ދިވެހިރާއްޖޭގެ އިސްލާމްކަމަށް 895 ވަނަ އަހަރު

ހިޖުރީ އާއަހަރެއް ފެށުނީއެވެ. ހިޖުރީ 1443 ވަނަ އަހަރު ފެށުނީއެވެ. އެހެންވީމާ، ހިޖުރީ ތާރީޚާއި ދިވެހިރާއްޖެއާއި އަދި ތާރީޚު ޖެހުމާއި ބެހޭގޮތުން ބަލައިލުމަކީ ނެތް ކަމެއް ނޫނެވެ.

ދިވެހިރާއްޖެ އިސްލާމް ދީނަށް އެނބުރުނީ ހިޖުރީ ގޮތުން 548 ވަނަ އަހަރުއެވެ. އެއީ މީލާދީ ގޮތުން 1153 ވަނަ އަހަރެވެ. ދިވެހިރާއްޖެ އިސްލާމްވުމަށްފަހު 800 އަހަރަށް ވުރެ ގިނަދުވަހު ރާއްޖޭގެ ރަސްމީ ތާރީޚަކީ ހަމައެކަނި ހިޖުރީ ތާރީޚެވެ މީލާދީ ތާރީޚު ބޭނުންކުރަން ފެށީ މީގެ 63 އަހަރުކުރިން 1958 ގައެވެ. އަދި މިފެށުނު 1443ވަނަ އަހަރަކީ އިސްލާމް ދިވެހިރާއްޖެއަށް އައި 895 ވަނަ ހިޖުރީ އަހަރެވެ.

ހިޖުރީ އައު އަހަރުގެ ފެށުން ފާހަގަކުރުމަށްޓަކައި ރާއްޖޭގައި 1370 ވަނަ އަހަރަށް ޖެހިލާއިރު ނުވަތަ މީގެ 70 އަހަރުކުރީގެ އަހަރުތަކަށް ބަލާއިރު ބަޑިހެލުން، ސަލަވާތް އަދި މަޖިލިސުއްތަޝްރީފާތު ބާއްވަމުން އައިސްފައިވެއެވެ. މަޖިލިސުއްތަޝްރީފާތަކީ ޝަރަފުވެރިންގެ މަޖިލީހެވެ. އެއީ އަމީނީ ދައުރެވެ. އެދުވަސްވަރު ދިވެހިރާއްޖެއަށް "ރަށްވެހިފަތިސް އަލިވިލި" ރަށްވެހިކަމުގެ ފުރަތަމަ މުބާރާތް ބޭއްވިފައިވެއެވެ. މީގެ 70 އަހަރު ކުރިން އެ ފަތިހަކަށް އަލިވިލުނީ ހިޖުރީ އާއަހަރުގެ މުނާސަބަތުގައެވެ. އެއީ ދިވެހިރާއްޖޭގެ ހުރިހާ އަތޮޅެއް ހުރިހާ ރަށަކުން ބައިވެރިވި ރަށްވެހިކަމުގެ ފުރަތަމަ މުބާރާތެވެ. މުޅިރާއްޖެއިން އެފަހަރު 1 ވަނަ ލިބުނު އަތޮޅަކީ ބޮޑުތިލަދުންމައްޗެވެ. މުޅިރާއްޖެއިން 1 ވަނަ ރަށަކީ އެއަތޮޅުގެ ކުޅުދުއްފުށްޓެވެ.

ތާރީޚުޖަހަން ފެށުން

ދުނިޔޭގައި މީސްތަކުން ދިރިއުޅެން ފަށައި މީސްތަކުން އާބާދުވެ ތަހުޒީބުވާން ފެށުނީ، މީގެ ގާތްގަނޑަކަށް 5500 އަހަރުކުރިން ކަމަށްވެއެވެ. އެއިރު އުފެދުނު ތަހުޒީބުތަކުގެ ތެރޭގައި، ފުރާތުކޯރާއި ދިޖުލަތުގެކޯރާއި ދެމެދުގައި އުފެދުނު މޮސެޕޮޓޭމިއާގެ ތަހުޒީބާއި، މިސުރުގެ ތަހުޒީބާއި، ސޫމާރިއާގެ ތަހުޒީބު ފާހަގަކޮށްލެވެއެވެ. މިހުރިހާ ތަހުޒީބުތައް ހިމެނެނީ މެދުއިރުމަތި ސަރަހައްދުގައެވެ. މާތްވެގެންވާ އިބްރާހީމް ޢަލައިހިއްސަލާމް ދަތުރުފުޅުކުރެއްވި ސަރަހައްދުތަކުގައެވެ.

އިންސާނުންގެ މުހުތާދުތަކާއި ކަންކަމަށް ލިޔެކިޔުމުން ތާރީޚު ޖަހަން ފެށުނީވެސް އެދުވަސްވަރުގައެވެ. މީގެ5500 އަހަރު ކުރިންނެވެ. ހަމައެފަދައިން ދުނިޔޭގައި އެންމެ ފުރަތަމަ ކަލަންޑަރުތައް ބޭނުންކުރަން ފެށުނީވެސް އެދުވަސްވަރުގައެވެ. އެ ކަލަންޑަރުތަކުގެ ތެރޭގައި ސޫމާރީން ބޭނުންކުރި ކަލަންޑަރުވެސް ހިމެނެއެވެ.

މީލާދީ ތާރީޚު، ތާރީޚެއްގެ ގޮތުގައި ބޭނުންކުރަން ފެށުނީ މީލާދީން 525ގައެވެ. މީގެ 1500 އަހަރު ކުރިން ޤުރައިޝް ވަންހައިގެ މީހުން ބޭނުންކުރި ތާރީޚަކީ ފީލުބާގައިގެ މީހުން ގެފުޅު ތަޅާލަންގޮސް ނާކާމިޔާބުވި ތާރީޚީ ހާދިސާގެ ތާރީޚެކެވެ. އެއީ ހިޖުރީ ތާރީޚުގެ 53 އަހަރު ކުރީގެ ހާދިސާއެކެވެ.

އިސްލާމީ ދައުލަތުގެ ރަސްމީ ތާރީޚެއްގެ ގޮތުގައި ހިޖުރީ ތާރީޚު ބޭނުންކުރަން ފެއްޓެވީ ހިޖުރައިން 17 ވަނަ އަހަރު އަމީރުލް މުއުމިނީން ޢުމަރު ބުނުލްޚައްޠާބު ރަޟިޔަﷲޢަންހުގެ ޚަލީފާކަމުގައެވެ. އެއީ ޚުލަފާއުއް ރާޝިދޫންގެ ދެ ވަނަ ޚަލީފާއެވެ.