އެޗްޑީސީގެ ތިޖޫރީގެ ތަޅުދަނޑިފަތި އަތުލުމަކީ މުނިސިޕަލް ކައުންސިލްގެ މަސައްކަތެއް ނޫންކަމަށް މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) ވިދާޅުވެއްޖެއެވެ.

ބޮންޑޭ ކުރެއްވި ޓްވީޓެއްގައި ވިދާޅުވީ އެޗްޑީސީގެ ތިޖޫރީގެ ތަޅުދަނޑިފަތި އަތުލުމަކީ މުނިސިޕަލް ކައުންސިލްގެ މަސައްކަތެއް ނޫން ކަމަށެވެ. އަދި ޑްރަގް ކެފޭ ސަރަހައްދުތަކުގައި ސީސީޓީވީ ހަރުކުރުމާއި މާލޭ ސަރަހައްދުން ފޭރުމާއި ވައްކަން ހުއްޓުވާން ފުލުހުންނާ ގުޅިގެން މާލެތެރެ ބެލެހެއްޓުމަކީ މާލޭ މުނިސިޕަލް ކައުންސިލްގެ މަސައްކަތް ކަމަށެވެ.

ބޮންޑޭ މިހެން ވިދާޅުވެފައި މިވަނީ މާލޭގެ މީހުންނަށްޓަކައި އެޗްޑީސީ އުވާލަންޖެހޭ ކަމަށް މާލޭ ސިޓީ ކައުންސިލްގެ މޭޔަރު ޑރ. މުޙައްމަދު މުއިއްޒު ވިދާޅުވުމާ ގުޅިގެންނެވެ.

މުއިއްޒު މިގޮތަށް ގޮވާލާފައި މިވަނީ ހުޅުމާލޭގެ ބިމުގެ އިހުތިސާސްގެ މައްސަލައިގައި އެޗްޑީސީ އާއި މާލޭ ސިޓީ ކައުންސިލްއާ ދެމެދު ދެބަސްވުން އުފެދިފައި ވަނިކޮށް، މީހުން ދިރިއުޅުމަށްޓަކައި ބީލަމުގެ އުސޫލުން ބޮޑު އަގުގައި 60 ބިމެއް ވިއްކަން އެޗްޑީސީން އިއްޔެ އިއުލާން ކުރުމާ ގުޅިގެންނެވެ. އަދި އެޗްޑީސީއަކީ މާލޭގެ ރައްޔިތުންގެ ހައްގުތަކަށް އޮތް ހުރަހަކަށް ވެފައިވާ ކަމަށް ވެސް މުއިއްޒު ވިދާޅުވިއެވެ.

ހުޅުމާލެ ބެލެހެއްޓުމާއި ހުޅުމާލޭގެ ބިމުގެ މިލްކުވެރިކަން އެޗްޑީސީއަށް ދީފައި ވަނިކޮށް، މާލޭ ސިޓީ ކައުންސިލުން ވަނީ ހުޅުމާލޭގެ ރަޖިސްޓްރީ ބާތިލުކޮށްފައެވެ. މާލޭ ސިޓީ ކައުންސިލުން ކުއްލި ގޮތަކަށް މިހެން ނިންމީ ހުޅުމާލޭގެ ދެވަނަ ފިޔަވީގައި އިމާރާތްކޮށްފައިވާ ހިޔާ ފްލެޓު ސަރަހައްދުގައި އިދިކޮޅު ޕީޕީއެމް/ޕީއެންސީން ކޮތަރުކޮށީގެ ނަމުގައި ޖަލްސާއެއް ބާއްވަން އުޅެނިކޮށް، ފުލުހުން މެދުވެރިކޮށް އެޗްޑީސީން އެކަން ހުއްޓުވުމުންނެވެ.

ނަމަވެސް އެޗްޑީސީން މި މައްސަލަ ކޯޓަށް ހުށަހެޅުމުން ސިވިލް ކޯޓުން ވަނީ ހުޅުމާލޭގެ ބިމުގެ މިލްކުވެރިކަމާއި ހުޅުމާލެ ތަރައްގީކުރުމަށް އެޗްޑީސީއަށް ލިބިފައި އޮތް ހައްގަށް ހުރަސް އެޅޭ ފަދަ އެއްވެސް ކަމެއް، އެއްވެސް ފަރާތަކުން ނުކުރުމަށް އަމުރެއް ނެރެފައެވެ. އަދި ސިޓީ ކައުންސިލްގެ ނިންމުން ތަންފީޒު ކުރުމުގެ ގޮތުން އެއްވެސް ކަމެއް ނުކުރަން އަންގާ ކަމަށް އެ އަމުރުގައިވެއެވެ. މީގެ އިތުރުން އެފަދަ ކަމެއް ކުރާ ނަމަ، އެކަން ހުއްޓުވުމަށް ފުލުހުންނާއި ދައުލަތުގެ މައްޗަށް ސިވިލް ކޯޓުން އަމުރުކޮށްފައިވެއެވެ.