ޖެހިޖެހިން ދެ އަހަރު ރާއްޖެއަށް ވޯރލްޑް ލީޑިންގ ޑެސްޓިނޭޝަން ލިބިފައިވާއިރު އަންނަ އަހަރުވެސް މަސައްކަތްކުރާނީ މިހާރު ލިބިފައިވާ މިކާމިޔާބު ދެމެހެއްޓުމަށްކަމަށް އެމްއެމްޕީއާރުސީގެ މެނޭޖިންގ ޑިރެކްޓަރ ތައްޔިބު މުހައްމަދު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ރާއްޖޭގެ ފަތުރުވެރިކަން އިޝްތިހާރުކުރުމުގެ މަސައްކަތްތަކާއި ގުޅޭގޮތުން ވާހަކަދައްކަވަމުން ތައްޔިބު ވިދާޅުވީ, ކާމިޔާބެއް ލިބުމަށްފަހު ކާމިޔާބު ދެމެހެއްޓުމަކީ އެންމެ އުނދަގޫ ކަންތައްކަމަށެވެ. ކޮވިޑްގެ އެންމެ ދަތި އުނދަގޫ ދުވަސްވަރު ރާއްޖެއަށް ވޯރލްޑް ލީޑިން ޑެސްޓިނޭޝަން ލިބުމަކީ މާކެޓިންގއަށް ލިބުނު ވަރަށް ބޮޑު ބާރެއްކަމަށް ތައްޔިބު ވިދާޅުވިއެވެ. އެ އެވޯރޑް ބޭނުންކޮށްގެން ރާއްޖެއިން އިޝްތިހާރުކުރަމުންދިޔައީ ގުދުރަތީގޮތުން ރާއްޖެ އުފެދިފައިވާ ގޮތަކީ މިދަނޑިވަޅަށް އެންމެ ރަނގަޅު ގޮތްކަމަށް ކިޔައިދީގެންކަމަށް ތައްޔިބު ވިދާޅުވިއެވެ.
އެގޮތުން ރާއްޖެއަށް ލިބިފައި ހުރި އެހެން އެވޯރޑްތަކުގެ ބޭނުންކޮށްގެން ރާއްޖެ އިޝްތިހާރުކުރުމުގައި މުހިންމު ކާމިޔާބު މަސައްކަތްތަކެއް ކުރެވުނު ކަމަށް ތައްޔިބު ވިދާޅުވިއެވެ. ނަމަވެސް 2020 ވަނަ އަހަރާ ޚިލާފަށް 2021 ވަނަ އަހަރު ފާހަގަވީ ވަރަށް ކޮމްޕެޓިޓިވް އަހަރެއްގެ ގޮތުގައި ކަމަށް ތައްޔިބު ވިދާޅުވިއެވެ.
ތައްޔިބު ވިދާޅުވީ އަބަދުވެސް މާކެޓް ކުރުމުގައި ބަލަނީ އިންޑަސްޓްރީން ބޭނުންވަނީ ކޮންކަމެއްތޯ ކަމުގައެވެ. އަދި ރާއްޖެ އިޝްތިހާރުކުރުމުގެ މަސައްކަތްކުރަމުންދަނީ ހަމައެކަނި އެމްއެމްޕީއާރުސީގެ އެކަނި މަސައްކަތަކުން ނޫންކަމަށާއި މިއީ އެތައް ބަޔަކު ގުޅިގެން ކުރާ މަސައްކަތުގެ ނަތީޖާކަމަށެވެ. ކޮވިޑްގެ ދަތި އުނދަގޫ ދަނޑިވަޅެއްގައި ރާއްޖެއިން ފަތުރުވެރިކަމުގައި މުހިންމު ކާމިޔާބީއެއް ހޯދާފައިވާކަމަށް ތައްޔިބު ވިދާޅުވިއެވެ.
