އައްޑޫ ފްލައިން ސްކޫލުގެ ދަރިވަރުންގެ ކިޔެވުން ފަށައިގަތުމަށްޓަކައި ހަޔަރ އެޑިއުކޭޝަން މިނިސްޓްރީން އެހީވެދިނުމަށް ނިންމައި އެކަމާގުޅޭ ތަފްސީލުތައް ހިއްސާކޮށްފިއެވެ.

އެ ތަފްސީލުތައް ހިއްސާ ކުރައްވާފައިވަނީ ބުރާސްފަތި ދުވަހު ހަޔަރ އެޑިއުކޭޝަން މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މިނިސްޓަރ ޑރ. އިބްރާހިމް ޙަސަންއެވެ.

ޑރ ޙަސަން ވިދާޅުވީ، އެކުދިންގެ ކިޔެވުން ކުރިއަށް ގެންދިއުމަށްޓަކައި އެންމެ ފުރަތަމަ އައިލެންޑް އޭވިއޭޝަނުން "ރިފްރެޝަރ ކޯހެއް" ހަދަންޖެހޭ ކަމަށެވެ. މިއީ މިހާރު ކުދިންގެ ފެންވަރު ވަޒަން ކުރުމުގެ ގޮތުން ހަދާ ކޯހެއް ކަމަށާއި، ޕައިލެޓް ޓްރެއިނިންގ ގެ ބައި ކުރިއަށްދާނީ އޭގެ ފަހުގައިިކަމަށް މިނިސްޓަރ ވިދާޅުވިއެވެ. އެގޮތުން މި ކޯހުގެ ފީއަކީ 1500 ޑޮލަރެވެ. އޭޝިއަން އެކެޑަަމީ އޮފް އެއިރޮނޯޓިކްސް (އޭއޭއޭ) ގެ ހުރިހާ ދަރިވަރުންގެ ކޯސްފީ ލޯނުގެ ގޮތުގައި ދައްކައިދިނުމަށް މިނިސްޓްރީން މިހާރު ވަނީ ނިންމާފައެވެ.

މިނިސްޓަރ ވިދާޅުވީ، ރިފްރެޝަރ ކޯހުގެ މަރުޙަލާއަށްފަހު، އެހެން ބައިތަކުގެ އެސެސްމަންޓު ހަދައި، މިނިސްޓްރީއާ ހިއްސާ ކުރުމުން ކިޔެވުން ކުރިއަށް ގެންދަން ބޭނުންވާ ޚަރަދުތަކާގުޅޭ ބައިތައް ސަރުކާރުން ހަމަޖައްސައިދެއްވާނެ ކަމަށް ވެސް މިނިސްޓަރ ވިދާޅުވިއެވެ.

އައްޑޫ ސިޓީގައި ގާއިމުކޮށްފައިވާ އޭޝިއަން އެކެޑަމީ އޮފް އެރޯނޯޓިކްސް (އޭއޭއޭ) ގައި ޕައިލެޓްކަން ކިޔަވަމުންދާ ދިވެހި ދަރިވަރުންނަށް ދިމާވެފައިވާ، ގިނަ ދުވަސްވީ މައްސަލަތަކަށް ދާއިމީ ހައްލެއް ހޯދުމާ ގުޅޭގޮތުން ރައީސުލްޖުމްހޫރިއްޔާގެ އޮފީހުގައި ވަނީ އޭއޭއޭ ގައި ޕައިލެޓްކަން ކިޔަވަމުންދާ ދިވެހި ދަރިވަރުންނާ ކަމާގުޅޭ އިދާރާތަކުގެ އިސްވެރިންނާއެކު ބައްދަލުވުމެއް ވެސް ބާއްވާފައެވެ.

މި ބައްދަލުވުމުގައި އޭއޭއޭގެ ދަރިވަރުން ވަނީ އެ ދަރިވަރުންނަށް ދިމާވެފައިވާ ކަންކަމަށް ހައްލު ހޯދުމަށް ހުރިހާ އިދާރާއަކަށް ދިޔަކަމަށާއި، ކުރެވެންހުރި ހުރިހާ މަސައްކަތެއް ކޮށްފައިވީ ނަމަވެސް މިހާތަނަށް އެއްވެސް އެދެވޭ ޖަވާބެއް ލިބިފައި ނުވާކަން ފާހަގަކޮށްފައެވެ.

އެ ދަރިވަރުން ބުނީ ކިޔެވުން ހުއްޓިފައިވާތާ އެއް އަހަރަށްވުރެ ގިނަ ދުވަސްވެފައިވާކަމަށާއި، ރީފަންޑް ނުލިބުމާއި، އަލުން ކިޔެވުން ފެށޭނެ ދުވަހެއް ނޭނގުމުގެ ސަބަބުން އެ ދަރިވަރުންނަށް ދިމާވަމުންދާ މާލީ، ނަފްސާނީ އަދި ވަގުތުގެ ގޮތުން ދިމާވާ ދަތިތައް ވެސް އެބަހުރި ކަމަށެވެ. އެކަމާ ގުޅޭގޮތުން ރައީސް ވަނީ ކުދިންނަށް ދިމާވެފައިވާ މާލީ ދަތިތައް ހައްލުކޮށްދެއްވުމަށް ޓޮޕްއަޕް ލޯން ތަކެއް ދިނުމާއި، މިކަމުގައި އިތުރަށް ކުރެވެން ހުރި ކަންތައްތަކަކީ ކޮބައިތޯ ބެއްލެވުމަށްފަހު އެކަންކަން ހައްލުކޮށްދެއްވާނެކަމުގައި ވިދާޅުވެފައެވެ.

މީގެ ކުރިން ވެސް ސަރުކާރުން ވަނީ މި ކޯސް ހަދާ ދަރިވަރުންނަށް ލުޔެއް ދިނުމުގެ ގޮތުން ދަރިވަރުން އަނބުރާ ލޯނު ދައްކަންޖެހޭނީ ކޯސް ނިމޭ ތާރީޚުން ފެށިގެން 6 މަސްދުވަސް ފަހުންކަމުގައި ކަނޑައަޅައި، މި ކޯސް ފުރިހަމަކުރުމަށް ބައެއް ދަރިވަރުން ބޭންކް އޮފް މޯލްޑިވްސް މެދުވެރިކޮށް ނަގާފައިވާ "ކިޔަވާ" ލޯންތައް ހަޔަރ އެޑިއުކޭޝަން މިނިސްޓްރީގެ ދަށަށް ބަދަލުކޮށްފައެވެ.

އައްޑޫ ފްލައިންގ ސްކޫލްގައި ކިޔަވާ ދަރިވަރުންގެ ކިޔެވުން ހުއްޓި، ލިބުނު ގެއްލުމުގެ ބަދަލު ހޯދަން އެ ދަރިވަރުން ސިވިލް ކޯޓަށް ހުށަހަޅާފައިވާ މައްސަލަ ވެސް މިހާރު ކުރިއަށްދެއެވެ.

ބަދަލު ހޯދަން ހުށަހެޅީ އެ ސްކޫލުގައި ކިޔަވަމުންދާ 48 ދަރިވަރެކެވެ. މައްސަލައިގެ ފުރަތަމަ އަޑު އެހުމަށްފަހު އިތުރު އަޑު އެހުމެއް ބާއްވާފައެއް ނުވެއެވެ.