މިއަަދަކީ (9 ސެޕުޓެންބަރު 2021އަކީ) ދިވެހިރާއްޖޭގައި ޕޯސްޓުގެ ޚިދުމަތް ފެށުނުތާ 115 އަހަރު ފުރުނު ދުވަހެވެ. ރާއްޖޭގައި ޕޯސްޓުގެ ޚިދުމަތް ފެށުނީ 9 ސެޕްޓެމްބަރު 1906ގައެވެ.

ރާއްޖޭގެ ޕޯސްޓު އޮފީހަކީ މުޅި ދައުލަތުގެ އެންމެގިނަ ދުވަސްވީ މުއައްސަސާއެވެ. ވީމާ ރާއްޖޭގެ ޕޯސްޓުގެ ތާރީޚަކީ ކުރިއެރުމާއި ތަރައްގީގެ މަރުހަލާތަކެއް ކަޑަތުކޮށްފައިވާ ފަޚުރުވެރި ތާރީޚެކެވެ. މިގޮތުން ބަލާއިރު ރާއްޖޭގެ ސްޓޭމްޕްތަކަކީ ދުނިޔޭގައި މަގުބޫލް ސްޓޭމްޕްތަކެއްކަން ފާހަގަކޮށްލަންޖެހެއެވެ.

1906ގައި ރާއްޖޭގެ ޕޯސްޓުގެ ޚިދުމަތް ފެށުނުއިރު ނުވަތަ ރާއްޖޭގެ ފުރަތަމަ ޕޯސްޓު އޮފީހުގެ ވެރިޔަކީ އޭރު ކަސްޓަމާއި އަދި ޚާރިޖީ ކަންތައްތައް ބެލެހެއްޓެވުމުގެ ވެރިޔާ، ރަދުންގެ ކާތިބުއްސިއްރު (ރަދުންގެ ސެކްރެޓަރީ) އަލްއަމީރު އަހުމަދު ދޮށިމޭނާކިލެގެފާނެވެ. އޭގެފަހުން 1932ގައި ރާއްޖޭގެ ދުސްތޫރީ ސަރުކާރާއެކު ޕޯސްޓުގެ ވެރިޔަކީ (އަލްއަމީރު އަހުމަދު ދޮށިމޭނާކިލެގެފާނުގެ ދަރިކަލުން) އަލްއަމީރު މުހައްމަދު އަމީނު ދޮށިމޭނާކިލެގެފާނެވެ. ކަސްޓަމުގެ ވެރިކަމާއި ވަޒީރުއްތިޖާރާ (މިނިސްޓަރ އޮފް ޓްރޭޑް) ކަމާއެކުގައެވެ.

މިއަދުގެ މި ޓެކްނޯލޮޖީގެ ދުނިޔޭގައިވެސް އެހެނިހެން ޒަމާނީ މުވާސަލާތުތަކުގެ ކުރިއެރުމާއި އެކުގައިވެސް ޕޯސްޓުގެ ޚިދުމަތުގެ މުހިންމުކަމާއި މަގުބޫލުކަން ކުޑައެއް ނޫނެވެ. އަދި ޕެންޑެމިކުގެ ނުވަތަ ކޮވިޑް-19ގެ ނުރައްކާތެރި ރޯގާ ބަލިމަޑުކަމުގެ މިހާލަތުގައި ޕޯސްޓުގެ ޚިދުމަތް ބޭނުންކުރުމުގެ މުހިންމުކަމާއި މަގުބޫލުކަން ވަނީ ކުރިޔަށްވުރެ އިތުރުވެފައެވެ. މިއިން ދޭހަވަނީ ޕޯސްޓުގެ ޚިދުމަތް އިތުރަށް ތަރައްގީކޮށް ކުރިއަރުވަންޖެހޭ ކަމެވެ.

މީގެ މަސްދުވަސް ފަހުން 9 އޮކުޓޫބަރު އެއީ ދުނިޔޭގެ ޕޯސްޓުގެ ދުވަހެވެ. ދުނިޔޭގެ ދުވަހުގެ ގޮތުގަައި 9 އޮކުޓޫބަރު ފާހަގަކުރަނީ ޕޯސްޓުގެ ބައިނަލްއަގުވާމީ ޖަމިއްޔާ ޔުނިވަރސަލް ޕޯސްޓަލް ޔޫނިއަން (ޔޫޕީީޔޫ) އުފެދުނީ 9 އޮކުޓޫބަރު 1874ގަައި ކަމަށްވާތީއެވެ. ދުނިޔޭގެ ޕޯސްޓުގެ ދުވަސް ފާހަގަކުރަން ފެށުނީ މީގެ 52 އަހަރުކުރިން 1969ގައެވެ. ވީމާ ޔޫޕީޔޫއަކީ ދުނިޔޭގެ ބައިނަލްއަގުވާމީ ޖަމިއްޔާތަކުގެ ތެރެއިން އެންމެ ޒަމާންވީ އެއް ޖަމިއްޔާއެވެ. އަދި ޕޯސްޓުގެ ޚިދުމަތަކީ ދުނިޔޭގައި އެންމެ ޒަމާންވީ މުއާސަލާތުގެ ޚިދުމަތެވެ.

ޔޫޕީޔޫގެ މެންބަރު ގައުމަކަށް ދިވެހިރާއްޖެ ވެފައިވަނީ 15 އޮގަސްޓު 1967 ގައެވެ.