމީ ކާރިސާއަށްފަހު އެކަށައެޅުނު ރާއްޖޭގެ އިމަޖެންސީ ކޮމިއުނިކޭޝަން ޕްލޭނުގައިވެސް ރޭޑިއޯގެ މުހިންމުކަން ވަނީ ފާހަގަކުރެވިފައެވެ. ވީމާ ގައުމީ ބޭނުންތަކާއި ރައްޔިތުންގެ ފައިދާއާއި ކުރިއެރުމަށްޓަކައި ރާއްޖޭގެ ގައުމީ ރޭޑިއޯ ސްޓޭޝަން އިތުރަށް ތަރައްގީކޮށް ކުރިއެރުވުމަށް މިއަދު މިވަނީ އިސްކަން ދޭންޖެހިފައެވެ.