ބްރިޖާއި ޕޯޓްގެ އިތުރުން 18 ބިލިއަން ރުފިޔާގެ 307 މަޝްރޫއެއް ކުރިއަށްދޭ
ފަސް އަހަރުގެ ދައުރުގައި ހުރިހާ ރަށެއްގެ ފެނާއި ނަރުދަމާ ގާއިމްކޮށް ނިމޭނެ ކަމުގެ ޔަގީންކަން އެބައޮތް
23 ރަށެއްގެ ފެނާއި ނަރުދަމާގެ މަސައްކަތް ހަވާލުކުރުމުގެ ރަސްމިއްޔާތުގައި މިނިސްޓަރ އަސްލަމް ވާހަކަފުޅު ދައްކަވަނީ
ތިލަމާލެ ބްރިޖާއި ޕޯޓްގެ މަޝްރޫއުގެ އިތުރުން 18 ބިލިއަން ރުފިޔާގެ 307 މަޝްރޫއެއް އެމަނިކުފާނުގެ ބެއްލެވުމުގެ ދަށުން ރަށްރަށުގައި ކުރަމުން އަންނަ ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
އަސްލަމް ވިދާޅުވީ، މިކަންކަން ބަލައިގަންނަ އަދި މިކަންކަން އެނގި ތިބެ ނޭނގޭ ކަމަށް ހަދާ ބަޔަކު ވެސް އުޅޭނެ ކަމަށެވެ. އެހެންނަމަވެސް މި ސިޔާސީ މާހަައުލުގައި އެ އެންމެންނާއެކު ވެސް އުޅެން ޖެހޭނެ ކަމަށެވެ. މިނިސްޓަރު ވިދާޅުވީ، ރައީސް ޞާލިޙްގެ ސަރުކާރަކީ ކަނުލައި އަޑުއަހާ، ރައްޔިތުން އެދޭ ގޮތަށް ކަންކަން ކޮށްދޭ ސަރުކާރެއް ކަމަށެވެ. ރައީސް އެދިވަޑައިގަންވާ ގޮތަށް މަސައްކަތްތައް ކުރިއަށް ގެންދަވާނެ ކަމުގެ ޔަގީންކަން އަސްލަމް ދެއްވިއެވެ.
މިނިސްޓަރު ވިދާޅުވީ، އަމާޒުކޮށްގެން ތިބީ ދެ އަހަރު ނިމޭއިރު ހުރިހާ ރަށެއްގެ މަސައްކަތް ހަވާލުކުރުމަށް ނަމަވެސް އަހަރެއްހާ ދުވަސް ލަސްވެއްޖެ ކަމަށެވެ. އެހެންނަމަވެސް ރައީސް ވައުދުވެވަޑައިގެންފައިވާ ގޮތަށް ފަސް އަހަރުގެ ދައުރުގައި ހުރިހާ ރަށެއްގެ ފެނާއި ނަރުދަމާ ގާއިމްކޮށް ނިމޭނެ ކަމުގެ ޔަގީންކަން އެބައޮތް ކަމަށް އަސްލަމް ވިދާޅުވިއެވެ.
ރާއްޖޭގެ ތަރައްގީގެ ދުވެލީގައި ވަރަށް ދުރަށް އާދެވިއްޖެ ކަމަށާއި، ދާން އޮތް ހިސާބު އަދި ވަރަށް ދުރު ކަމަށެވެ. ތަރައްގީވެފައިވާ ގައުމަކާ ހިސާބަށް ދިޔުމަށް އަދިވެސް ވަރަށް ދުރަށް ދަތުރުކުރަން ޖެހޭ ކަމަށާއި، މިހާރުވެސް އާދެވިފައިވާ ހިސާބާއި، ސްޕީޑް ވެސް ފަހަތަށް އެނބުރި ބަލާލަން ޖެހޭ ކަމަށެވެ. ކުރިއަށްދާން އޮތް ހިސާބާއި ސްޕީޑް ވަޒަން ކުރެވޭނީ އޭރުން ކަމަށް އަސްލަމް ވިދާޅުވިއެވެ.
ރާއްޖެއަށް އައިސްފައިވާ ތަރައްގީގެ މިސާލު ޖައްސަވަމުން އެމަނިކުފާނު މާލެއަށް ފުރަތަމަ ވަޑައިގެންނެވީ 8 ދުވަހުން ކަމަށާއި، އެހެންނަމަވެސް މިއަދު މާލެއިން ސައި ބޮއެގެން މެންދުރުގެ ކެއުމަށް ރަށަށް ދެވޭނެ ކަމަށް ވިދާޅުވިއެވެ. އެހެންނަމަވެސް އަދިވެސް ދާން ބޭނުންވާ ހިސާބަށް ނުދެވޭ ކަމަށް ވިދާޅުވިއެވެ. ދިރިއުޅުމުގެ ވައްޓަފާޅިއާއެކު ކަންކަން ބަދަލުވަމުން އަންނައިރު، މިހާރު މިކުރާ މަސައްކަތަކީ އެކަންކަމާ ފައި ހަމަކުރުމަށް ކުރަމުން އަންނަ މަސައްކަތް ކަމަށެވެ.
ތަރައްގީގައި ކުރަން ހުރި މަސައްކަތް އަދިވެސް ވަރަށް ގިނަ ކަމަށް ވިދާޅުވިއެވެ. އަބަދު ޝަކުވާކުރުން އެއީ ހަމަޖެހޭ ކަމެއް ނޫން ކަަމަށާއި، ކުރާ ކަންތައް ބަލައިގަންނަން ޖެހޭ ކަމަށް ވިދާޅުވިއެވެ.
