ބޮޑެތި ލުއިތަކާއެކު ދެން ހުޅުވިގެންދާނީ ހޯމްސްޓޭ ގެސްޓްހައުސްތައް: މިނިސްޓަރު މައުސޫމް

ހޯމްސްޓޭއާއެކު ފަތުރުވެރިކަމުގެ ސިނާޢަތަށް ވަންނަން ބޭނުންވާ މީހުންނަށް ބޮޑެތި ލުއިތަކެއް ލިބިގެންދާނެ ކަމަށާއި، ދެން ހުޅުވިގެންދާނީ ހޯމްސްޓޭ ގެސްޓްހައުސްތައް ކަމަށް ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.

ރާއްޖެއެމްވީއަށް މިނިސްޓަރު މައުސޫމް ވިދާޅުވީ މިހާރު ގެސްޓްހައުސްއެއް ރަޖިސްޓްރީ ކުރަންޖެހޭ ނަމަ، މަދުވެގެން ތިން ކޮޓަރި ހުންނަން ޖެހޭ ކަމަށެވެ. ނަމަވެސް ހޯމްސްޓޭ ތައާރަފް ކުރެވިގެން ދިއުމާއެކު، ދެކޮޓަރި ހުންނަ ގޭބިސީގައި ވެސް ގެސްޓްހައުސް ހޯމްސްޓޭ ހެދުމުގެ ފުރުސަތު ލިބޭނެ ކަމަށެވެ.

މިނިސްޓަރު ވިދާޅުވީ ހޯމްސްޓޭ ވިޔަފާރި ރަޖިސްޓްރީ ކުރުމަށް އެ ގޭބިސީއެއްގައި ރެސްޓޯރެންޓް ހުރުން ލާޒިމެއް ނުވާނެ ކަމަށާއި، އެރަށުގައި އެންމެ ރެސްޓޯރެންޓެއް ކައުންސިލްގެ ބެލުމުގެ ދަށުން ހޯމްސްޓޭއަށް ޚާއްސަ ކުރެވިއްޖެނަމަ އެ ވިޔަފާރިއަށް ހުއްދަދެވިގެންދާނެ ކަމަށެވެ. އަދި ވަކިން ޚާއްސަކޮށް މައުލޫމާތު ފޯރުކޮށްދިނުމަށް އެ ގޭބިސީއެއްގައި ރިސެޕްޝަނެއް ހުންނަން ނުޖެހޭކަން ފާހަގަކުރައްވައި މިނިސްޓަރު މައުސޫމް ވިދާޅުވީ ފަތުރުވެރިންނަށް މައުލޫމާތު ދިނުމުން އެކަން ފުދޭނެ ކަމަށެވެ.

މިނިސްޓަރު މައުސޫމް ވިދާޅުވީ ހޯމްސްޓޭއާއެކު ރަށުގެ ވިޔަފާރިތައް އިތުރަށް ފުޅާވެ، ގިނަ ބަޔަކަށް މިސިނާއަތަށް ވަދެވިގެންދާނެ ކަމަށެވެ. އެކަމުން މަސްވެރިކަމާއި، ދަނޑުވެރިކަމާއި، އަދި ލޯންޗު ދަތުރުފަތުރު ސިނާއަތަށް ކުރިއެރުން ލިބޭނެ ކަމަށާއި، ރަށްރަށުގެ ބިމުގެ ކުލި މަތިވެގެންދާނެ ކަމަށް މިނިސްޓަރު ވިދާޅުވިއެވެ.

ޖެނުއަރީން ފެށިގެން މ. ދިއްގަރުން ހޯމްސްޓޭގެ ވިޔަފާރި ރާއްޖެއަށް ތައާރަފް ކުރާނެއެވެ. އަދި ލޯކަލް ޓޫރިޒަމާ ބެހޭ ގަވާއިދު 1 ޖެނުއަރީ 2022 ގައި ގެޒެޓް ކުރާނެއެވެ. މިބަދަލާއެކު މިހާރު ފެންވަރުގައި ހިންގަމުންދާ ގެސްޓްހައުސްތައް ހޮޓެލްތަކަށް ބަދަލުވެގެން ދިއުމުގެ ފުރުސަތު އޮންނާނެއެވެ.

ހޯމް ސްޓޭ ފަތުރުވެރިކަމަކީ، އެ ރަށެއްގައި ދިރިއުޅޭ ބަޔަކާއެކު އެއްގެއެއްގައި ފަތުރުވެރިން ޗުއްޓީ ހޭދަ ކުރާ ބާވަތުގެ ފަތުރުވެރިކަމެވެ.