އަންނަ އަހަރަކީ މޯލްޑިވިއަންއަށް ފައިދާވާނެ އަހަރެއް
މިފަދަ ދަނޑިވަޅުތަކުގައި ގައުމީ ކެރިއަރ އޮތުމުގެ މުހިއްމުކަން ހާމެވެގެން ހިނގައްޖެ
މޯލްޑިވިއަންގެ ސިޕްލޭން ކްރޫއެއް
އަންނަ އަހަރަކީ މޯލްޑިވިއަންއަށް ފައިދާވާނެ އަހަރެއް ކަމަށް އެކުންފުނިން ބުނެފިއެވެ.
އެ ކުންފުނީ މެނޭޖންގ ޑިރެކްޓަރ މުހައްމަދު މިހާދު އަދި ޑެޕިއުޓީ މެނޭޖިންގ ޑިރެކްޓަރ އައިޝަތު ޖެނިފަރ ރާއްޖެއެމްވީއާ ވާހަކަދައްކަވަމުން ވިދާޅުވީ، 2020 އަދި 2021 ވަނަ އަހަރު ކުންފުންޏަށް ފައިދާ ނުވި ނަމަވެސް ރާއްޖޭގެ ފަތުރުވެރިކަން މިހާރު ކުރިއަރަމުންދާ މިންގަނޑަށް ބަލާނަމަ އަންނަ 2022 ވަނަ އަހަރަކީ ކުންފުންޏަށް ފައިދާވާނެ އަހަރެއް ކަމަށެވެ. އަދި އަންނަ އަހަރު 2019ށްވުރެ ރަނގަޅު އާމްދަނީއެއް ލިބޭނެ ކަމަށް ޑީއެމްޑީ ޖެނިފަރ ވިދާޅުވިއެވެ.
ދެ އަހަރުގެ ގެއްލުން މުޅިން އިއާދަކުރަން އަހަރުތަކެއް ނަގާނެ ކަމަށް ވިދާޅުވިއެވެ.
ސަރުކާރުގެ އެހީތެރިކަމާއެކު ކުންފުނި ކުރިއަށްދާކަން ފާހަގަކުރައްވަމުން އެމްޑީ މިހާދު ވިދާޅުވީ، 2021 ވަނަ އަހަރު ކުންފުނީގެ ކެޕިޓަލް އިންވެސްޓްމެންޓަށް ސަރުކާރުން 200 މިލިއަން ރުފިޔާ އިންޖެކްޓް ކުރިކަމަށެވެ. އަދި 2020 ވަނަ އަހަރު ވެސް ސަރުކާރުން ވެދިން އެހީތެރިކަމާއެކު މިހާރު ކުންފުންޏަށް ފައިދާވާނެ ކަމުގެ ކޮޅުމަތި ފެންނަން ފަށާފައިވާ ކަމަށެވެ. ކޮވިޑްގެ ސަބަބުން ދަތުރުތައް ހުއްޓި ފައިދާ ނުވި ނަމަވެސް މުވައްޒަފުން ވަކި ނުކޮށް ގައުމީ ޚިދުމަތުގައި އޮވެވުނީ ސަރުކާރުގެ އެހީތެރިކަމާއެކު ކަމުގައި ވިދާޅުވިއެވެ. މިފަދަ ދަނޑިވަޅުތަކުގައި ގައުމީ ކެރިއަރ އޮތުމުގެ މުހިއްމުކަން ހާމެވެގެން ހިނގައްޖެ ކަމަށް ވެސް ވިދާޅުވިއެވެ.
ކުންފުންޏަށް އެންމެ ބޮޑަށް ފައިދާވާ އެއްކަމަކީ ސީ ޕްލޭން ދަތުރުތައް ކަމަށާއި، ކޮވިޑާއެކު އެ ދަތުރުތައް ހުއްޓިފައި އޮތުމަށްފަހު މިހާރު ދަތުރުތައް އަލުން ފެށިގެން ކުރިއަށްދާ ކަމުގައި ވިދާޅުވިއެވެ. އަދި ރާއްޖެއިން ބޭރުގެ މަންޒިލްތަކަށް ކުރަމުން އައި ދަތުރުތައް، ޚާއްސަކޮށް ޗައިނާގެ 6 މަންޒިލަކަށް ކުރަމުން އައި ދަތުރުތައް މަޑު ޖައްސާލުމުން އާމްދަނީން އެކަން ފެނުނު ކަމަށް ވިދާޅުވިއެވެ. މިހާދު ވިދާޅުވީ، އަންނަ އަހަރު އައު މަންޒިލްތަކަށް ދަތުރު ފެށުމަށް ވެސް ކުންފުނިން މިހާރު ނިންމާފައިވާ ކަމަށެވެ. އެހެންނަމަވެސް އެއީ ކޮން މަންޒިލްތަކެއްކަން މިހާދު ވިދާޅެއް ނުވެއެވެ.
ކުންފުންޏަށް ދަތި ދަނޑިވަޅުގައި ވެސް މުވައްޒަފުން ކުންފުންޏާއެކު ކުރި މަަސައްކަތް ފާހަގަކުރައްވަމުން މިހާދު ވިދާޅުވީ، މުވައްޒަފުންގެ މުސާރައިން އުނިކުރި ބައި ޑިސެމްބަރު މަހު އަލުން މުވައްޒަފުންނަށް ދޭން ފަށާނެ ކަމަށެވެ.
