ޗާޓަރޑް ޕްރޮފެޝަނަލް އެކައުންޓެންޓުން ތަމްރީނު ކުރުމަށް 150 ސްކޮލަރޝިޕްގެ ފުރުސަތު
އޭގެ ތެރެއިން 50 ފުރުސަތު ޕަބްލިކް ސެކްޓަރ އަށް ޚާއްސަކޮށްފައިވޭ
ބުރާސްފަތި ދުވަހު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވާހަކަ ދައްކަވަނީ
ޗާޓަރޑް ޕްރޮފެޝަނަލް އެކައުންޓެންޓުން ތަމްރީނު ކުރުމަށް 150 ސްކޮލަރޝިޕްގެ ފުރުސަތު ހުޅުވާލުމަށް ހަޔަރ އެޑިއުކޭޝަން މިނިސްޓްރީން ނިންމައިފިއެވެ.
އެކަން ހާމަ ކުރައްވާފައިވަނީ ބުރާސްފަތި ދުވަހު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ޙަސަންއެވެ. ޑރ ޙަސަން ވިދާޅުވީ، މި ސްކޮލަރޝިޕް ފުރުސަތާ ގުޅޭ ސްކީމް ބުރާސްފަތި ދުވަހު ހުޅުވާލައްވާނެ ކަމަށެވެ. އޭގެ ތެރެއިން 50 ފުރުސަތު ޕަބްލިކް ސެކްޓަރއަށް ޚާއްސަކޮށްފައިވާއިރު، 100 ފުރުސަތު ޚާއްސަކޮށްފައިވަނީ ޕްރައިވެޓް ސެކްޓަރއަށެވެ. މިއީ އެކައުންޓިންގ ދާއިރާއިން މީހުން ބިނާކުރުމަށް ހުރި ގޮންޖެހުންތަކަށް ޙައްލު ހޯދުމަށް މުހިއްމު ކަމެއްކަމަށް މިނިސްޓަރ ވިދާޅުވިއެވެ.
މި ފުރުސަތު ހުޅުވާލަނީ ފުރަތަމަ ޑިގްރީ އަދި މާސްޓަރސް ފެންވަރުގެ ސަނަދު ޙާސިލު ކޮށްފައިވާ ދަރިވަރުންނަށެވެ. އެގޮތުން މި ސްކީމްގެ ދަށުން ރަޖިސްޓްރޭޝަން ފީ، އެނުއަލް ސަބްސްކްރިޕްޝަން ފީ، އެކްޒާމް ފީ އަދި ބުކް އެލަވަންސް ފަދަ އިނާޔަތްތައް ސީދާ މިނިސްޓްރީން ހަމަޖައްސައިދޭއިރު، ރަޖިސްޓަރޑް ކޮލެޖުތަކާއި ޔުނިވަރސިޓީތަކުގެ ދަރިވަރުންނަމަ ޓިއުޝަން ފީވެސް މިނިސްޓްރީން ދެއްކުމަށް ވަނީ ހަމަޖެހިފައެވެ.
އެކައުންޓިންގ ދާއިރާއިން މީހުން ބިނާކުރުމަކީ، މިވަގުތު ކުރަން ޖެހިފައިވާ ވަރަށް މުހިންމު މަސައްކަތެއް ކަމަށާއި، މި ޕްރޮފެޝަން ތަރައްޤީ ކުރުމަށްޓަކައި، އިންސްޓިޓިއުޓް އޮފް ޗާޓަޑް އެކައުންޓެންޓްސް އޮފް ދަ މޯލްޑިވްސްއަށް ބޭނުންވާ ހުރިހާ އެހީތެރިކަމެއް ސަރުކާރުން ފޯރުކޮށްދެއްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވެސް ވަނީ ދާދި ފަހުން ވިދާޅުވެފައެވެ. ރައީސްގެ އެ ވާހަކަފުޅަށް އަލިއަޅުވާލައްވައި މިނިސްޓަރ ވަނީ މި ފުރުސަތުތަކަކީ އެ މަޤްޞަދު ޙާސިލު ކުރުމުގެ ގޮތުން ހުޅުވާލާ ފުރުސަތުތަކެއްކަމަށް ބަޔާން ކުރައްވާފައެވެ.
މި ޕްރޮފެޝަން ތަރައްގީކުރުމަށްޓަކައި، އިންސްޓިޓިއުޓް އޮފް ޗާޓަޑް އެކައުންޓެންޓްސް އޮފް ދަ މޯލްޑިވްސްއަށް ބޭނުންވާ ހުރިހާ އެހީތެރިކަމެއް ފޯރުކޮށްދިނުމުގެ އިތުރުން، އެކައުންޓެންޓުން ތަމްރީނުކޮށް، ފަންނީ ގާބިލުކަން އިތުރުކުރުމަށް ފުރުސަތުތައް ވެސް ތަނަވަސްކޮށްދެއްވާނެ ކަމަށް ރައީސް ވަނީ ވިދާޅުވެފައެވެ. މި ދާއިރާގައި ވެސް ދިވެހިންނަށްވުރެ ގިނަކަމަށް ފާހަގަކުރެވެނީ، ބިދޭސީ އެކައުންޓެންޓުން ކަމަށް ރައީސް ވިދާޅުވިއެވެ. އަދި މިހާރުގެ ތަފާސްހިސާބުތަކަށް ބަލާއިރު، ރާއްޖޭގެ ޕްރައިވެޓް ސެކްޓަރގައި ގާތްގަނޑަކަށް 4500 އަށްވުރެ ގިނަ ބިދޭސީން އެބަ މަސައްކަތް ކުރައްވާ ކަމަށާއި، ރާއްޖޭގައި އިންކަމް ޓެކްސް ދައްކާ މީހުންގެ 15 އިންސައްތައަކީ، އެކައުންޓިންގ ދާއިރާގެ މީހުން ކަމަށް ރައީސް ވިދާޅުވިއެވެ.
ވުމާއެކު، ޕަބްލިކް ސެކްޓަރ އަށާއި ޕްރައިވެޓް ސެކްޓަރ އަށް އަމާޒުކޮށް ވަކިން ފުރުސަތުތަކެއް މިނިސްޓްރީން މިހާރު މިވަނީ ފަހިކޮށްދީފައެވެ.
މިއަދު ރާއްޖެ މިއޮތީ، ދިވެހި އެކައުންޓެންޓުންނާއި އޮޑިޓަރުން އުފައްދައި ތަމްރީނު ކުރުމަށް، ވަރަށް ބޮޑު އިސްކަމެއް ދޭންޖެހޭ ޙާލަތެއްގައި ކަމަށް ވެސް ރައީސް ވަނީ ވިދާޅުވެފައެވެ.
