ދުޅަހެޔޮ ޞިއްޙަތެއްގައި ހުރުމަށް ނިއުޓްރިޝަން ލިބޭ، އެކި ބާވަތްތަކުގެ ކާނާ ކެއުން މުހިންމު: މެޑަމް ފަޒްނާ
27 ޑިސެމްބަރު 2021 | ހޯމަ 16:36މި ކޭމްޕުގެ މި އަހަރުގެ ޝިއާރަކީ "ގަރލް ޕަވަރޑް ނިއުޓްރިޝަން"
ރައީސުލްޖުމްހޫރިއްޔާގެ އަނބިކަނބަލުން އަދި ޗީފް ގައިޑް ފަޒްނާ އަޙްމަދު
މޯލްޑިވްސް ގަރލް ގައިޑްސް އެސޯސިއޭޝަންއިން އިންތިޒާމްކޮށްގެން ފެށި 09 ވަނަ ނޭޝަނަލް ސިކްސަރސް ކޭމްޕް 2021ގެ ތެރޭގައި ކުރިއަށް ގެންދާ ލިޓްލްމެއިޑްސްގެ އެޑްވޮކަސީ ޙަރަކާތް ރައީސުލްޖުމްހޫރިއްޔާގެ އަނބިކަނބަލުން އަދި ޗީފް ގައިޑް ފަޒްނާ އަޙްމަދު ޝަރަފުވެރި ކޮށްދެއްވައިފިއެވެ.
ޣާޒީ ސްކޫލުގައި ކުރިޔަށް ދިޔަ މި ޙަރަކާތުގައި، ރައީސުލްޖުމްހޫރިއްޔާގެ އަނބިކަނބަލުން ވަނީ، ދުޅަހެޔޮ ޞިއްޙަތެއްގައި ހުރުމަށް ނިއުޓްރިޝަން ލިބޭ ފަދަ އެކި ބާވަތްތަކުގެ ކާނާ ކެއުމުގެ މުހިންމުކަން ފާހަގަކުރައްވައި އެކަމާ ގުޅޭގޮތުން ފުޅާ ދާއިރާއެއްގައި ވާހަކަފުޅުދައްކަވާފައެވެ. މިގޮތުން، އެކަމަނާ ވަނީ ރަނގަޅު ކާނާ ނުލިބުމުގެ ސަބަބުން ނުވަތަ ނުކެއުމުގެ ސަބަބުން ދިމާވާ ޞިއްޙީ ކަންކަން ގުޅިފައިވަނީ، އަންހެނުންނާްި ފުރާވަރަށް އަރާ އަންހެން ކުދިންގެ ނިއުޓްރިޝަންއާ ކަމަށް ތަޖްރިބާކާރުން ވިދާޅުވާކަމަށާއި، އާންމުކޮށް ރާއްޖެއިން ލިބެން ހުންނަ ތަކެތި ބޭނުންކޮށްގެންވެސް ޞިއްޙަތަށް ފައިދާހުރި ކާނާ ކެވޭނެކަމުގައި ވިދާޅުވެފައެވެ.
މީގެ އިތުރުން ވެސް އެކަމަނާ ވަނީ ތަޢުލީމާއި ޢަމަލީ ތަޖުރިބާގެ ތެރެއިން، ބޮޑެތިވަމުން އަންނަ އަންހެންކުދިންނަކީ ދުޅަހެޔޮ، ހަށިހެޔޮ ކުދިބަޔަކަށް ހެދުމަށް ގާލަރލް ޕަވަރޑް ނިއުޓްރިޝަން ބެޖްގެ މުގައްރަރުގެ ބޭނުންތެރިކަން ލިބިގެންދާނެ ކަމަށް އުންމީދު ކުރައްވާކަމުގައި ވިދާޅުވެފައެވެ.
ގާރލް ޕަވަރޑް ނިއުޓްރިޝަންގެ މުޤައްރަރަކީ ވޯރލްޑް އެސޯސިއޭޝަން ފޮރ ގާރލް ގައިޑްސް އެންޑް ގާރލް ސްކައުޓްސް (ވެގްސް) އަދި ނިއުޓްރިޝަން އިންޓަރނޭޝަނަލް ގުޅިގެން ތައްޔާރުކޮށްފައިވާ މުޤައްރަރެކެވެ. މިޙަރަކާތުގެ ތެރެއިން، ކެއުމުގައި ރަނގަޅު ކާނާ ހިމެނުމާއި ޙަރަކާތްތެރިވެ އުޅުމުގެ މުހިންމުކަން ދަސްކޮށްދިނުމަށް ކުދިންގެ އުމުރާ ގުޅޭގޮތުން ގިނަ ޙަރަކާތްތަކެއް ވަނީ ރޭވިފައެވެ. މީގެ އިތުރުން "ސިކްސަރސް ޗެލެންޖް" ވެސް ބައިވެރިން ވަނީ ފުރިހަމަކޮށްފައެވެ. އެއީ ތަފާތު އެކި ހުނަރުތައް އަދި ދިރިއުޅުމުގެ ޢަމަލީ މައިދާނުގައި އިސްނަގައިގެން މީހުންނާއި ގުޅިގެން މަސައްކަތްކުރުމުގެ އާދަ އަށަގެންނެވުމަށް މަގުފަހިކޮށްދޭނެ ގޮތައް ފަރުމާ ކުރެވިފައިވާ ޙަރަކާތްތަކެކެވެ.
ޑިސެމްބަރ މަހުގެ 26ން 28އަށް ހުޅުމާލޭ ޣާޒީ ސްކޫލުގައި ކުރިޔަށް ގެންދާ މި ކޭމްޕަކީ ރާއްޖޭގެ ލިޓްލްމެއިޑް ޙަރަކާތް ހިންގާ ހުރިހާ ސްކޫލްތަކުގެ ޢުމުރުން 10 އަހަރާ 11 އަހަރާ ދެމެދުގެ 308 ލިޓްލްމެއިޑުން އަދި 75 ގައިޑަރސް އޮފިޝަލުންގެ ގޮތުގައި ބައިވެރިވާ ކޭމްޕެކެވެ. ރާއްޖޭގެ 13 އަތޮޅަކުން 42 ސްކޫލުން ބައިވެރިވެފައިވާ މި ކޭމްޕުގެ މި އަހަރުގެ ޝިއާރަކީ "ގަރލް ޕަވަރޑް ނިއުޓްރިޝަން"އެވެ.
