މާލޭ ރައްޔިތުންނަށް ދިމާވެފައިވާ ބޯހިޔާވަހިކަމަށް ހައްލު ހޯދައި ދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ދެއްވައިފިއެވެ.
ބުދަ ދުވަހު، 23 ރަށެއްގެ ފެނާއި ނަރުދަމާގެ މަޝްރޫއުގައި ސޮއިކުރުމަށް ބޭއްވި ޚާއްސަ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ މާލޭގެ ރައްޔިތުންނަށް ދިމާވެފައިވާ ބޯހިޔާ ވަހިކަމުގެ މައްސަލަތަކަށް ހައްލު ހޯދައި ދިނުމަކީ މިސަރުކާރުން ކޮށްދެއްވާނެ ކަމެއްކަމަށެވެ. މިހާރުވެސް މި މަސައްކަތް ކުރެވެމުންދާއިރު، ހުޅުމާލެއާއި، ގުޅީފަޅާއި، އެނޫން ތަންތަނުން ވެސް މާލޭ ރައްޔިތުންނަށް ގޯތި ލިބޭނެ ގޮތެއް ހަމަޖައްސަވައި ދެއްވާނެ ކަމުގެ ޔަގީންކަން ރައީސް ދެއްވިއެވެ.
މިހާރުވެސް ހުޅުމާލޭގައި 5،000 ހައުސިން ޔުނިޓް އެޅުމުގެ މަޝްރޫއު ކުރިއަށް އެބަދާ ކަމަށާއި، މާލޭގެ ރައްޔިތުންނަށް ގޯތި ދިނުމުގެ މަޝްރޫއެއް ކުރިއަށް ގެންދިއުމަށް ސަރުކާރުން ރާއްވަވާފައި އޮތް ކަމުގައި ރައީސް ވިދާޅުވިއެވެ. މާލޭގެ ރަައްޔިތުންނަށް ގޯތި ދެއްވާނީ ހަމައެކަނި ގުޅީފަޅުން ނޫން ކަމަށާއި، ހުޅުމާލެއިން ވެސް ގޯތި ދެއްވާނެ ކަމަށް ވިދާޅުވިއެވެ. އެމަނިކުފާނު ވިދާޅުވީ މިއީ 1،000 ގޯތީގެ ވާހަކައެއްނޫން ކަމަށާއި، އޭގެ ދެގުނަ ތިން ގުނަ ގޯތި އިރާދަކުރެއްވިޔާ މާލޭގެ ރައްޔިތުންނަށް ފޯރުކޮށްދެއްވާނެ ކަމަށެވެ.
ރައީސް ވިދާޅުވީ މާލޭގެ ރައްޔިތުންގެ ބޯހިޔާވަހިކަމާއި ގޯތި ގެދޮރުގެ މައްސަލަތަކުގެ ވާހަކަ ދައްކަވާ ބޭފުޅުން އެވާހަކަ ދައްކަވަމުންދަނީ ވަކި މަންފާތަކެއް ހާސިލްކުރުމަށް ކަމަށެވެ. އަދި ޚާއްސަކޮށް ސަރުކާރުގެ ސިޔާސަތުތައް އެނގިވަޑައި ގަންނަވާ ބޭފުޅުން ވެސް އެވާހަކަ ދައްކަވަމުންދަނީ ވަކި މަންފާތަކެއް ހާސިލް ކުރުމުގެ ބޭނުމުގައި ކަމަށެވެ.
މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކުރުމަށް މިހާރު ކުރިއަށްދާ މަސައްކަތްތައް ވީހާވެސް އަވަހަކަށް ނިންމުމަށްޓަކައި، މި މަސައްކަތް ހަވާލު ކުރައްވާފައިވާ ވަޒީރުންނާއި، ސިޔާސީ ބޭފުޅުން ކަނޑައެޅިފައިވާ މުއްދަތުގައި މަސައްކަތްތައް ނިންމުމަށް ބާރު އަޅުއްވަން ޖެހޭނެ ކަމަށެވެ. އޭރުން މިކަމަށް ހައްލު ހޯދޭނެ ކަމަށެވެ.
ކުރިއަށް އޮތް 2 އަހަރުގެ ތެރޭގައި މުޅި ރާއްޖޭގެ އެކި ކަންކޮޅުތަކުގައި ބޯހިޔާވަހިކަމަށް ޚާއްސަކޮށް 1.2 ބިލިޔަން ރުފިޔާގެ މަޝްރޫއު ހިންގުމަށް ވަނީ ހަމަޖެހިފައެވެ. ހައުސިންގ މިނިސްޓަ މުހައްމަދު އަސްލަމް ދާދި ފަހުން ވިދާޅުވެފައިވަނީ، މާލޭގެ ރައްޔިތުންނަށް ހުޅުމާލެއާއި ގުޅީފަޅުން 3000-4000 ދެމެދުގެ އަދަދަކަށް ގޯތި ދޫކުރުމަށް ސަރުކާރުން މަސައްކަތް ކުރައްވަމުން ގެންދަވާ ކަމަށެވެ.
